Matío 21
21
Yɛɛ́so a á ega ŋkúɔ́ á Yelósalɛm
(Mlk 11.1-11; Lúk 19.28-40; Jáŋ 12.12-19)
1Yɛɛ́so pɔ́ nnɔ yí é le gʉ̄ɔ tɛ nnɔ̄ŋ mbátɛ á Yelósalɛm, tɛ ncʉ́ʼ mé lekō á ntē akap alāʼ Bɛtfajé, ájʉʼ lekwɛ̄t Methʉ́ Olive. Yɛɛ́so á shʉʼ ánɛ nnɔ yí, ńtó epuɔ mémpīa. 2Ńdé á mbū pɔ́p ŋ́gɛ: «Pɛ egʉ̄ɔ ánɛ akap alāʼ zīi, á mvhɔ pɛ lēe. Pɛ elɛ ege ekó éwú, éjʉ́ɔ á nzwí njakási pɔ́ méŋ yi, e etsēŋne á esī. Pɛ elɛ ŋkɛ́ʼɛ á yí, ńdɔk eshʉ̄ʼ ŋ́gyá mé meŋ. 3Pɛ kúɔ́ nnɔ̄ŋ ŋkɛ́ʼɛ, ŋiŋ á pīŋ nzɛ́tte á wɛ́ azō, pɛ epwɛ̄ɛt á mbū yí ŋ́gɛ: “Ndi a á si ŋkɔ̄ŋɔ á lelɔk ŋghʉ̄ azō.” Ŋgaŋ a lɛ ntshī á wɔ́p néŋ, pɛ elɔk ŋgʉ̄ɔ. »
4Ajʉɔ anu mɛ́t á tɔ́k páʼa, tɛ́ á lɔk mbō páʼ, ntswi‑ŋke Ndém a le lé ŋ́gɛ:
5«Pɛ elé á mbū epuɔ pīi, pɔ́ é tésɔŋ Siɔŋ ŋ́gɛ:
pɔ́ ejʉ́ɔ páʼ efɔ wɔp a á si eshʉ̄ʼɛ mé ntswɛ́tte pɔ́p,
ŋ́gɔ́ á ŋgaŋ apwɛne, ńnáŋ ánɛ nzwí njakási,
ńnáŋ ánɛ mɔ́ njakási, á méŋ na yīi, a tswíʼɛ apiʼ.
6 Megaŋ nnɔ pí mɛ́t é gʉɔ, ŋ́kó ŋghʉ̄ páʼ Yɛɛ́so a á ŋghíte á wɔ́p épúp. 7Ńdɔ̄k njakási jɔ̄ pɔ́ méŋ yi eshʉ̄ʼ. Ńdɔ̄k menzhó mɔ́p nzyākne ŋkaʼte wɔ́p, Yɛɛ́so á kɔ́ʼ nnáŋ éwú. 8Atʉtʉ epuɔ, pɔ́ saŋte menzhó mɔ́p á ndo mɛnzhɛ yīi, a gɔ etsia éwú. Emɔ̄ʼ epuɔ é fakte membū methʉ́, ésāŋte á ndo mɛnzhɛ. 9Atʉtʉ epuɔ zīi, á ŋgɔ́ á mvhɔ yí nzīŋɛ, mbɔɔ azi á ŋgɔ́ á nzem nzhɛ̄nɛ á yí, á nɔŋ ŋgyáa á lepɛ ndʉ́ɛ́ ŋ́gɛ: «Ozána#21.9 Ozána, ńdɔkɔ ŋ́gɛ awuʼte a egɔ́ á mbū Ndém. á mbū méŋ Efɔ Ndavít. Mbwɛ́né e egɔ́ á mbū ŋiŋ yīi a shʉʼɛ, mbɔ Ndém mé chʉ́ á yí, ńtó á mbū pek. Ozána á mbū Ndém tɛ athʉ́ lephū. »
10Yɛɛ́so á gʉɔ tɛ ŋkó á Yelósalɛm, tésɔŋ ntsem á pú ncʉ̄ʼne, ńnɔŋ ndʉ́ɛ́ ŋ́gɛ: «Awɔ́ ŋiŋ mé ewuɔ ɔ̄?» 11Atʉtʉ epuɔ á pwɛt ŋ́gɛ: «A gɔ́ áa Yɛɛ́so, éfhɔ́ɔ á Naázalɛt á ntē apak ŋgɔŋ Ŋgaliléa, ŋ́gɔ́ á ntswi‑ŋke yīi, Ndém a le laʼnēē. »
