Jɔnə 6
6
Yeso á Zə́g Pɨ Tɔsə Tênə
(Mat 14.13-21; Mag 6.30-44; Luk 9.10-17)
1Ndzaŋə ándó Yeso a nə məgtə̂ nə́ mə́ tsáb nə́ lə́, ńtú nkǐ ńgɛnə̂ á ndzɛnə́ Əfooghɨ Galili páʼ pə́ nə́ fóŋ nə́ nə́ Əfooghɨ Tibelyasə. 2Apoŋə pəənə a zoŋə̂ yí ńté ńgə́ pó nə ńdzɨ́ əkyeʼmə́nu páʼ a nə ńgɛd nə́ á mbô pɨ páʼ pó nə̈ ńgɔ nə. 3Yeso a kɔ́ʼ ńgɛnə̂ a ndu nkwəənə ńtíʼ ńnáanə ə́wɨ́ pópə ngaŋə́zoŋə́ndzəm əjíə. 4Akɔŋtə ndzáʼkə Pəjusə a kə tə́ ḿbáatə. 5Əghâ ándó Yeso a nə́ ḿbɨg nə́ atûə ají ńdzɨ́ ənɔ pɨ ə́ tə́ ńgyǐəə a mbi yí lə́, a tíʼ ḿbítə Filib ńgə́, “pɛn yǐ júnə apá lə́ ə́fó ə́fɛ̂ á mbô pɨ pɨ lɛ pó jîə?” 6A nə ḿbítə anu zɨ lə́ tsɔʼə mə́ kwaʼlə̂ nə́ Filibə, ńté ńgə́ a nə ḿbɛ́d tə ńtúgə anuə á ntɨ́ yí páʼ a yǐ nə́ ghɛlə̂.
7Filibə a kwěe yí ńgə́, “Nkáb əpa pɛ̌ ə́ kě koʼnə̂ á mə́ jú nə́ apá təmbɔʼ ŋwu ntsəmə a jî mɔ́ mɔ́ aliʼ pô.”
8Táʼ ŋwunə á mə́m ngaŋə́zoŋə́ndzəm Yeso páʼ pə́ nə́ fóŋ nə́ nə́ Andəlu páʼ a pə́ nə́ mɔ́mɛ́ Saamun Pita lə́, a sóŋə á mbô yí ńgə́, 9“Mɔ́ mbyâŋnə yitsə̌ a túg ntáʼə apá zɛ́n tênə, nə́ əshû zɛ́n pɛ̌, lə́ təmbɔʼ pə́ pə̂ ńgeebə̂ á mbô ŋwu ntsəm lə́ ə́lɛ́?”
10Yeso á sóŋ ńgə́, “Ghɛd pó náanə á ndəsê,” nəyeŋə́ á nə ńchîə aliʼ yi ə́wɨ́ ńnə́ənə, lə́ mbyâŋnə ńnáanə á ndəsê ándó pó tɔsə tênə. 11Yeso a tíʼ ḿbyáanə apá yə wɨ́ ə́fɛ̂ ndǎ á mbô Əsê ńtíʼ ńgabtə̂ á zə́ələ́ á mbô pɨ páʼ pó nə ńnáanə á ndəsê, ńkə́ ńgɛd tsɔʼə ə́lɨ́d nə́ əshû zə̂ ŋwu ntsəmə a jî ndzaŋə a kɔŋ nə́. 12Əghâ ándó ŋwu ntsəmə a nə ńjî nə́ tə ńdzɛ́d lə́, a sóŋə á mbô ngaŋə́zoŋə́ndzəm əjí ńgə́, “Kyeetə̂ nə́ əpag páʼ ə́ pɛ́d nə́ ńjî ńgə́ kɔ apag yətsə̌ á péŋə.”
