Cwaan 10
10
Ciisahs ekii'aawehcikaaketc okanawimaanahcaanihshiwen
1Miitahsh kaa'ihkitotc: “Tepwewiniwan 'owe kaawiintamawinakook: awiya ekaa kaapiintikehsik e'ishi‑ishkwaantemiwaninik ahsiniiwiwaahkaayaapihkihsicikan maanahcaanihsha' kaashipiinsonitc, pahkaan itahsh kaaoncipaashitaantawetc, mii wa'a kiimoocishkiiwinini komaa omahkantwe. 2A'a tahsh ishkwaantemink kaaoncipiintiketc, mii wa'a okanawimaanahcaanihshiwe. 3Wiin kaapaahkintenamaakotc ini okanawishkwaantawen, shikwa eshipepeshikonitc e'ishinihkaasonitc otishiantomaa' wiin tipinawe omaanahcaanishima'. Onoontaakoo' itahsh kaainihtaakositc. Miihsh i'i eshisaakisi'aatc. 4Ahpii tahsh siyaakisi'aatc, aniniikaani‑ishaa. Miihsh enipiminisha'okotc omaanahcaanihshima', wiin e'nihsitohtaakotc enihtaakositc a'a kaakanawenimaatc. 5Pahkaan awiyan kaawiin owiihpiminisha'waahsiwaawaan, tapasiiwak itahsh, aaniihsh opahkaanihtawaawaan enihtaakosinitc,” kii'ihkito.
6Mii 'owe aawehcikan Ciisahs kaakii'wiintamawaatc. Kaawiin tahsh okii'nihsitohtaakohsii' wekonen kaakii'wiintamawaatc.
KaaKwayahkokanawenimaatc Maanahcaanihsha' e'ishinihkaanitisotc Ciisahs
7Miitahsh 'i miinawaa kaa'ishiwiintamawaatc Ciisahs. “Tepwewiniwan 'owe kaawiintamawinakook: niin 'iwe otishkwaantemiwaa maanahcaanihshak. 8Kahkina iki kaakiihpiayaawaatc cipwaa ayaayaan, okiimoocishkak, omahkantweshkak kiihtinowiwak. Maanahcaanihshak itahsh kaawiin okiihpisintawaahsiwaawaa'. 9Niin ishkwaantem. Kiishpin niin awiya oncipiintiketc, mii 'awe kepimaatisitc. Tapiintike miinawaa tasaaka'am. Okamihkaan itahsh keontanciketc. 10A'a tahsh okimootishk, amii ehta 'o wencipiishaatc, ewiihkimootitc, ewii'nihshiwetc, ewiihpinihshiwanaaci'iwetc kaye. Niin itahsh ninkiihpiayaa cionciayaayek pimaatisiwin, cionciwenoociayaayek itahsh kaye.
11“Niin a'a kaakwayahkokanawenimaatc omaanahcaanihshima'. A'a kwayahk kaakanawimaanahcaanihshiwetc kaawiin inkotano wanihtootc opimaatisiwin cipimaaci'aatc omaanahcaanihshima'. 12A'a tahsh kaamihcianohkiitc, ekaa kaatinowihsik ciokanawimaanahcaanihshiwewitc, ekaa wiin ehtipinawewisihsik i'i maanahcaanihsha', e'waapamaatc ma'iinkanan ehpiicipahtoonitc, amii eshitapasiitc, amii eshinakacipa'aatc i'i maanahcaanihsha'. Miihsh a'a ma'iinkan eshikaahcitinaatc i'i maanahcaanihsha' e'ompwenisha'waatc. 13'Awe kaamihtanohkiitc, mii eshimaaciipa'iwetc. Kaawiin weweni onaakatawenimaahsii', aaniihsh mihcianohkii. 14Niin tahsh kwayahk kaakanawimaanahcaanihshiwetc. Ninkihkenimaak nimaanahcaanihshimak, kaye ninkihkenimikook iki kaa‑ayaawakwaa, 15#Mat 11.27; Luk 10.22. taapishkoo kaashikihkenimitc a'a ninTete, kaye niin tahsh kaashikihkenimak ninTete. Kaye nintinentam kaawiin inkotano wanihtooyaan nimpimaatisiwin cioncipimaatisiwaatc nimaanahcaanihshimak. 16Ayaawak itahsh kotak maanahcaanihshak kaatipenimakwaa, o'omaa kaa‑ayaahsikwaa waahkaayaapihkihsicikanink kaashikanawenimintwaa maanahcaanihshak. Miiwak okoweniwak kaye ninkapiinaak, ninkapisintaakook enwewak. Maamaw itahsh tamihcipeshikwewaanakisiwak, shikwa tamihcipeshikowan ini kekanawenimikowaatc.
