Cwaan 12
12
Ciisahs ekiihpoosisitenintc minaakwa'on
(Matthew 26.6-13; Mark 14.3-9)
1Keyaapi ninkotwaahsokon cipwaa maatahkamikaninik Pimaaci'ikoowi Wiihkwantiwin, kii'ishaa Ciisahs i'imaa Pehtaniink (Bethany) i'imaa kaa'ishitaanitc Laasarahsan (Lazarus), miiwan ini kaakiihkiiwepimaatisi'aatc kaakii'niponitc. 2'Imaa kii'oshiihtamawaa wiihsiniwin ewii'maamawiwiihsiniwaatc. Miihsh 'imaa Maarhta (Martha) kiihpami'iwe. Laasarahs itahsh amii 'awe peshik kaakii'wiiciwiihsiniimaatc ini Ciisahsoon. 3#Luk 7.37-38. A'a tahsh Meri (Mary) okiihpiotaahpinaan peshikokosikwan minaakwa'on, naart (nard) e'ishinihkaatenik, mii ehta ko 'i kaatinowaakamik, aahpici ekii'aahkwakintenik. Okiihsiikinamawaan tahsh ositiniink ini Ciisahsoon. Kayehsh okiihkaahsiisite'waan wiinisihsan ekii'aapacihtootc. Miihsh kiihtepimaakwan misiwe 'imaa waahkaa'ikanink i'i minaakwa'on. 4Peshik itahsh 'imaa kii'ayaawan Ciisahs okihkino'amawaakanan, Cootahs Iskeriyat (Judas Iscariot), miiwan itahsh ini keishihcikenitc citahkonikaniwitc a'a Ciisahs. Mii 'awe Cootahs kii'oncikiikito: 5“Wekonen tahsh wenciataawaakaaniwansinok o'o minaakwa'on?” kii'ihkito. “Nihswaahk (300) ohsha minihk taakii'ishihsewak waapaapihko-shooniyaanhsak!#12.5 Nihswaahk waapaapihko shooniyaanhsak: mii 'iwe minihk awiya kaa'ontisitc mitaahso kiisihs kiikihtikewanohkiitc. Nawac cikiimiinintwaapan iki ketimaakisiwaatc,” kii'ihkito. 6O'owe tahsh kaa'ihkitotc, kaawiin okii'naakatawenimaahsii' i'i ketimaakisinitc, aaniihsh kiihkimootishki, aaniihsh wiin okiihkanawentaan i'i oshooniyaawashiwaa. Wiin iko 'imaa kii'anioncikimooti ini shooniyaan.
7Ciisahs itahsh kii'ihkito: “Poonimihk! Mii 'iwe citashikanawentank kaa‑ayaatc a'a ihkwe onci ahpii kiishikahk na'inikooyaan. 8Mooshak kiwiiciiwikowaak iki ketimaakisiwaatc. Kaawiin tahsh niin mooshak o'omaa kikawaapamihsiim,” kii'ihkito.
Kihcianami'ewikimaak ekiiwii'nihsaawaatc Laasarahsan
9Niipiwa' itahsh iki Coowak kii'oncinoontamook i'imaa e'ayaanitc Ciisahsoon. Kiihpi‑ishaawak itahsh kaawiin ehta piko ini Ciisahsoon ciwaapamaawaatc, tako piko ini Laasarahsan (Lazarus) ewii'waapamaawaatc, kaakiihkiiwepimaatisi'aatc Ciisahs nipowinink onci. 10Miitahsh 'iwe Kihcianami'ewikimaak ekii'onenimaawaatc Laasarahsan kewiin cinihsaawaatc. 11Aaniihsh kiihpaahtiinowak iki Coowak ekii'aanawenimaawaatc kihcianami'ewikimaa', miitahsh meshkwac kaa'ishimaaciitepweyenimaawaatc Ciisahsoon.
