Stinët e zemrësShembull

Duke vrapuar vrapin e krishterë

A nuk e dini se ata që vrapojnë në stadium, vërtet vrapojnë të gjithë, por vetëm një e merr çmimin? Vraponi në mënyrë që ta merrni. - 1 e Korintasve 9:24

Shpresa ime qëndron në faktin që ti me të vërtetë dhe me gjithë zemër të jesh nisur për udhëtimin tënd drejt qiellit. Zoti e shpejtoftë rrugën tënde!

Ai të ruajttë, hap pas hapi, ndërsa vështron drejt Atij që është vetë jeta jote! Lutem që të mund të shohësh vazhdimisht se kjo botë nuk është e denjë që të shqetësohesh. Ajo po venitet dhe ne së shpejti do të qëndrojmë para fronit të madh të bardhë. Përderisa e ke filluar udhëtimin tënd, vazhdo të ecësh përpara. Mos pusho aty ku je. Ne jemi në një fushë vrapimi. Vendi nga i cili fillojmë është kthimi në besim. Qëllimi drejt të cilit vrapojmë është qielli. Çmimi për të cilin ne pretendojmë është një kurorë lavdie, të cilën Gjykatësi i drejtë do të na japë në atë ditë të madhe.

Mike të dashura, nëse gjendeni në këtë garë, "vraponi në mënyrë që ta merrni." Sa pak njerëz i vënë në zemër këto gjëra të mëdha! Bota dhe çikërrimat e saj i pushtojnë aq shumë mendimet saqë Perëndia, Krishti dhe përjetësia, me përgjegjësinë tonë të madhe, veniten nga sytë tanë dhe Satani, armiku i madh i njerëzimit, ja del me të tijën nëse hiri sovran nuk ndërhyn dhe hap syrin e verbër për të parë rrezikun dhe Jezusin si ndihmë. Oh, çfarë mëshire e madhe t'i dish të gjitha këto dhe të veprosh sipas saj!

Oh, kemi të bëjmë me një Perëndi të shenjtë, që do zemrën tonë. Shpirti ynë ka më shumë vlerë se dhjetë milionë botë të tjera. "Sepse ç'përfitim ka njeriu nëse fiton gjithë botën, por humb shpirtin e vet?" Këto janë të vërteta solemne, të tmerrshme, por vetëm disa e kanë në zemër. Zoti të mundësoftë që t'ia sjellësh zemrën Atij, i Cili është i vetmi që mund ta shërojë plotësisht. Ai të drejtoftë në rrugën e duhur.

Mary Winslow