17“Mii 'owe wencisaaki'itc ninTete, aaniihsh nintinentam ewiihpakitinamaan nimpimaatisiwin, miinawaahsh ewiihkiiwepimaatisiyaan. 18Kaawiin awiya okakashkihtoohsiin ciotaahpinamawitc nimpimaatisiwin. Niin aaniihsh e'inentamaan iko nimpakitinaan. Nintayaan itahsh kashki'ewisiwin cipakitinamaan, shikwahsh nintayaan kashki'ewisiwin miinawaa cikiiwepimaatisiyaan. Mii 'owe kaakii'ishikanooshitc a'a ninTete citootamaan,” kii'ihkito.
19Mii miinawaa pepahkaan kii'ayinenintiwak iki Coowak, onoweniwan kaakii'ihkitonitc Ciisahsoon. 20Niipiwa' itahsh kii'ihkitowak: “Okikishkawaan maciahcaahkwan, kiiwashkweyentam!”#10.20 “Okikishkawaan maciahcaahkwan, kiiwashkweyentam”: waapantan 7.20. okii'inaawaan. “Aaniihshwiin wencipisintawek?” kii'ihkitowak.
21Kotak itahsh kaye kii'ihkitowak: “Kaawiin i'i taainihtaakosihsii awiya maciahcaahkwan kaa‑ayaawaatc! Aaniin o'o kekii'ishikashkihtoohpan maciahcaahk ciwaapi'aatc ini kaawaapihsinik?” kii'ihkitowak.
Ekii'aanawenimaawaatc Ciisahsoon
22Kiihpipoon 'iwe ahpii. Kii'wiihkwantiwahkamikisinaaniwan#10.22 Kii'wiihkwantiwahkamikisinaaniwan: mii hsa 'oweni niishwaahso kiishik kaakii'ishi nihtaa wiihkwantiwahkamikisiwaatc, inkoci ko mitaahso kii‑inakinsonitc Tisempar (December) kiisihsoon, otaanaank ekii'maamihkawiwaatc kaakiih kiiweoshihcikaatenikopanen Kihcianami'ewikamik kii ishkwaa nihshiwanaacihcikaatenikopanen. Noonkom itahsh kaakiishikahk Coowak otishikiishwewiniwaank Aanahka (Hanukkah) otishinihkaataanaawaa. itahsh i'imaa Ceroosalamink (Jerusalem), Coowak e'maamihkawinotamowaatc kaakii'onaapihkihsitoowaakopanen i'i Kihcianami'ewikamik Kishemanitoon citipentaminitc. 23Ciisahs itahsh kiihpimohse 'imaa Swaalaman (Solomon) oTapinawahkicikanink eshiwiintek Kihcianami'ewikamikonk kaakii'ayaanik. 24Coowak itahsh kiihpiwaahkaakaapawi'itiwak i'imaa eshiayaanitc ehpikakwecimaawaatc: “Aaniin minihk keyaapi kewawaanentami'iyaank? Kwayahk wiintamawihshinaam! Tepwe na kiin a'a kitaaw Kishemanitoon kaakii'onenimikotc cipimaaci'iwetc?” okii'inaawaan.
25Ciisahs okii'nahkwehtawaa': “Aasha ohsha kikii'wiintamawininim. Kaawiin tahsh kikiiwiihtepwehtawihsiim. Ini anohkiiwinan kaakiihtootamaan ninTete kaakii'ishikanooshitc, amiiwan ono kaatipaacimikoyaan ehtepwewiniwiyaan. 26Kaawiin tahsh kiwiihtepwehtawihsiim, aaniihsh kaawiin kiinawaa kitinowihsiim nimaanahcaanihshimak. 27Inashke nimaanahcaanihshimak opisintaanaawaa nintinwewin, kaye ninkihkenimaak, kaye nimpimiwiiciiwikook. 28Nimiinaak 'iwe wiihkaa keishkwaahsehsininik pimaatisiwin. Kaawiin wiihkaa tanipohsiiwak. Kaawiin awiya otaakashkihtoohsiin cimahkamitc ehkanawenimimak. 29Shikwa 'awe ninTete kaakii'miishitc nimaanahcaanihshima', mii 'awe awahshime meshkawentaakositc ahpiihc wiin kahkina kekoon, kaye kaawiin awiya okakashkihtoohsiin ciotaahpinamawaatc ninTeten ehkanawenimaanitc. 30Niin kaye ninTete mii eshipeshikwentaakosiyaank,” kii'ihkito.