13Pó tíʼ ńkyeetə̂ əpag páʼ pɨ́d nə ḿbɛ́d nə́, ə́ pə́ məŋka ntsɔb pɛ̌ páʼ ə́ nə ḿbə́ nə́ əpag páʼ ə́ nə ə́fɛ́d nə́ á mə́m ntáʼə apá zə́ zɛ́n tâ páʼ pɨ pó nə ńjî nə́ pó nə mɛdtə̂ nə́. 14Əghâ ándó pɨ́ pə̂ pó nə ńjɨ́ nə́ akyeʼə́nu Yeso a nə ńgɛd nə́ lə́, ńtíʼ ə́sóŋ ńgə́, “Lə́ ndə̌ŋdəŋ lɛ̌ ntûsê wə̂ páʼ a nə ńchî nə́ á mə́ yǐ nə́ á ndu mbî lə́.” 15Yeso a jî ńgə́ pó tə́ ńdoonə̂ mə́ lɔg nə́ yí ghɛlə̂ əfo ə́wɨ́ nə́ mətəənə, a tíʼ ńkəələ̂ yí ńkɔ́ʼ ńgɛnə̂ á ndu nkwəənə ngǎ yitsə̌ tsɔʼə yə́.
Yeso A Nyinə̂ A Ndu Nkǐə
(Mat 14.22-33; Mag 6.45-52)
16Ndzaŋə ándó ndɛd nkwanə́ ə́ koʼ nə́ lə́, ngaŋə́zoŋə́ndzəm əjí ə́ tsó ńgɛnə̂ á nkǎŋkǐ əfooghəəmə́, 17ńkwúnə aŋkənúʼə́ ńtə́ ńtúmə ndzɛnə́ Kapanawumə, əghâ wɨ́d wə̂ əliʼ nə ə́sɛ́nə, lə́ Yeso a pə̂ ńkě ághɔ́b kə́ yǐəə téekə pô. 18Nkǐ á nə ńtə́ ńtóʼnə ńté ńgə́ tə́kɔʼ sə́mə á kə tə́ ńkɔ́ʼə. 19Əghâ ándó ngaŋə́zoŋə́ndzəm Yeso nə nyi nə́ á mə́m nkǐə ándó pə Máyilə pɛ́n teelə́ ńkoʼə̂ nəkwa lə́, ńdzə́ənə Yeso a tə́ ńnyinə̂ á ndu nkǐ ńgyǐəə á nəpɛnə́ nə́ aŋkənúʼə́, pó tíʼ ńchî nə́ apɔ́gə. 20Lə́ a pə́ ə́sóŋə á mbô pó ńgə́, “Lə́ maŋə, kɔ nə pɔ́gə.” 21Pó nə ńkɔŋtə̂ mə́ lɔg nə yí ə́ kwúnə á mə́mə aŋkənúʼə́, tsɔʼə əghâ yi wɨ́ aŋkənúʼə́ á tíʼ ńkoʼə̂ aliʼ pó nə ńgɛn nə ə́wə́.
Pɨ pə́ Chwaalə̂ Yeso
22Mbî ə́fóg mboŋ pɨ páʼ pó nə ńgɔ́ŋ nə́ á ndzɛnə́ nkǐ əfooghɨ, pó zɨ́ ńgə́ lə́ nə ńtíʼ ḿbɛ́d tsɔʼə táʼə aŋkənúʼə́, lə́ Yeso a pə̂ ńkě aŋkənúʼə́ yə wɨ́ pópə ngaŋə́zoŋə́ndzəm əjí kwú pô, ngaŋə́zoŋə́ndzəm əjí kə ghɛnə̂ ághóobə́ mbiə. 23Lə́ əŋkənúʼə́ pətsə́ ə́ nə ńdǒ nə́ Tibelyas ńgyǐ ḿbáatə aliʼ páʼ pɨ pə̂ pə́ pěʼ nə́ ńkɔ́lə apá ə́wɨ́ əghâ ándó Mmaʼmbîə a pěʼ nə́ ə́fɛ̂ ndǎ á mbô Əsê lə́. 24Əghâ pɨ pə́ nə́ ńdzɨ́ nə́ ńgə́ Yeso pópə ngaŋə́zoŋə́ndzəm əjí kě ə́wɨ́ chî pô lə́, pó tíʼ ńkwúnə aŋkənúʼə́ ńgɛnə̂ Kapanawum a mə́ náŋ nə́ Yeso.