Yɛɛ́so a á ega njūŋɔ wɔ táŋ‑esaá á ntē Mía Ŋgyā Ndém
(Mlk 11.15-19; Lúk 19.45-48; Jáŋ 2.13-22)
12Yɛɛ́so á gʉɔ tɛ nzíʼ ŋkó á Mía Ŋgyā Ndém, ńjūŋ epuɔ metsem pīi, é ŋgɔ́ éwú eswīŋɛ azō, mbɔɔ wɔ júɔ́. Ḿbwɛ̄t metɛ́blɛ wɔ kúmne‑ŋkāp, ŋ́kápa á esī, mbɔɔ eleŋ wɔ táŋ‑ekepēŋ. 13Ńdé á mbū pɔ́p ŋ́gɛ: «Á ntē aŋwaʼne Ndém, Ndém á lé ŋ́gɛ: “Ŋgyā za e efú nnáŋa ŋgɔ́ɔ ŋgyā aswiŋte.” Pɛ pwɔ̄ é kʉʉ̄ŋ esɛt, ńdɔk ŋghʉ̄ ŋka metsɔ́ŋ. »
14Wɔ efʉʉ́‑menēk mbɔɔ wɔ ŋiíʼ‑akhu é tshóte nnɛ̄t mé lezēŋ tsí, á Mía Ŋgyā Ndém mɛ́t, á ghʉ pɔ́ te. 15Wɔ nɔŋ‑epɔʼ epi melʉɛ pɔ́ wɔ kɛ́ʼte‑mbé Ndém, é jʉ́ɔ meŋkʉʼne menu mīi, Yɛɛ́so a á ghʉ. Ńjʉ́ɔ páʼ ewɔŋkhʉ̄ é Mía Ŋgyā Ndém, ŋ́gyáa á lepɛ ndʉ́ɛ́ ŋ́gɛ: «Awuʼte a egɔ́ á mbū méŋ Efɔ Ndavít. » Ńjʉ́ɔ épúp, ntɔ̄ŋ wɔ́p é zi á lefuʼ. 16Pɔ́ lé á mbū Yɛɛ́so ŋ́gɛ: «O ó si njúʼɔ anu zīi, ewɔŋkhʉ̄ puɔ é lʉ́ɛ́ lā a?» Yɛɛ́so á pwɛt á mbū pɔ́p ŋ́gɛ: «Ŋŋ, pɛ laá ntɔ́ŋ á ajʉʼ aŋwaʼne Ndém zīi, a le lé éwú ŋ́gɛ: “Meŋ á ŋghʉ̄ tɛ ewɔŋkhʉ̄, mbɔɔ epɔ̄ meswī é lɔk nchu wɔ́p, ńchʉ́ nnɛ̄t ŋgūʼte á gá á lɛ̄?”» 17Á lé épúp, ńtshī á wɔ́p á ajʉʼ mɛ́t nnéŋ, éfhó á tésɔŋ Yelósalɛm, ńtó ŋgʉ̄ɔ mé Betani, á amɔ̄ʼ akap alāʼ, ńdáʼ éwú.
Yɛɛ́so a á ega nnéŋɛ ndɔ ánɛ athʉ́ fiŋge
(Mlk 11.12-14, 20-25)
18Njhʉ̄ é lá nzemɛ́nzēm, Yɛɛ́so á nɔŋ mbīŋɛ nzem mé tésɔŋ, nzi é záŋ á yí. 19Á jʉ́ɔ amɔ̄ʼ athʉ́ fiŋge, á tshí á legʉ̄ŋ mɛnzhɛ. Á tshóte nnɛ̄t mé lezēŋ athʉ́ mɛ́t, ńnɔŋ nzhɛ́ɛ á légɛ, yí e jʉ́ɔ ntá éwú, ŋ́kó éwú, a te azō jʉ́ɔ, ndaʼ mefho mé gɔ́ éwú. Á lé á mbū athʉ́ mɛ́t ŋ́gɛ: «O te ndáʼa nzéŋɛ nzémɛ ntá á. » Afʉʼ mɛ́t afʉʼ mɛ́t, athʉ́ jɔ̄ á lɛ nzó. 20Megaŋ nnɔ Yɛɛ́so é jʉ́ɔ épúp, á pú ŋkʉ̄ʼne á wɔ́p tɛʼ. Pɔ́ zɛ́tte á Yɛɛ́so