Luka 18
18
Yalɔyo ɔ kɛ kojolɔ ɔ he abɛ
1Jehanɛ ɔ, Yesu kɛ mɛ tu munyu ngɛ abɛ gbi mi kɛ tsɔɔ kaa e sa kaa a sɔle daa nɛ a kɔni mi kó wo nyu. 2E ke, “Kojolɔ ko hi ma ko mi; e yi Mawu gbeye ɔ, e bui adesa hulɔ. 3Yalɔyo ko hu hi jamɛ a ma a mi. Ke pee ɔ, yalɔyo ɔ baa kojolɔ ɔ ngɔ ba deɔ lɛ ke, ‘Nɔ ko ye mi amimi; i kpa mo pɛɛ nɛ o ye dami sane ha mi.’ 4Kojolɔ ɔ pee we nɔ́ ko nɔ́ ko ngɛ sane ɔ he hluu kɛ ya su be ko. Kɛkɛ nɛ e de ngɛ e yi mi ke, ‘E ngɛ mi kaa i yi Mawu gbeye, nɛ i bui adesa hulɔ, 5se akɛnɛ yalɔyo nɛ ɔ ngɛ ye nya dooe he je ɔ, ma hyɛ nɛ a ye dami sane ha lɛ. Ke i pee we ja a, e maa hi ye ngɔ bae kpamisa, nɛ e be hae nɛ ma na tue mi jɔmi.’ ”
6Nyɔmtsɛ ɔ ya nɔ de ke, “Tse nyɛ nu nɔ́ nɛ kojolɔ yi si fialɔ ɔ de ɔ? 7Yoo, lɛɛ nihi nɛ Mawu nitsɛ hla a, ke a fa kue ha lɛ nyɔ kɛ pia a, anɛ e be mɛɛ a sane yee ha mɛ lo? Anɛ e maa to tsle hluu loko e ma ba piɛ a he lo? 8Dɛbi, i ngɛ nyɛ dee ke, e maa ye a sane ɔ ha mɛ nɔuu. Se ke Nɔmlɔ Bi ɔ kpale kɛ ba a, anɛ e ma ba na nihi ngɛ je ɔ mi nɛ ngɛ hemi kɛ yemi lo?”
Farisi no ɔ kɛ tó tsulɔ ɔ he abɛ
9Jehanɛ ɔ, nihi nɛ buu a he dali, nɛ a gbee ni kpahi a he guɛ ɔ, Yesu tu munyu ngɛ abɛ gbi kɛ tsɔɔ mɛ. E ke, 10“Ligbi ko ɔ, ni enyɔ ya sɔlemi we ɔ nɛ a ya sɔle; nɔ kake ɔ, Farisi no ji lɛ, nɛ nɔ kake lɛɛ tó tsulɔ.
11“Farisi no ɔ ya da si ngɛ he ko banee, nɛ e sɔle ke, ‘Mawu, i naa mo si kaa i pee we jiklɔɔ; i sisi we nɔ, nɛ i puɛ we gba kaa bɔ nɛ ni komɛ peeɔ ɔ. I naa mo si ekohu kaa i be kaa tó tsulɔ nɛ ɔ hulɔ. 12I haa hwɔ si enyɔ ngɛ otsi mi, nɛ i haa mo níhi tsuo nɛ i naa a mi dlami nyɔngmanyɔngma mi kakaaka.’
13“Se tó tsulɔ ɔ ya da si ngɛ se lokoo, nɛ e yi nɔ tete po e wo we kɛ yɛ hiɔwe; mohu ɔ, e gbe e gugue#18.13 Gugue gbemi tsɔɔ he piami kɛ tsui tsakemi. nɛ e de ke, ‘Mawu, yayami peelɔ ji mi; naa mi mɔbɔ!’ 14#Mat 23.12; Luk 14.11 I ngɛ nyɛ dee ke, nyumu nɛ ɔ kpale e se kɛ ho we mi ya kaa nɔ nɛ pee nɔ́ nɛ sa Mawu hɛ mi pe Farisi no ɔ. Ejakaa nɔ tsuaa nɔ nɛ woɔ e he nɔ ɔ, a maa ba lɛ si; se nɔ nɛ baa e he si ɔ, a ma wo e nɔ.”
Yesu gbaa jokuɛ tsɔwi
(Mateo 19.13-15; Marko 10.13-16)
15Ni komɛ hu ngɔ bimwɔwi kɛ ba Yesu ngɔ, konɛ e ta a he. Benɛ kaseli ɔmɛ na a, a kuɛ wo ni ɔmɛ. 16Se Yesu tsɛ jokuɛwi ɔmɛ kɛ ba e ngɔ, nɛ e de ke, “Nyɛ ha nɛ jokuɛwi ɔmɛ nɛ a ba ye ngɔ; nyɛ ko tsi mɛ blɔ, ejakaa nihi nɛ ngɛ kaa ni nɛ ɔmɛ a nɔ́ ji Mawu matsɛ yemi ɔ nɛ. 17Niinɛ, i ngɛ nyɛ dee ke, nɔ tsuaa nɔ nɛ he we Mawu matsɛ yemi ɔ kaa jokuɛ nyafii ɔ, e be mi sɛe kulaa.”
Nyumu niatsɛ ɔ
(Mateo 19.16-30; Marko 10.17-31)
18Yuda ma hɛ mi nyɛɛlɔ ko ba bi Yesu ke, “Tsɔɔlɔ kpakpa, kɛ ma pee kɛɛ nɛ ma na neneene wami?”