Awiyak okii'ishpenimaawaan Ciisahsoon kaapitakwihshininitc i'imaa Ceroosalamink
(Matthew 21.1-11; Mark 11.1-11; Luke 19.28-40)
12Eniwaapaninik itahsh niipiwa' ekiihpitakwihshinowaatc ewii'ishiciihkahkamikisiwaatc Pimaaci'ikoowi Wiihkwantiwinink, kii'noontamook Ciisahsoon i'imaa e'anitakwihshininitc Ceroosalamink (Jerusalem). 13Okii'otaahpinaanaawaan itahsh ini watihkwanan, a'a paam (palm) tinowaahtikonk ekii'ontinamowaatc, ekii'ani ishikikimaacaawaatc ootenaank onci, ewii'antanakishkawaawaatc ini Ciisahsoon, ekii'ani ishishaahshaakowewaatc: “Hosaana! Nanaahkom Kishemanitoo! Kishemanitoon okashawenimikoon 'awe kaapitakwihshink kaaTipencikenitc owiinsowininiink, Isriyala' (Israel) keokimaahkantawaatc!” kii'ishishaakowewak.
14Ciisahs itahsh okii'mihkawaan oshki maashimihtatimoonhsan. Kiihpimitehsapi tahsh. Mii 'iwe kaaishipii'ikaatek kihcioshipii'ikewin:
15 #
Zech 9.9. “Keko kekoon kohtankek kiinawaa Saayan (Zion) kaaotootenaamiyek!#12.15 Kiinawaa Saayan kaaotootenawiyek: mii 'iwe peshikwan kaaicikaatek, Kiinawaa Ceroosalam (Jerusalem) kaaotootenawiyek.
Waapamihk kiKihciokimaamiwaa ehpitakwihshink, ehpimitehsapitc ini oshki maashimihtatimoonhsan.”
16Kaawiin 'iwe ahpii okii'ishinihsitawinansiini okihkino'amawaakana'. Paanimaa kiikiiwepimaatisitc kiiompishkaa'intc otishpentaakosiwinink, ekwa' kii'maamihkawiwa' mii 'owe e'ishipii'ikaatenik ehtipaacimintc, kayehsh ono ekii'ayintootawintc.
17Okoweniwak kaakii'wiiciiwaawaatc Ciisahsoon ahpii kaakii'antomaanitc Laasarahsan (Lazarus) i'imaa ciipekamikonk cipisaaka'aminitc ekiihkiiwepimaatisi'aanitc nipowinink onci, aasha okiihtipaacimaawaan i'i kaakii'ishihcikenitc. 18Mii 'owe kaakii'onciantanakishkawaawaatc kaapaahtiinowaatc, ekii'noontamowaatc i'i kaakiihtootaminitc i'iwe ekii'maamahkaacihcikenitc. 19Miitahsh Perahsiwak kaa'onci‑ishikanoonitiwaatc: “Ina! Kaawiin kekoon kikashkihtoohsiimin! Inashke aasha kahkina awiya ahkiink opiminisha'okoo'!”
Kariihkak ekiihpiantawaapamaawaatc Ciisahsoon
20Aaninta tahsh kiihtakoayaawak i'imaa Kariihkak#12.20 Kariihkak, miiwak hsa oko aaninta kaakiih Coowiwihsikwaa, kaakiihpiminisha'amowaatc Coowa' kaakii'ishianami'aanitc inahke. (Greeks) ekiihpiwiiciiwaawaatc i'i kaapitakwihshininitc 'imaa Ceroosalamink (Jerusalem) ehpianta‑anami'aanitc mekwaa e'wiihkwantiwahkamikisinaaniwank. 21Okoweniwak itahsh okii'awikanoonaawaan ini Pilapoon (Philip), miiwan ono Pehseta (Bethsaida) Kaalaliink (Galilee) i'imaa kaa'onciinitc. “Taka niwii'waapamaanaan a'a Ciisahs,” okii'inaawaan.
22Pilap itahsh okii'awiwiintamawaan Entaroon (Andrew), eshiniishiwaatc itahsh ekii'awiwiintamawaawaatc ini Ciisahsoon. 23Ciisahs okii'nahkwehtawaa': “Aasha hsa ocihcihse 'i ahpii Inini oKosihsan cimiinimintc otishpentaakosiwinini. 24Tepwewiniwan 'owe kaawiintamawinakook: peshikomin pahkweshikani‑kihtikaanenhs pakitinikaatek, ninkwa'ikaatek ahkiink taapishkoo kaanipotc awiya, niipiwa' tanihtaawikihcikemakan. Kiishpin itahsh ishinipoomakahsinok, tamihcipapeshikoayaa. 25#Mat 10.39; 16.25; Mrk 8.35; Luk 9.24; 17.33. Shikwa 'awe kaakihciwinamaasotc opimaatisiwin, okawanihtoon. A'a tahsh kaapakitinamaaketc opimaatisiwin 'omaa ahkiink, okaishikanawentaan pishihshik cipimaatisitc. 26Kiishpin awiya piko inentank cipami'itc, maano cipiminisha'otc. Iweti tahsh keishiayaawak, miihsh weti kaye wiin keayaatc a'a kaapami'itc. Awenen itahsh iko kewiihpami'itc, amiitahsh a'awe kekihci‑inentaakosi'ikotc ninTeten.”