Yeso Lə́ Apá Páʼ A Fɛ̂ Nə́ Nchîmbîə.
25Əghâ ándó pó nə́ ńdzɨ́ nə́ yə́ á ndzɛnə́ nkǐ əfooghɨ lə́, ńtíʼ ḿbítə yí ńgə́, “Ndzéʼkə, gho kə yǐəə aliʼə́ nə́ lə́ ə́lɛ́?”
26Yeso a kwěe ághɔ́b ńgə́, “Lə́ ndə̌ŋdəŋ, mäŋ fiʼtə̂ á mbô pɨ ńgə́ pɨ̈ náŋə mə, lə́ ńkě té pə́ ńgə́ nə́ pěʼ ńdzə́ənə akyeʼə́nu maŋ ghɛd nə́ lə́ pô, lə́ ńté lə́ pə́ ńgə́ nə́ pěʼ ńjîə apéenə məkálə́ azɨ́ tə ńdzɛ́lə. 27Kɔ nə́ faʼ ńté pə́ məjî páʼ mə́ yǐ nə́ pə́gə, faʼ nə́ ńté pə́ məjî páʼ mə̈ chî nə́ tə mɛdnə̂ ńkə̈ ə́fɛ̂ nchîntəənə, mimə́ Mɔ́ Ŋwunə a yǐ nə́ ə́fɛ̂ á mbô pəənə́, ńté ńgə́ Əsê páʼ a pə́ nə́ Tǎ, a néŋə aleŋkə ajíə a mbɨ Yə́, á mə́ nɨd nə́ ńgə́ a pímə yə́, 28Pó tíʼ ḿbítə yí ńgə́ mbɔʼ pəg ghɛd lə́ ə́lɛ́ á mə́ tə́ nə́ faʼə̂ afaʼə Əsê?” 29Yeso a kwěe ághɔ́b ńgə́, “Afaʼə Əsê lə́ ńgə́, gho néŋ ntɨ́ əgho nə ŋwu páʼ Əsê a tú nə́.”
30Pó tíʼ ḿbítə a yí ńgə́, “Akyeʼə́nu mbɔʼ gho ghɛd lə́ zə́ənə́, ńjî ńgə́ pəg zɨ́ ńkə́ néŋ ntɨ́ nə́ gho? Gho yǐ ghɛd lə́ akə̂? 31Pətǎ pə́ pətǎ pɛ́n pə́ nə ńkɔ́lə apá páʼ pə́ nə́ fóŋ nə́ nə́ mana lə́ á kɔŋ məŋkwâʼlə̌, ndzaŋ pə́ ŋwaʼlə̂ nə́ á mə́m aŋwaʼlə Əsê ńgə́, a nə ə́fɛ̂ apéenə məkálə́ á lǒo nə́ nəpó ńgə́ pó jîə.”
32Yeso a tíʼ ə́sóŋə á mbô pó ńgə́, “Lə́ ndə̌ŋdəŋə́, mäŋ sóŋə á mbô pɨ ńgə́, lə́ kě Mosisə páʼ a nə ə́fɛ̂ nə́ apá zə̂ á lǒo nə́ nəpóolə á mbô pɨ pô, Tǎ mə ä fɛ̂ nə́ ndə̌ŋdəŋə́ apá páʼ á lǒo nə́ nəpóolə á mbô pəənə́. 33Ńté ńgə́ apéenə məkálə́ Əsê lə́ yi páʼ á lǒo nə́ nəpó ńtsó ńtíʼ ə́fɛ̂ nchîmbîə á ndu mbîə.”
34Pó sóŋə a mbô yí ńgə́, “Tǎ, tə́ ə́fɛ̂ apá zəənə́ á mbô pəg əghâ ətsəmə.”