ŋ́gɛ: «Ajʉɔ athʉ́ á gaá, ńdɛ nzó efʉʼ mɛ́t efʉʼ mɛ́t páʼa ā?» 21Yɛɛ́so á pwɛt á mbū pɔ́p ŋ́gɛ: «Kwaʼ anuúnē meŋ shúŋɔ á wɛ́ ŋ́gɛ: á ŋgwíʼe ŋgɔ́ éyi, pɛ lé fɛ́ nnɛ̄t zɛ ŋgyá mé Ndém, tɛ nnɔ̄ŋ te mmīʼtɛ ɛ́, mbɔ pɛ gɔ lé lɛ̄ ŋghʉ̄ áa ajū mīi, meŋ á ghʉ ánɛ athʉ́ fiŋge jʉɔ ndaʼ á. Mbɔ pɛ lʉ́ɛ́ á mbū lekwɛ̄t cʉɔ ŋ́gɛ: “Fhó ega ntsɔ́ʼɔ, ŋ́gʉɔ ŋgwhʉ̄ á ntē mía ntshi”, é tsɔ́ʼɔ épúp. 22Pɛ fíɛ́ nnɛ̄t ŋgyá á mbū Ndém, éswíŋte á yí, ńdɔ́ akɔ̄ lɛ́, mbɔ a a yá á mbū pɛ. »
Wɔ nɔŋ‑epɔʼ é ega nzɛ́ttɛ á Yɛɛ́so ajʉʼ zīi, mete mí é fhɔ́ɔ éwú
(Mlk 11.27-33; Lúk 20.1-8)
23Yɛɛ́so á piŋ nzem tɛ nzíʼ ŋkó á Mía Ŋgyā Ndém, ńnɔŋ nzíʼnɛ epuɔ, wɔ nɔŋ‑epɔʼ epi melʉɛ mbɔɔ mekém alāʼ, é tshóte nnɛ̄t mé lezēŋ tsí, ńzɛ́tte á yí ŋ́gɛ: «O ghʉɛ ejʉɔ ntií menu páʼa, awɔ́ á tswi ī? Awɔ́ a yáa á wú mete, tɛ́ o lɔ̄kɔ ŋghʉ̄ɛ ɛ́?» 24Yɛɛ́so á pwɛt á mbū pɔ́p ŋ́gɛ: «Meŋ a zéŋ ezɛ́tte á wɛ́ azá á taʼ anu. Á taʼ páʼa ndaʼ. Ŋ́gɔ́ éyi pɛ tsɔ́ʼɔ anu mɛ́t á mbū meŋ, mbɔ meŋ a shúŋ á wɛ́ azá, á ŋiŋ yīi, a yáa mete tɛ́ meŋ ndɔ̄kɔ ŋghʉ̄ɛ ecʉɔ etsō mɛ́t. 25Jáaŋ a le gē enoʼ epuɔ á tshi péʼe, awɔ́ á tswi ī? Ndém mé le tswī kɛ epuɔ menɔŋ ŋ̄?» Pɔ́ sap á tsetsɛlɛ pɔ́p ŋ́gɛ: «Ḿpɛ pwɛtɛ ŋ́gɛ, Ndém mé le tswīī, mbɔ a a túŋte á yímpɛ gɛ, tɛ pɛ pīiŋ te ŋke Jáaŋ véŋ melaʼ akɔ̄? 26Ḿbīŋ mbwɛ̄t ŋ́gɛ: epuɔ menɔŋ mé le tswīī, mbɔ alāʼ a té néŋ á yímpɛ ɛ́, melaʼ mīi pɔ́ le kuʼté á légɛ, Jáaŋ a lɛ á kwaʼ ntswi‑ŋke Ndém. » 27Ńdɛ mbwɛ̄t azɔ́p á mbū Yɛɛ́so ŋ́gɛ: «Pek ka zhɛ́ ɛ́. » Yɛɛ́so á zéŋ ndé azí á mbū pɔ́p ŋ́gɛ: «Mbɔɔ meŋ azá, meŋ gɔ le shúŋ á wɛ́ ajʉʼ zīi, mete é fhɔ́ɔ éwú tɛ́ meŋ ndɔ̄kɔ ŋghʉ̄ɛ emuɔ menu ú. »
Ashuŋne lepúʼ ánɛ ŋiŋ pɔ́ ewɔŋkhʉ̄ pí mémpīa