19Yesu de lɛ ke, “Mɛni he je nɛ o ngɛ mi tsɛe ke nɔ kpakpa a? Nɔ ko nɔ ko be nɛ hi; Mawu pɛ ji nɔ kpakpa. 20#Mose II, 20.12-16; Mose V, 5.16-20 Tse o le mlaa amɛ nɛ deɔ ke, ‘Ko puɛ gba; koo gbe nɔmlɔ; koo ju; koo ye lakpa odase; bu o tsɛ, kɛ o nyɛ’ ɔ.”
21Nyumu ɔ he nɔ ke, “I ye mlaa nɛ ɔmɛ tsuo a nɔ kɛ je ye jokuɛwi a si.”
22Benɛ Yesu nu enɛ ɔ, e de lɛ ke, “E pa piɛ mo nɔ́ kake. Yaa jua níhi tsuo nɛ o ngɛ ɔ, nɛ o dla sika a ngɔ ha ohiatsɛmɛ, nɛ o ma na juetli ngɛ hiɔwe. Lɔ ɔ se ɔ, ba nɛ o ba nyɛɛ ye se.” 23Se benɛ nyumu ɔ nu enɛ ɔ, nu lɛ, ejakaa e ngɛ ní babauu.
24Yesu hyɛ lɛ too, nɛ e de ke, “Hyɛ bɔ nɛ e wa ha niatsɛmɛ kaa a maa sɛ Mawu matsɛ yemi ɔ mi! 25E wa ha niatsɛ kaa e maa sɛ Mawu matsɛ yemi ɔ mi kulaa pe bɔ nɛ e wa ha afukpɔngɔ kaa e maa gu abui puɔ mi.”
26Nihi nɛ nu enɛ ɔ bi ke, “Lɛɛ mɛnɔ yi wami nɛ a ma nyɛ he mɔ?”
27Yesu he nɔ ke, “Nɔ́ nɛ adesa nyɛ we peemi ɔ, Mawu lɛɛ e nyɛɔ peeɔ.”
28Kɛkɛ nɛ Petro de ke, “Nyɔmtsɛ, wɔɔ lɛɛ wa si wa nɔ́ tsuaa nɔ́, nɛ wa ba pee o se nyɛɛli.”
29Yesu de mɛ ke, “Niinɛ, i ngɛ nyɛ dee ke, nɔ tsuaa nɔ nɛ ma si e we, loo e yo, loo e nyɛminyumuhi, loo e nyɛmiyihi, loo e bimɛ, nɛ́ e ba pee Mawu matsɛ yemi ɔ mi no ɔ, 30Mawu ma ha lɛ ní babauu ngɛ je nɛ ɔ mi; je nɛ maa ba a mi hu, e ma na neneene wami.”
Yesu tu e gbenɔ he munyu si etɛne
(Mateo 20.17-19; Marko 10.32-34)
31Yesu tsɛ ni nyɔngma kɛ enyɔ ɔmɛ kɛ ba se, nɛ e de mɛ ke, “Nyɛ ngɛ tue bue! Wa yaa Yerusalem, nɛ lejɛ ɔ lɛ níhi tsuo nɛ gbali ɔmɛ ngma ngɛ Nɔmlɔ Bi ɔ he ɔ maa ba mi ngɛ. 32A maa ngɔ lɛ ngɔ wo ma je li a dɛ mi; ma je li ɔmɛ maa ye e he fɛu, nɛ a ma jɛ lɛ, nɛ a maa la lada ngɔ pue e nɔ. 33A maa fia lɛ kpa, nɛ a maa gbe lɛ. Se ligbi etɛ se ɔ, e maa te si kɛ ba wami mi ekohu.”
34Se kaseli ɔmɛ nui ní nɛ ɔmɛ ekoeko sisi; a ngɔ munyu ɔmɛ a sisi numi ngɔ laa mɛ, nɛ nɔ́ nɛ Yesu ngɛ dee ɔ, a kɔ we se.
Yesu tsa hɛ yuyuilɔ nɔ́ balɔ ko
(Mateo 20.29-34; Marko 10.46-52)
35Benɛ Yesu su Yeriko ta a, hɛ yuyuilɔ ko hii si ngɛ blɔ ɔ he ngɛ nɔ́ bae. 36Benɛ e nu nihi babauu a he nɛ a bee ɔ, e bi ke, “Mɛni ba?”
37A de lɛ ke, “Yesu nɛ je Nazaret ɔ lɛ bee.”
38Kɛkɛ nɛ e kpa ngmlaa, nɛ e de ke, “Yesu! David bi! Naa mi mɔbɔ!”
39Nihi nɛ nyɛɛ hɛ mi ɔ ke e yi, nɛ a de lɛ ke e ma e nya. Se e kɛ ngmlaa nɛ nya wa pe kekle ɔ mohu de ke, “David bi lee! Naa mi mɔbɔ oo, naa mi mɔbɔ!”
40Lɔ ɔ he ɔ, Yesu da si, nɛ e fa ke a kɛ lɛ nɛ ba e ngɔ. Benɛ e ba a, Yesu bi lɛ ke, 41“Mɛni o ngɛ hlae nɛ ma pee ha mo?”
E he nɔ ke, “Nyɔmtsɛ, ha nɛ ma hyɛ nɔ ekohu.”
42Yesu de lɛ ke, “Moo hyɛ nɔ́! O hemi kɛ yemi tsa mo.”
43Amlɔ ɔ nɔuu ɔ, e bɔni nɔ́ hyɛmi, nɛ e nyɛɛ Yesu se, nɛ e ngɛ Mawu yi jee. Benɛ nimli kpekpemi ɔ na nɔ́ nɛ ba a, mɛ tsuo a je Mawu yi.
Àwon tá yàn lọ́wọ́lọ́wọ́ báyìí:
Luka 18: Dangme
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Bible in Dangme © Bible Society of Ghana, 2018.