35Yeso a sóŋə á mbô pó ńgə́, “Maŋ lə́ apéenə məkálə́ nchîmbîə. Ŋwu ntsəm páʼ a yǐ nə́ a mbô maŋ, nji láʼ ńkě yí yǒ pɨ záŋ pô, ŋwu páʼ a néŋ nə́ ntɨ́ əyí nə́ maŋ nji nkǐ láʼ ńkě yí pɨ záŋ pô. 36Lə́ maŋ pə̂ ə́sóŋə á mbô pɨ ńgə́, nə́ zə́ənə mə ḿbə́ ńkě ntɨ́ nə́ maŋ néŋ pô. 37Ŋwu ntsəm páʼ Tǎ mə a fɛ̂ nə́ yə́ á mbô maŋ a yǐ yǐəə á mbô maŋə, ŋwu ntsəm páʼ a yǐ nə́ á mbô maŋ, təmbɔʼ maŋ kě yí kəm pô. 38Ńté ńgə́ maŋ lǒo lə́ nəpó ńtsóolə, maŋ kě tsó lə́ mə́ faʼ nə́ anu páʼ maŋ kɔŋ nə́ pô, maŋ tsó lə́ mə́ faʼ nə́ anu ŋwu páʼ a tú nə́ mə a lɔ nə́ ńgə́ maŋ faʼə̂, 39Lɛ̌ anu páʼ ŋwunə a tú nə́ mə a lɔ nə ńgə́ maŋ faʼə̂, ńgə́ kɔ maŋ péŋkə ŋwu tsə̌ á mə́m pɨ pətsəm páʼ a fɛ̂ nə́ á mbô maŋə, maŋ yǒ júmkə ághɔ́b pətsəmə á mə́m nəwûə á alě ndwigtə mbîə. 40Ńté ńgə́ lɛ̌ anu páʼ Tǎ mə a lɔ nə́, ńgə́, ŋwu ntsəm páʼ a zɨ́ nə́ mɔ́ əyǐ ńkə́ ńnéŋ ntɨ́ əyí nə́ yə́ a yǒ túg nchîntɨ páʼ ə́ mɛdnə̂ nə́ ngǎ mɔʼə́, maŋ yǒ tíʼ júmkə ághóobə́ á mə́m nəwûə á ndwigtə alě.”
41Pəjusə pó tíʼə ŋ́ŋwuntə̂ ńté ńgə́ a pěʼ ə́sóŋ ńgə́, “Maŋ lə́ apá páʼ á lǒ nə́ nəpó ńtsóolə.” 42Pó tíʼ ḿbítə ńgə́, “Lɛ̌ kě Yeso mɔ́ Jɔsɛf pô, páʼ pɛn jî nə́ tǎ əyǐ pó mǎ əyǐ lə́ pô? Lə́ pə̂ ńtíʼ ńgɛlə̂ akə̂ a sóŋ əghâ nə ńgə́ a lǒo lə́ á nəpó ńtsóolə?” 43Yeso a kwěe ághɔ́b ńgə́, “kɔ nə tə́ ŋ́ŋwuntə̂ tətɨ pəənə́.” 44Təmbɔʼ ŋwu tsə̌ a kě á mbô maŋ yǐ pô tə ńdéʼtə Tǎ páʼ a tú nə mə a yǐ nə́ yə́ á mbô maŋə, Maŋ yǒ ńtíʼ ńjúmkə yə́ á mə́m nəwûə á ndwigtə alě. 45Pə́ ŋwaʼlə̂ mə́mə aŋwaʼlə məntúmə́sê ńgə́, “Əsê a yǒ zéʼkə ághɔ́b pətsəmə. Ŋwu ntsəm páʼ a zóʼ nə́ ńkə́ ńdzéʼə á mbô Tǎ a yǐəə á mbô maŋə. 46Zəənə́ á kě sóŋ lə́ ńgə́ ŋwu tsə̌ a pɛ́d tə ńdzə́ənə Tǎ pô, yí páʼ alǒ nə́ á mbô Əsê lə́ tsɔʼə yí páʼ a pɛ́d nə́ tə ńdzə́ənə Tǎ. 47Lə́, ndə̌ŋdəŋ maŋ sóŋ nə́ á mbô pɨ ńgə́, ŋwu páʼ a néŋ nə́ ntɨ́ yí, a túg nchîntɨ páʼ ə́ mɛdnə̂ nə́ ngǎ mɔʼə́. 