28Yɛɛ́so á zéŋ ndé ŋ́gɛ: «Pɛ ekwāŋ azɛ́ anu jʉɔ, éshúŋ á gá. Mmɔʼ ŋiŋ a le wɛ̄ ewɔŋkhʉ̄ mémpīa, ńtshóte nnɛ̄t mé lezēŋ ŋgaŋ mvhɔ, ńdé á mbū yí ŋ́gɛ: “Méŋ ga, gʉɔ̄ á ŋkāʼ methʉ́ lɛzɛŋ meŋ ayáʼa, ŋ́ghʉ̄ afaʼ éwú.” 29Á tsɔ́ʼ á mbū yí ŋ́gɛ: “Ŋgáŋ, meŋ te gʉɔ éwú ú.” Ńtsɔ́ʼ épúp, méŋ afʉʼ á tɔ́k, anu zīi a á tsɔ́ʼ lā, á kóte á yí koté tɛ á ge ejʉ́ɔ, ŋgʉ̄ɔ á ŋkāʼ egā. 30Ŋiŋ wɔ̄ á zéŋ ntshóte nnɛ̄t mé lezēŋ eyi mmɔʼ ŋgaŋ, ńzéŋ ndé anu zīi, a á zi ndé á mbū ŋgaŋ mvhɔ, á mbū yí. Á pwɛt ŋ́gɛ: “Ŋŋ, meŋ a gʉɔ éwú me mɔ́ʼɔ.” Ńdé épúp, ḿbiŋ te éwú gʉɔ. 31Awɔ́ ánɛ ewɔŋkhʉ̄ puɔ mémpīa, a le ghʉ̄ ajū mīi, mɔʼɔ́ wɔp a á nnɔŋ ŋkɔ̄ŋɔ ɔ́?» Pɔ́ pwɛt ŋ́gɛ: «Ŋgaŋ mvhɔ. » Yɛɛ́so á lé mé pɔ́p ŋ́gɛ: «Kwaʼ anuúnē, meŋ shúŋɔ á wɛ́ ŋ́gɛ, wɔ tswí‑ncup alāʼ, mbɔɔ megaŋ agā, e shʉʼ etáʼte á wɛ́, ékó á ntē Lefɔ Ndém. 32Éfhó ánɛ páʼ, Jáaŋ a le shʉ̄ʼ á mbū pɛ, ńcūŋte á mɛnzhɛ yīi, Ndém a á si ŋkɔ̄ŋɔ ŋ́gɛ, pɛ ezīŋ éwú, pɛ pīŋ te anu zí véŋ. Wɔ tswí‑ncup mbɔɔ megaŋ agā é piŋ mvéŋ. Pɛ jʉ́ɔ épúp, ḿbiŋ te gɔ̄ nnɛ̄t zɛ, ḿvéŋ anu zí í. »
Ashuŋne lepúʼ ánɛ epuɔ pīi, mɛ́ le tsekné ŋkāʼ á mbū pɔ́p
(Mlk 12.1-12; Lúk 20.9-19)
33Yɛɛ́so á lé ŋ́gɛ: «Pɛ ezéŋ njúʼ amɔ̄ʼ ashuŋne lepúʼ. Mmɔʼ ŋgaŋ atsáʼ a lɛ éwú, ḿbhī methʉ́ lɛzɛŋ á ŋkāʼ yí, ḿbɔ́ akɛ ndɔ̄k ŋkɛ́ne. Ńcūŋte ajʉʼ zīi, mɛ́ e náŋa ekíɛ́ ntá athʉ́ mɛ́t éwú. Ḿbɔ́ á sisia ajʉʼ yīi, mɛ́ e náŋa ekɔ́ʼɔ etshíɛ éwú, épípɛ ŋkāʼ. Ńtsékne ŋkāʼ á mbū wɔ kɛ́‑ntá athʉ́ mɛ́t ndɔk ncūŋte meluʼ, ŋ́gɛ pɔ́ eshʉʼ ŋgyá azí azō. Ńtsékne epúp, ńdɛ ŋgʉ̄ɔ mé atō. 34Afʉʼ á lekāp ntá athʉ́ á shʉʼ nnáŋ tɛ ŋkūʼ, ŋgaŋ ŋkāʼ á tó meŋkwa pí ŋ́gɛ, pɔ́ egʉ̄ɔ á mbū wɔ cuŋte‑meluʼ pwɔ̄, ńtswí azi akim ndɔ̄k eshʉ̄ʼ. 35Wɔ cuŋte‑meluʼ pwɔ̄, é kó ŋgɔ̄ á wɔ́p, ńtswá mmɔʼ ŋgaŋ, ńzwhí mmɔʼ, ńdɔ̄k metɔ́ ntémte eyi mmɔʼ. 