31Coowak itahsh miinawaa okii'otaahpinaawaa' ahsinii' ewiihpapiimwahsina'aawaatc ewii'nihsaawaatc. 32Ciisahs itahsh okii'inaa': “Niipiwa' minoanohkiiwinan kikii'waapamim ekii'ishihcikeyaan, ninTete kaakii'miishitc ini citootamaan. Wekonehsh ono waa'oncipimwahsina'iyek?” okii'inaa'.
33Miihsh Coowak okii'inaawaan: “Kaawiin wiin minoanohkiiwinan kaawii'oncipimwahsina'ikooyan,” okii'inaawaan, “ehpaahpinotawatc ohsha Kishemanitoo wencitootaakooyan. Kiin aaniihsh e'mihci‑inininiiwiyan, ‘Niin Kishemanitoo’ kitihkit,” okii'inaawaan.
34Ciisahs okii'inaa': “Kaawiin ina inahtehsinoon 'imaa kiinawaa kitOonahshowewiniwaank,#10.34 kitOonahshowewiniwaank: Onahshowewin okii'ishinihkaataanaawaa kahkina Kehtemasina'ikanink kaakii'ishipii'ikaatenikin, memintake ko ini naanan Moosihsoon kaakii'oshipii'ikenitc masina'ikanan. Waapantan 5.46; 7.19. Kishemanitoo ekii'ihkitotc, ‘Kimanitoowim’? 35Kaawiin ohsha wiihkaa tapoonitepwewiniwansinoon 'iwe Kihcioshipii'ikewin. Ikiweniwak itahsh Kishemanitoon otihkitowinini kaa'otihsikowaatc, ‘Kimanitoowim’ kii'inaawak. 36Niin a'a Kaakii'onenimikotc ini Wetetemimintc, kayehsh a'a ekiihpiicinisha'okotc o'omaa ahkiink. Kitishim ina tahsh, ‘Kipaahpinotawaa Kishemanitoo’, i'iwe ekii'ihkitoyaan, ‘Kishemanitoo oKosihsan nintaaw’? 37Kiishpin ekaa entootansiwaanen otanohkiiwinan ninTete kaashiantawenimitc citootamaan, amii 'iwe ci‑ishinaakwahk citepwehtawihsiwek. 38Kiishpin tahsh tepwe ehtootamowaanen, aanawiin niin ehtepwehtawihsiwek, eniwehk itahsh kitaatepwehtaam ini anohkiiwinan kaatootamaan, miihsh cikehcinaa'entamek tepwe ehkikishkawitc ninTete, kaye niin itahsh ehkikishkawak,” kii'ihkito.
39Miinawaa tahsh keyaapi okiihkakwetahkonikoo'; okiihpaninikoo' itahsh.
40 #
Jhn 1.28. Ciisahs itahsh miinawaa kii'ishaa weti akaamink Cwaartanawi-siipiink (Jordan), Cwaanan (John) nihtam i'imaa kaakii'ishisiika'antaakenitc. Mii 'iweti kii'ayayaa Ciisahs. 41Niipiwa' itahsh 'imaa okiihpinaasihkaakoo', o'owehsh ekii'ihkitonitc: “Cwaan kaawiin wiin kii'maamahkaacihcikehsii. Kahkina tahsh kekoon kaakii'ishitipaacimaatc ono ininiwan kiihtepwe!” kii'ihkitowa'. 42Niipiwa' itahsh i'imaa okii'oncitepweyenimaawaan Ciisahsoon.
موجودہ انتخاب:
Cwaan 10: OJBR
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Ojibwe Shorter Bible (Roman Script) © 2008 Canadian Bible Society