48Maŋ lə́ apéenə məkálə́ nchîmbîə. 49Pətǎ pə́ pətǎ pɨ́ pó nə́ ńkɔ́lə mana wə́ á kɔŋ məŋkwâʼlə̌ lə́ ńkwúkə. 50Lɛ̌ apá páʼ a lǒo nə́ nəpó ńtsóolə, páʼ mbɔʼ ŋwunə a kɔ́lə zɨ́d a yǐ ńkě kwû pô. 51Maŋ lə́ apéenə məkálə́ nchîmbî páʼ a lǒo nə́ nəpó ńtsóolə. Təmbɔʼ ŋwu ntsəm páʼ a kɔ́d nə́ apá jɨ́d zɨ a yǒ ńchî ḿmɛdnə̂. Apá maŋ yǒ nə́ ə́fɛ̂ á mbô yí lə́ na mbəəmə mə, páʼ mäŋ fɛ̂ nə ńjî ńgə́ mbɔʼ ŋwu ntsəmə a chîə mbîə.”
52Atsáb jɨ́d zəənə́ a kə ghɛd Pəjusə pó chúʼə mə́ zɔŋnə̂ nə́ á tətɨ pó nə́ mətɨ ə́sóŋə ńgə́, “Təmbɔʼ ŋwu nə́ a fɛ̂ na mbɨ əjǐə á mbô pɛn ńgə́ pɛn kɔ́d lə́ ə́lɛ́?”
53Yeso a tíʼ ə́sóŋə á mbô pó ńgə́, “Lə́ ndə̌ŋdəŋ mäŋ sóŋ á mbô pɨ ńgə́, tə ńdéʼtə gho kɔ́d na mbɨ Mɔ́ Ŋwunə, ńkə́ ńnô achǐə ajíə, tə ḿbə́ gho kě nchîmbîə á mə́m gho túg pô. 54Ŋwu páʼ a kɔ́d nə́ na mbəəmə mə ńkə́ ńnô achǐə mə a túg nchîntɨ páʼ ə́ mɛdnə̂ nə́ ngǎ mɔʼə́, Maŋ yǒ kə́ júmkə yə́ á ndwigtə mbîə. 55Ńté ńgə́ na mbəəmə mə lə́ chigə məjîə, achǐə mə á kə́ ḿbə́ chigə ajú yə nô nə́. 56Ŋwu páʼ a kɔ́d nə́ na mbəəmə mə ńkə́ ńnô achǐə mə a chîə á mə́m maŋə, maŋ kə́ ńchîə mə́m yə́. 57Ndzaŋ páʼ Tǎ á chî nə́ mbîə a tú nə́ mə, maŋ kə́ ńchîə á mbî ntê Tǎ, ńdaŋ ə́lɨ́d ŋwu ntsəm páʼ a kɔ́d nə́ na mbəəmə mə a yǐ chîə mbî té mə. 58Lɛ̌ apá páʼ á lǒo nə́ nəpó ńtsóolə, á kě chî lə́ ándó yətsə̌ zə̂ pətǎ pə́ pətǎ pɨ́ pó nə ńjî nə́ ḿbɛ́d ńkwúkə lə́ pô. Ŋwu páʼ a yǐ nə́ kɔ́lə apá zɨ a yǐ chî ḿmɛdnə̂.” 59Yeso a nə ə́sóŋə anu zɨ lə́ əghâ ándó a nə́ ńtə́ nə́ ńdzéʼkə á ndɛ̂sê Pəjusə á Kapanawumə lə́.
Ətsáb Nchîntɨ Páʼ Pɨ́d Ḿmɛdnə̂ Ngǎ Mɔʼə́.
