Jon 1
1
Vehuran non God
1Envawonan luhluhmwi, entorah uruu tei tebulong ngama, ba Vehuran non God tedok. Vehuran nanong tedok ben God, bi tei tedapmak God. 2Envanwonan luhluhmwi ba Vehuran nanong tedok ben God. 3Tei li Vehuran nanong ba God teleli leut sera, apma bwaleh tebulong li uruu niah tebasok tenga masen lelnan. 4Vehuran nanong ba non masan tei tedok, bi masan nanong ba teskani hee mini tarutni. 5Tei hee vale wulmet bi wulmet teba van lilwi tenga.
6God tesro non atan kasoso, aji tei han ah Jon. 7Tepma van top sereserenan hee mini tarutni. Tepma nem bep renren ini mini ni metan goah ni sera rabat rongo vepnan bi nem bihni mwetaknga nan. 8Jon ba tei tebaite ni hee nga, ba tepma nuhu bat seresere hee. 9Vehuran nanong ba tei mamjin hee nananong, niah tesipma li uruu bi bil bahka tarutni.
10Vehuran nanong tedok li uruu tei li ni ba God te leli ut li uruu. Tei nan nga ba tarut at li uruu rat leklegini. 11Te sipma bamulma vali vinnan, ba nan nga ba tarut at li vinnan rat ba lep gogo tenga. 12Datngin rat lep gogo bi rat vihni mwetaknga nan, bi teskani woswosan mini ni, nuhu ran gamui ni nujun God. 13Rat wo mwetak. Rat ba wo mwetak tenga nokon aji havin li tonian non aji dalma. Ba God ma niah bibi Tema.
14Vehuran nanong tegamu dok i aji mwetak bi tedok sosok masede. Tat kita non meresan, gonani tewewe lip i kabisan bi mwetaknga. Non meresan niah teskak mini, gonani tei ni nante niah tei Teman ah God.
15Jon tedoptop renren nokon. Te ngarini nuhu, “Aji naah niah nat toptop nokon entoran nat vep nuhu, ‘Aji ah mapma jukuk ba kawu ngate sasviri nana, u gonani tedok bawo ba nana nam ga bo.’ ”
16Tevagabis i kidi i non kabisan niah tei tewewe lip. Bi teskani kabisan halkawu lengleng mini kidi. 17God teskani Temwat mini gema li Moses ba kabisan bi mwetaknga ba tepma li Jisas Kraes. 18Aji tebado gitate God nga, Nujun nante niah tedapmak God niah mondok ben Teman niah teleli ba tam mwalilngi.
Toptowan non Jon Baptaes
19Toptowan nahe niah Jon teskani i walu nan dalen Jius ni niah rat tesro ajinan uman le valin God bi Livae dini ut Jerusalem nuhu ram mapma neuhleli ini nuhu, “Ani kik itan?” 20Jon tei teba bwe tenga Iin ba tei tevep seresere nuhu, “Nana ba nat baite Kraes nga.” 21Ra bep mini nuhu ba mwe gai kik itan, “Kik Elaeja?” Ba bep nuhu, “Tebaite nana Elaeja nga.” Ram uhleli ini nuhu, “Ba kik itan, kik Ajinan Dalen God?” Ba balu ini bep nuhu, “Tebu.” 22Rabep mini nuhu, “Ba kik itan? Ko vep mini gema matan goah kaman mul bi ne bamula walunan mini goah rat tesro gema.” 23Jon balu ini bep nuhu, “Nana naah niah Aesea, ajinan dalen God, tevep mwate nuhu, ‘Aji man ngaa dobo li vini tebu man bep nuhu, Karu lel bowos i halan Subu.’ ”
24Ajini nong ba aji nan goah rat wuhu Temwat ni rat tesro ni. 25Ram uhleli i Jon nuhu, “Tigoah man baite kik Kraes nga, io Elaeja, io Ajinan Dalen God ba mwegai u apma nagoah kom lehvi tarutni?” 26Jon balu ini bep nuhu, “Nam lehvi gimi nge i sileng, ba aji mwidi rei gimi nanong ah kat baililngi nga. 27Mapma jukuk, ba nat ba dokoi tenga nuhu nan dukte kaen non sandel.”
28Leut ni nong tekap dobo li vini ah Betane almaun sileng ah Jodan ut ah Jon telehvi tarutni dobo iginan.
