Maging Bukas-Palad sa Pagbibigay

Sa kabila ng kahirapan, maaari tayong maging bukas-palad dahil sa biyaya ng Diyos. Ang ganitong uri ng pagbibigay ay hindi tungkol sa halaga, kundi tungkol sa kagustuhan at kagalakan na nagmumula sa biyaya ng Diyos. Habang lumalago tayo sa pananampalataya, nawa tayo rin ay lumago sa pagiging bukas-palad sa ating pagbibigay.

Ituring natin bilang isang investment ang pagbibigay sa kaharian ng Diyos. Ang ministry natin ay patungkol sa mga tao. Nais natin matulungan sila upang maging tapat na tagasunod ni Cristo. Dahil rito, napakagandang investment ang pagbibigay sa gawain ng Panginoon. Dapat natin pagtuunan ito nang pansin at pagpaplano. Makakaasa tayo na pagpapalain tayo ng Diyos at sasagana ang ating buhay dahil ito ay ayon sa Kanyang kalooban.

Ang pagbibigay natin sa Panginoon ay dapat nagmumula sa pagkakaisa natin bilang katawan ni Cristo. Ito ay hindi sapilitan. Bagkus dapat ito'y kusang-loob. Dahil sa pag-ibig natin sa isa't isa, kailangan maging bukas-palad tayo. Sa ganitong paraan, magkakaroon ng tunay na malasakit ang bawat isa sa katawan ni Cristo.

Ito ang patotoo natin sa biyaya ng Diyos na kumikilos sa ating buhay. Marami ang magpapasalamat sa Panginoon dahil sa katapatan natin sa Kanyang salita. Sa pamamagitan ng pagiging bukas-palad, ang biyaya ng Diyos ay lalong maihahayag sa buhay natin.