SOMA BIBLIA KILA SIKU 01/20Mfano

Inatakiwa kuifanya kazi ya Mungu bila kuwa na unafiki wowote. Na hapo Yesu anataka tupate nafasi ya kujua kwamba, tunapofunga na kuomba, silo jambo la kujionyesha kwa wengine kwamba sisi ni wacha Mungu. Kuwa Mkristo wa kweli ni ile hali ya mtu kujitambua kwamba yeye mwenyewe hawezi lolote, ila anamhitaji Mungu aliye Mtakatifu. Tukisoma Yn 4:19-24, tunaelezwa namna tunavyotakiwa kuwa na nia na mawazo yanayotuelekeza kwa Mungu anayetuwazia yaliyo mema: Yule mwanamke akamwambia, Bwana, naona ya kuwa u nabii! Baba zetu waliabudu katika mlima huu, nanyi husema ya kwamba huko Yerusalemu ni mahali patupasapo kuabudia. Yesu akamwambia, Mama, unisadiki, saa inakuja ambayo hamtamwabudu Baba katika mlima huu, wala kule Yerusalemu. Ninyi mnaabudu msichokijua; sisi tunaabudu tukijuacho; kwa kuwa wokovu watoka kwa Wayahudi. Lakini saa inakuja, nayo sasa ipo, ambayo waabuduo halisi watamwabudu Baba katika roho na kweli. Kwa maana Baba awatafuta watu kama hao wamwabudu. Mungu ni Roho, nao wamwabuduo yeye imewapasa kumwabudu katika roho na kweli.