Ura për te MarkuShembull

Rrini gjithnjë zgjuar dhe gati

Në këto fjalë, ka shumë gjëra që janë të vështira për t’u kuptuar. Por le të mendojmë për atë që është shpjeguar në mënyrë të qartë.

Së pari, ne duhet të bëjmë detyrën tonë në këtë botë deri në kthimin e Zotit. Cila është ajo? Të bëni atë që Perëndia ju ka thirrur të bëni në këtë kohë: të studioni e të jepni më të mirën në shkollë, të punoni në shtëpi ose kudo ku është puna juaj. A e kuptoni që jeni duke e nderuar Perëndinë edhe përmes punës suaj çdo ditë? Ai e sheh punën tonë, dhe do të na tregojë më vonë se si e kemi bërë atë. Ky mendim duhet të na nxisë gjithmonë që të bëjmë më të mirën.

Por nuk duhet të jemi kaq të zënë me punën tonë, sa të harrojmë që duhet të jemi gati për t’u larguar! Zoti na paralajmëron që të mos jemi si ata që flenë. Kur flemë, nuk e dimë se çfarë po ndodh përreth nesh. Nuk e kuptojmë çfarë ore është. Shpesh mund të jemi kaq të zënë me gjërat e jetës, saqë harrojmë që Zoti Jezus do të kthehet! Prandaj, Zoti tha disa herë: “Rrini zgjuar”. Ai do të vijë papritmas.

A jeni gati? Në mënyrë që të udhëtoni në një vend tjetër, ju duhet të keni një pasaportë të vlefshme, me foton dhe me emrin tuaj, si edhe me emrin e vendit tuaj. Pa këtë, ju nuk mund të hyni në një vend tjetër. A e keni “pasaportën” që duhet për të hyrë në shtëpinë e Perëndisë?

Vetë Zoti Jezus është “pasaporta” për të hyrë në qiell. Ai është e vetmja “pasaportë”, që na lejon të hyjmë dhe të jetojmë në shtëpinë e Perëndisë. A po i besoni vetëm Atij? Le të jetë çdo ditë lutja juaj për një besim të tillë shpëtues në Jezu Krishtin!