Kilalanin si Cristo Nang Mas Malalim Pa

Maraming tao ang hindi tama ang pagkakilala kay Cristo. Dahil sa mga maling paniniwala, tuluyan nila Siyang tinatanggihan. Ngunit marami rin ang tama ang pagkakakilala kay Cristo, ngunit nababagot sa kanilang buhay Kristiyano. Kahit na alam nilang si Jesus ay Panginoon at Tagapagligtas, madali pa rin silang naaakit ng mundo. Dinadaya sila ng kaaway at inililigaw mula sa taos-pusong paglilingkod kay Cristo. Bakit ganito?

Ito ay dahil mababaw ang kanilang pagkakakilala kay Cristo. Mababaw dahil iniisip nilang naabot na nila ang lahat ng dapat malaman tungkol kay Cristo. Tulad ng isang asawang nawawalan ng interes sa kanyang kabiyak dahil sa akalang alam na niya ang lahat tungkol sa kanya, ang isang mananampalatayang mababaw ang kaalaman tungkol kay Cristo ay darating sa puntong mababagot rin. Maghahanap siya ng mas kapanapanabik na bagay na mapag-uukulan ng pansin. Madalas ito ay tungkol sa pera o sa pagiging mayaman sa mundong ito.

Ngunit higit pa kaysa sa inaakala nating nalalaman natin ang tungkol kay Cristo. Sa pamamagitan ng mas malalim na pagkakakilala kay Cristo, kahit na hindi natin lubos na mauunawaan ang lahat tungkol sa Kanya sa buhay na ito, magkakaroon pa rin tayo ng kakayahang labanan ang pandaraya ng diyablo at ng mundong ito sa pamamagitan ng pagkakilala natin sa Kanya. Sikapin natin na makilala pa nang mas malalim si Cristo.