Ang IpinangakoHalimbawa

Ang Sumisikat na Araw 

Araw-araw, ang bukang-liwayway ay dumarating at pinapalitan ng liwanag ang kadiliman. Ito ay nasasaksihan ng bawat bayan sa buong mundo. Sa isang saglit, nagtatapos ang gabi at nag-uumpisa ang umaga na puno ng bagong pag-asa at pagkakataon. 

Sa Lucas 1, umawit si Zacarias ng pagpupuri sa Panginoon para sa Kanyang kahabagan at sa kaligtasang paparating. Ang bawat salita sa awitin ay pagdakila sa katapatan ng Diyos — sa Kanyang pagtupad sa mga pangakong binitawan Niya noong sinaunang panahon pa, at sa paggawa Niya ng paraan upang tayo ay mailigtas at matubos. 

Si Juan, ang ipinangakong anak kay Zacarias at Elisabet, ang siyang maghahanda ng daan para kay Jesus. Bumuhos ang kahabagan ng Diyos at nagkaroon ng pag-asa. Maaari nang makamit ang kapatawaran at dumating na ang kaligtasan. 

Nagtapos ang awit sa pagtuon ng ating pansin sa bukang-liwayway, ang katapusan ng madilim na gabi. Ipinahayag ni Zacarias, “Magbubukang-liwayway na sa atin ang araw ng kaligtasan. Tatanglawan niya ang mga nasa kadiliman at nasa lilim ng kamatayan.” (Lucas 1:78b-79a) 

Mayroong mahabaging mensahe ang Diyos para sa buong mundo; ito ang Mabuting Balita ng Ebanghelyo! Katulad ng sumisikat na araw, si Jesus ay pumarito upang puksain ang kadiliman. Ang Liwanag ng Sanlibutan ay pumasok sa eksena at napagtagumpayan Niya ang lilim ng kamatayan.  

Ngayon ay maaari ka nang mamuhay ng walang takot. Dahil sa ginawa ni Jesus, maari kang maglingkod sa kanya nang may kabanalan at katuwiran habang ikaw ay nabubuhay (Lucas 1:74-75). Pinuksa ng Liwanag ang kadiliman at ikaw ay pinalaya. Sabay-sabay tayong “magpahayag ng mga kahanga-hangang ginawa niya. Siya ang tumawag sa inyo mula sa kadiliman patungo sa kanyang kahanga-hangang kaliwanagan.” (1 Pedro 2:9) 

Ikaw ba ay namumuhay sa takot o kalayaan? Ano ang ipinapakita sa iyo ng Diyos tungkol sa kung saan ka nakatuon, at paano mo ito babaguhin?