60Ngaŋə́zoŋə́ndzəm Yeso yi nɨ́ nə pó zóʼə atsáb zɨ ńtíʼ ə́sóŋ ńgə́, “Ndzeʼkə́ zɨ ə́ tyantə̂” Təmbɔʼ əwə a jwə́ʼtə á zə́ələ́? 61Lə́ Yeso a pə̂ ńjîə á mə́m ntɨ́ yí ńgə́, ngaŋə́zoŋə́ndzəm əjí pó nə ńtə́ ŋwuntə̂ ńté atsáb zɨ́d zə̂ lə́ ńtíʼ ḿbítə ńgə́, “Məndě mɨ́ mə́ záŋ ńté atsáb zɨ?” 62Təmbɔʼ nə́ pěʼ ńjɨ́ lə́ Mɔ́ ŋwunə a tə́ ńkɔ́ʼə ńgɛnə̂ yə́ aliʼ páʼ a nə ńdǒo nə́ ə́wɨ́ nə́ ghɛd ə́lɛ́? 63Lə́ Ajwǐəsê páʼ a fɛ̂ nə nchîmbîə, na mbɨ ə́ kě atûə anu yitsə́ chî pô. Ətsáb páʼ maŋ tsáb nə́ á mbô pɨ lə́ Ajwi ńkə́ ḿbə́ nchîmbîə. 64Lə́ pɨ pətsə́ á mə́m pɨ, pó kě ntɨ́ ə́wɨ́ néŋ pô. Ə́fɛ́lə á nəchwaakənə́ Yeso a nə ḿbɛ́d tə ńjî pɨ páʼ pó yǒ nə́ kě ntɨ́ nə́ yi néŋ pô ńkə́ ńjîə á ŋwu páʼ a yǒ nə́ finə̂ a yə́. 65A tíʼ ə́sóŋ ńgə́, “Lɛ̌ anu páʼ á ghɛd nə́ maŋ fiʼtə̂ á mbô pɨ ńgə́ təmbɔʼ ŋwunə a kě á mbô maŋ yǐ tə ńdéʼtə Tǎ a pí ńgə́ a yǐəə.”
66Ńdzoŋə̂ á ndzəmə atsáb zɨ́d zɨ ngaŋə́zoŋə́ndzəm Yeso yi nɨ́ nə́ pəənə ághɔ́b nə́ ndzəm ńkě pó po pɛ́lə ńnyinə̂ pô. 67Yeso a pítə ngaŋə́zoŋə́ndzəm əjí zə̂ ntsɔb pɛ̌ ńgə́, “Nə́ kə́ ńkɔŋə̂ á mə́ pɨ nə́ azɨ́ nə́ ndzəm?” 68Saamun Pita a kwěe yí ńgə́, “Mmaʼmbî, pəg yǐ tíʼ ə́ ghɛn lə́ á mbô əwə? Gho túg ətsáb nchîntɨ páʼ ḿmɛdnə̂ ngǎ mɔʼə́. 69Pəg kə́ néŋ ntɨ́ nə́ gho ńdzoŋ ndzəm əzo, ńkə́ ńjî ńgə́ gho lə́ Yi Ŋwaʼ nə́, á lǒo nə́ á mbô Əsê.”
70Yeso a kwěe á mbô pó ńgə́, “Lə́ nə ńkě maŋ tsɔ́ʼ ńtsɔ́ʼə áwɨ́ ntsɔb pɛ̌? Táʼ ŋwunə á mə́m pəənə́ a pə ḿbə́ dɛbəələ” 71A nə ńtséebə ńté lə́ Judas mɔ́ Saamun Iskaliɔt, ńté ńgə́ lə́ táʼ ŋwunə á mə́m ngaŋə́zoŋə́ndzəm əjí zə̂ ntsɔb pɛ̌ páʼ a yǐ nə́ finə̂ Yeso.
Àwon tá yàn lọ́wọ́lọ́wọ́ báyìí:
Jɔnə 6: azo
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