Ciisahs e'niikaaniwiintank ewii'nihsintc
27“Noonkom iko nimikoshkaatentam,” kii'ihkito. “Aaniin itahsh keihkitoyaan? ‘NinTete,’ inahsh ninkainaa, ‘pimaaci'ihshin ekaa ciotihtansiwaan 'owe kaawii'ishihsek noonkom’? Amiihsh 'owe onci kaahpioncipiishaayaan cishaaposhkamaan 'owe waa'ishiwepisiyaan. 28NinTete, maano kihci‑inentaakohtoon kiwiinsowin!” kii'ihkito.
Miihsh kihcikiishikonk kii'oncinoontaakwan inihtaakosiwin: “Aasha ninkiihkihci‑inentaakohtoon, miinawaahsh ninkaishihcike cikihci‑inentaakohtooyaan,” kii'inwemakan.
29Iki piyaahtiinowaatc i'imaa kaakii'niipawiwaatc okii'noontaanaawaa 'iwe inihtaakosiwin. Miihsh, “Intiko naa kiihpinehsihkaa,” kii'ihkitowak aaninta. Kotak itahsh kaye, “Encalan okiihkanoonikoon,” kii'ihkitowak.
30Ciisahs itahsh okii'inaa': “'Owe inihtaakosiwin kaawiin niin onci ciwiici'ikoyaan kii'ishinoontaakwahsinoon. Kiinawaa ohsha kii'oncikiikito kekoon cikihkentamek. 31Noonkom o'o ishihse Kishemanitoo ciwiintank keshitipaahkonimintc 'omaa ahkiink kaa‑ayaanitc. Amiihsh i'i noonkom cimaaciiyaamohkaanimintc iniweniwan kaaokimaahkantaminitc o'o ahkiini,#12.31 kaaokimaahkantaminitc o'o ahkiini, mii 'awe kaainintc maciaya'aa kaatipentank macikekoonan. ciokimaahkantansinik. 32Niin itahsh ahpii ahkiink onciompinikooyaan,#12.32 ahkiink onciompinikooyaan: waapantan 3.14. kahkina entahswewaanakisiwaatc pemaatisiwaatc ninkawiihkoshkaa'aak cinaasihkawiwaatc.” 33Mii 'owe kaa'ihkitotc cikihkencikaatek keishinaakwaninik onihsikoowin.
34 #
Psa 110.4; Isa 9.6; Dan 7.14. Miihsh 'owe kaa'ihkitowaatc iki kaapaahtiinowaatc: “Ninkii'noontaamin kitOonahshowewininaanink#12.34 kitOonahshowewininaanink: waapantan 10.34. ehtipaacimimintc ini Kishemanitoo kaakii'onenimaatc cipimaaci'iwenitc, pishihshik tapimaatisiwan e'ihkitoomakahk. Wekonen tahsh wenci‑ihkitoyan, Inini oKosihsan ciompinikaniwinitc? Awenen tahsh a'a Inini oKosihsan?” kii'ihkitowak.
35Ciisahs itahsh okii'inaa': “Keyaapi acina kiwiiciiwikonaawaa 'i waahseyaa. Ishipimohsek keyaapi eshkwaa‑ayaayek i'i waahseyaa, ekaa cinoontetipihkihshinsiwek. 'Awe hsa kashkiitipihkanonk kaapimohsetc, kaawiin onihsitawinansiin aanti eshaatc. 36Mekwaa tahsh keyaapi e'ayaayek i'i waahseyaa, tepweyentamohk i'i waahseyaa. Miitahsh i'iwe ketinowiyek i'imaa cioncitipentaakosiyek waahseyaank,” okii'inaa'.
