Ura për te MarkuShembull

Vetëshqyrtimi

A nuk është e mahnitshme se si Jezusi i kuptonte të gjithë ata që ishin rreth Tij? Ai i dinte me përsosmëri mendimet në zemrën e secilit. Ai e dinte se çfarë po planifikonte Juda, sikurse çfarë do të bënte pjesa tjetër e dishepujve. Ata do ta braktisnin Atë kur do të kishte më shumë nevojë për ta; secili prej tyre do të largohej kur ushtarët do të vinin për ta marrë Jezusin.

Jezusi i paralajmëroi dishepujt se do ta braktisnin, por Pjetri nuk e pranoi këtë. Mbase të gjithë të tjerët do të bënin këtë gjest prej frikacakësh, por Pjetri ishte i sigurt që ai nuk do ta braktiste Mësuesin e Tij. Padyshim që Pjetri e kishte me gjithë mend, sepse ai vërtet e donte Zotin Jezus. Sidoqoftë, Pjetri nuk e dinte se sa i dobët ishte ose se sa shpejt zemra e tij mund të binte në mëkatin më të rëndë.

Jo shumë kohë më parë, Zoti Jezus u kishte treguar dishepujve të Tij se sa nevojë kishin për Atë. Ai tha: “Unë jam hardhia, ju jeni shermendet; ... sepse pa mua nuk mund të bëni asgjë” (Gjo. 15:5). A e kishte dëgjuar Pjetri këtë? Ai mund ta ketë dëgjuar, por sigurisht që nuk e besonte. Sikur të ishte lutur: “Zot, nuk mund të jem i fortë dhe i guximshëm vetëm me forcën time. Më mbro nga një mëkat kaq i tmerrshëm, mëkati të Të mohoj Ty!”. Por në vend të kësaj, ai u bë edhe më i sigurt në veten e tij.

Çfarë mendoni për veten? Mbase ndiheni të fortë dhe të sigurt, dhe mendoni se mund të përballeni lehtësisht me tundimin. Ky është vetëbesimi, ose e thënë ndryshe, të kesh besim te forcat tua. Ta besosh këtë gjë është një rrezik i madh. Vetëbesimi vjen nga krenaria, dhe Bibla na paralajmëron që krenaria gjithmonë vjen përpara shkatërrimit. Pjetri e përjetoi këtë gjë në mënyrë shumë të dhimbshme, kur më pas, fjalët e Jezusit u realizuan.

Le të mësojmë të jemi të përulur. Nëse jeni të suksesshëm ose të fortë, është fuqia e Perëndisë që ju bën të tillë. E gjithë lavdia i takon Atij dhe aspak neve. Neve na pëlqen kur të tjerët na duartrokasin ose i pranojnë aftësitë tona. Ndihemi shumë të kënaqur kur të tjerët na e bëjnë qejfin duke thënë që ne mund t’ia dalim. Por le të mbajmë mend gjithmonë që Perëndia është Krijuesi ynë dhe Ai që na ndihmon të kemi sukses.

E dini ku qëndron dobësia më e madhe? Është në ato fusha ku mendoni se jeni më të fortë! Pjetri ishte një njeri i guximshëm, një njeri që fliste pa drojë. Ai ishte drejtuesi që s’njihte frikë, që ndiente shumë dashuri, zell dhe vendosmëri. A ishte e mundur që ai të skandalizohej – madje edhe të binte në besimin e tij? Në asnjë mënyrë – kështu mendonte. Sikur t’i kishte dëgjuar paralajmërimet e Mësuesit të Tij të dashur, ai do t’i kishte kursyer Zotit shumë dhimbje, dhe vetes së tij do t’i kishte kursyer shumë turp.