36Ŋgaŋ ŋkāʼ á kó nzéŋ ntó emɔ̄ʼ megaŋ afaʼ tɛ é zá ntɔ́k épi, a á nzi ntó legʉɔ mvhɔ lā. Wɔ cuŋte‑meluʼ é kó nzéŋ ŋghʉ̄ ndeŋ ndeŋ épúp ánɛ pɔ́p. 37Á ge ezoko, ńtó á méŋ yí á mbū pɔ́p, ńnɔŋ esáŋa ŋ́gɛ: “Pɔ́ e kó egaá lɛ́, éghʉ mekuʼ méŋ ga.” 38Epuɔ pwɔ̄ é kó ndɛ̄ ŋgē ejʉ́ɔ á mɔ́ wɔ̄, ńdé á tsetsɛlɛ pɔ́p ŋ́gɛ: “Ŋiŋ yīi a a fú ejhʉ́ ŋgyā, a ayi a á ege eshʉ̄ʼɛ le, pɛ eshʉ̄ʼ, ḿpɛ ezwhí á yí, ńjhʉ́ ŋkāʼ.” 39Ńdé épúp, ŋ́gɔ̄ á yí, ńdɔ̄k á yí efhó á ŋkāʼ ntó, ńzwhí á yí. »
40Yɛɛ́so á lé épúp, ḿbiŋ nzɛ́tte ŋ́gɛ: «Ŋgaŋ ŋkāʼ a láʼ eshʉʼe, éghʉ lɛ akɔ̄ ánɛ epuɔ pīi, a le tsekné ŋkāʼ á mbū pɔ́p é?» 41Epuɔ pīi é nnɔŋ njúʼɔ, é pwɛt á mbū yí ŋ́gɛ: «A a shʉʼ eghʉ, mɛ́ egɔ̄ʼ wɔ ejhʉ̄ te taʼ puɔ mɛ́t, té tsá á wɔ́p, ńtsékne ŋkāʼ á mbū epuɔ mendɛʼɛ pīi, a fú ekuʼɔ afʉʼ zīi mɛ́ kíɛ́ meluʼ, pɔ́ eyáa azí akim. » 42Yɛɛ́so á zéŋ ndé mé pɔ́p ŋ́gɛ: «Pɛ laá ntɔ́ŋ á ntē aŋwaʼne Ndém tɛ njúʼ ɔ́ lɛ̄? Mɛ́ le tí éwú ŋ́gɛ:
“Tɔ́ yīi mepɔɔ‑ŋgyā é le kʉŋtē ŋgwáʼ,
ewiɛ́ mé le shʉ̄ʼ ncʉ́ʼ á tɔ́ lezhō ŋgyā.
Á gɔ́ páʼ Atsyapuɔ
mé le ghʉ̄ épúp,
ḿpɛ jʉ́ɔ á gɔ́ á mɛgém anu.”
43«Á épúp tɛ́ meŋ shúŋɔ á wɛ́ ŋ́gɛ, Ndém a shʉʼ ekú á ajʉʼ zɛ́ á ntē lefɔ tsí, éyá á mbū epuɔ pīi, pɔ́ é si ŋghʉ̄ɛ ajū mīi, a á si ŋkɔ̄ŋɔ. [ 44Pɛ ezhɛ́ á légɛ, ŋiŋ a ŋémɛ ánɛ tɔ́ wuɔ mɛ́t, mbɔ a a pú epwɔ́ʼte. Tɔ́ wuɔ mɛ́t á pīŋ ŋgwhʉ̄ ánɛ ŋiŋ, á pú ŋkīne á yí.]» 45Wɔ nɔŋ‑epɔʼ epi melʉɛ mbɔɔ epuɔ Falísia, é júʼ ashuŋne jʉɔ mɛ́t, ńzhɛ́ á légɛ, Yɛɛ́so a shúŋnɛ ánɛ pɔ́p. 46Ńcʉ́ʼɛ efāʼa áa eshhʉ̄ á legɔ á yí, ḿbiŋ mbɔ́k menēk alāʼ. Á gɔ́ páʼ alāʼ á le kuʼté á légɛ, Yɛɛ́so a á si ŋgɔ́ á taʼ ntswi‑ŋke Ndém.
Àwon tá yàn lọ́wọ́lọ́wọ́ báyìí:
Matío 21: ybb
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© CABTAL