Malu Sipsip bilan God
29Tei le ren go ba Jon mwigita goah Jisas mapma ben bi bep nuhu, “Karu gita, Malu Sipsip na bilan God ahe niah man lep gabrani kapmwaan non tarut at li uruu. 30Aji naah niah nat toptop nokon entorah nat vep nuhu, ‘Aji ah mapma jukuk ba ni aji kawu ngate sasviri nana, gonani tedok bawo ba nana namga bo.’ 31Nat leklegini rada ngama ini. Ba nat tepma bi nam lehvi tarutni le sileng metan goah tarut at Isrel rabateililngi.”
32Toptowan naah niah Jon teskani, tevep nuhu, “Nat kita Tabite Kokon tesipma tavan tekeni mwaki dini ut mere lebini bi mwesadok lin. 33Nat leklegini rada ngama ini, ba God niah tesro nana nuhu nan lehvi tarutni le sileng ba tevep mini nana nuhu, ‘Kon gita aji ah Tabite Kokon man sipma nesadok lin ba aji nananong niah man lehvi tarutni i Tabite Kokon.’ 34Nat kita aji nanong bi nabeb mini gimi nuhu, ni nananong niah bi ni Nujun God.”
Vawonan goah rat tahkuru Jisas
35Tei le ren go ba Jon tedi mwetak iginan mini datngin non tarut nuru karu. 36Entorah tekita goah Jisas tehural daras ban bi bep nuhu, “Karugita Malu Sipsip na bilan God i ban nong.” 37Entorah tarut non Jon ah nuru karu ratru rongo goah tevep tedapmak bi ramru ban nedakuru Jisas. 38Jisas tekit bukak ba mwigita goah ramru ban jukun bi muhleli i nuru nuhu, “Kamuru dongvi apma?” Ba ramru bep mini nuhu, “Komdok ibeh, Rabae?” Meramnan nuhu “Sesesrakan”. 39Jiasas balu ini bep nuhu, “Ka rupma negita.” Bi ramru ban negita ut ah tedok iginan, bi ramru di dobo bi ut bung. Tei sasari kilok kavet ut tebwarek.
40Karuan aji ah terongo Jon bi mwedahkuru Jisas ba tei Andru niah kisan Saemon Pita. 41Tei vilbwaleh ba Andru butdihi kisan ah Saemon, bep mini nuhu, “Kamat wutdihi Mesaea.” Meramnan nuhu “Kraes”. 42Mwatkae Saemon mapma ben Jisas. Jisas tekita bi bep mini nuhu, “Kik Saemon niah nujun Jon. Man gamui ham ah Sipas.” Ih nong ba tekeni Pita nge. Meramnan nuhu “Vetok”.
Jisas tehu Pilip nuru Nataniel
43Tei le ren go ba Jisas bihni nuhu nema van Galili tevan iginan ba butdihi Pilip. Jisas bep mini nuhu, “Ko dahkuru nana.” 44Pilip nong ba tei vinnan ah Betsaeda ut ah Andru nuru Pita ratru dok iginan. 45Pilip ban butdihi Nataniel, bi bep mini nuhu, “Kamat wutdihi aji te ah Moses teulu toptopnan le buk nan Temwat, bi niah ajinan dalen God rat teulu toptopnan. Ni aji at Nasaret, teman ah Josep, bi han ah Jisas.” 46Nataniel muhleli ini nuhu, “Te apma tekabis mapma tete Nasaret?” Pilip balu ubu bep nuhu, “Kopma negita.”
47Entorah Jisas tekita Nataniel ah tepma ben bi modoptop nokon bep nuhu, “Mamjin at Isrel naahe niah keketan tebulong lelen.” 48Nataniel muhleli ini nuhu, “Kom maililngi gavak i nana?” Ba Jisas balu ini bep nuhu, “Nat kita kik nge entorah kot sadok dobo van bujun fig, bawo ba Pilip mwega hu kik.” 49Nataniel balu ini bep nuhu, “Sesesrakan, kik naah niah kobi Nujun God bi kobi Subu nan Isrelni.” 50Jisas bep mini nuhu, “Ko bihni mwetaknganan nge gonani nambep mini kik nuhu, ‘Nat kita kik nge entorah kot sadok dobo van bujun fig’? Kon gita apma kawu ngate vali goi kot kita nong.” 51Jisas bep mini nuhu, “Mwetaknga letlet nam bep mini gimi, kan gita goah ut le bini man nemlang bi enjil non God ran sak bi nesipmadi bek, niah nambi Nujun Aji.”
موجودہ انتخاب:
Jon 1: APMA
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Published by the Bible Society of the South Pacific in 1977.