Ekiiwiihtepweyenimaahsikwaa Ciisahsoon
'Owehsh kaa'ishkwaawiintank Ciisahs, inkoci ko 'imaa kii'ani‑ishaa ekiihkaasoohtawaatc cimihkaakohsik. 37Aanawiin aasha niipiwa' omaamahkaacihcikewinan ekii'ayintootank ehkanawaapamikotc, kaawiin shaakooc okiihtepweyenimikohsii' aanakii'waapamikotc. 38#Isa 53.1. Mii 'owe cioncitipihsek i'i kaakii'ihkitohpan Aaiseya (Isaiah) Kishemanitoo otipaacimowininiiman:
“Tepencikeyan, awenen kaatepwehtank nintipaacimowininaan?
Awenenan kaakiih kihkentamoonaatc kaaTipenciketc omashkawisiiwin ciwaapantaminitc?”
39Mii 'owe ekaa kaakii'oncikashkihtoohsikwaa citepweyentamowaatc, aaniihsh miinawaa pahkaanonk kii'ihkito Aaiseya:
40 #
Isa 6.10. “Kishemanitoo okii'ishicike'aa' ekaa ciwaapihsinik kayehsh okii'mashkawite'e'aa',
ekaa ciwaapantansikwaa oshkiinshikowaank,
ekaa cioncinihsitohtansikwaa onaakatawentamowiniwaank.
Ninkii'ishihcike'aak ciwiihpikwehkiinotawihsikwaa.
Nintaakii'minoayaa'aak itahsh ishihcikewaahpan, ihkito Kishemanitoo.”
41Miihsh 'owe kaakii'onci‑ihkitotc Aaiseya, 'iwe kaakii'niikaaniwaapantamawaatc Ciisahsoon okihci‑inentaakosiwinini, miihsh ini kaakiihtipaacimaatc. 42Eniwehk itahsh niipiwa' iki kaakii'niikaanakinsowaatc okiihtepweyenimaawaan Ciisahsoon. Perahsii' (Pharisees) itahsh ekiihkohsaawaatc, kaawiin okii'onci mohshe wiintansiinaawaa ekiihtepweyenimaawaatc, ekiihkohtaaciwaatc cioncisaakiciwepinikaniwiwaatc i'imaa anami'ewikamikonk.#12.42 cioncisaakiciwepinikaniwiwaatc i'imaa anami'ewikamikonk: waapantan 9.22. 43Awahshime aaniihsh okiihsaakihtoonaawaa e'mihciminwaacimikowaatc ininiwa', ahpiihc itahsh wiin Kishemanitoon cikihtakimikowaahpan.
A'a tiyepweyentansik okatipaahkonikonan Ciisahsoon otihkitowinini
44Ciisahs itahsh kiihkishiiwe e'ihkitotc: “A'a kaatepweyenimitc, kaawiin niin ehta nintepweyenimikohsii, ini hsa mayaa kaakiihpi‑ishinisha'onitc. 45Awenen itahsh iko wiyaapamitc owaapamaan kaye ini kaapiicinisha'onitc. 46Niin nintinow ciwaahseshkawakwaa ahkiink kaa‑ayaawaatc. Miitahsh piko awiya kaatepweyenimitc ekaa keyaapi i'imaa tipihkanonk ciayaahsik. 47Kiishpin awiya noontank nitipaacimowin, ekaa tahsh kanawentansik, kaawiin niin ninkatipaahkonaahsii. Kaawiin nimpioncipi‑ishaahsii cionaahkonakwaa iki ahkiink pemaatisiwaatc, cipimaaci'akwaa tahsh. 48A'a tahsh kaa‑aanawenimitc, ekaa kaye otaahpinansik nintipaacimowin, ayaawan peshik keonaahkonikotc. Onowe nintihkitowinan kaakii'wiintamaan, mii 'oweni ketipaahkonikotc ishkwaac kiishikahk. 49Kaawiin niin kaainentamaan ninkii'oncikiikitohsii. A'awe hsa wiin ninTete kaakiihpi‑ishinisha'otc, wiin ninkiihkihkino'amaak keayihkitoyaan, kayehsh ketashintamaan. 50Ninkihkentamowaan i'iwe otinahshowewinink e'onciimakaninik pimaatisiwin keishkwaahsehsininik. Mii hsa ko mayaa eshikiishweyaan a'a ninTete kaakii'ishitc ciayihkitoyaan.”
موجودہ انتخاب:
Cwaan 12: OJBR
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Ojibwe Shorter Bible (Roman Script) © 2008 Canadian Bible Society