YOHANE 2
2
Popawawa ri lipu Kana
2:1-12
1Radua ndeme ungka njairia, reʼemo popawawa ri lipu Kana ri Galilea, ine i Yesu njau ri posusa setu. 2I Yesu pai anaguru-A ndaboo woʼu njoʼu ri posusa setu. 3Ntongo mposusa puramo anggoro, painaka njoʼu ine i Yesu mantoʼoka i Yesu, “Tumpu ncusa seʼi puramo anggoronya.”
4Mesono i Yesu ndatoʼo, “Neʼe ndidadusi Yaku, maka bareʼepa jela temponya da pepatongawa-Ku.”
5Paikanya natoʼo ine i Yesu ri waʼa ntoporioko, “Ndiwianaka nunjaa anu natoʼoka komi.”
6Njairia njau aono gumba anu ndapatoka pangadika ue mpewusoʼi malulu ada nto Yahudi. Sambaʼa-sambaʼa gumba setu reʼe tesaatu literi banganinya. 7Ndapeboo i Yesu waʼa nto porioko setu, ndatoʼoka, “Ndibanganika ue waʼa gumba setu.” Nabangani ntau seʼe rantani buke pura-pura. 8Nepa ndatoʼo i Yesu ri tau seʼe, “Ndisangku sakodi ue setu ndikenika i tadulako mposusa.” Nakeni ntau seʼe ue setu ri tadulako mposusa, 9butu napeinu ue setu mewalimo anggoro. (Bareʼe naincani kaʼungka ri mbeʼinya kamaʼi anggoro setu, podo waʼa ntoporioko anu mampontawaka ue setu anu maincani.) Natimosuki ntadulako mposusa tumpu ngkoro, 10nepa natoʼoka siʼa, “Biasanya, tau mampepapanginuka riunya anggoro anu maʼai mponyami, ane osamo raya ntau manginu nepa da ndapepapanginuka anggoro anu bareʼe ntani monyami. Paikanya anumu ntaninya, siko madika anggoro anu maʼai ngkadagonya rantani seʼi-seʼi!”
11Inceʼimo tanda ngkuasa anu kaʼisa ndapowia i Yesu. Inceʼe ndawianaka ri lipu Kana ri Galilea. Tanda ngkuasa anu ndapowia setu mampatongawa kabangke mpeawa-A. Inceʼe painaka meayamo waʼa anaguru-A ri Sira.
12 #
Mat. 4:13
Roo posusa setu malaimo i Yesu pai ine-A, waʼa ngkasangkompo-A pai waʼa anaguru-A njoʼu ri Kapenau. Maroo-roo tau seʼe bara tesangkuja ndeme njairia.
I Yesu mesua ri Banua i mPue
2:13-22
(Mat. 21:12-13, Mrk. 11:15-17, Luk. 19:45-46)
13 #
Pa. 12:1-27
Mosumo eo mPosusa Pasa nto Yahudi, malaimo i Yesu njoʼu ri Yerusale. 14Kajela-A ri Banua i mPue, ndakita waʼa ntopobalu-balu japi, bimba pai tonci tokuku; njau woʼu njairia waʼa ntopontolo doi. 15Ndapowia i Yesu koloro ndapoʼinabasi, nepa ndaʼirambai waʼa mpinatuwu setu pura-pura, bimba, japi ndairi ungka ri Banua i mPue. Waʼa meja ntopontolo doi ndabalikoʼa, painaka tepujaa waʼa doi ntau seʼe. 16Nepa ndatoʼoka topobalu-balu tonci tokuku, “Nditeo pura-pura balu-balumi ungka ireʼi. Banua mPapaku neʼe ndipapewali banua mpobalu-balu!” 17#Pol. 69:10 Naendomo waʼa anaguru-A anu ndaʼuki ri Sura Magali, “Towe ndaya-Ku ri Banua-Mi, boo Pue Ala, mangasuwe raya-Ku.”
18Napombebalika waʼa ntadulako nto Yahudi i Yesu natoʼo, “Koisa powia tanda ngkuasa, da mewali petondoni ri kami, kasikonya maya mowia ewanceʼi.”
19 #
Mat. 26:61, 27:40, Mrk. 14:58, 15:29 Mesono i Yesu, ndatoʼo, “Koisa ndigero Banua seʼi, pai nepa da Kuwali wangu muni ri raya anu tatogo ndeme.” 20Natoʼo ntau seʼe, “Aopo mpuyu pai aono ntaʼu kasaenya ndapawangunaka Banua i mPue seʼi. Pai siko da mawangunaka muni podo ri raya anu tatogo ndeme?”
21Ntanoka Banua i mPue anu ndatinako ndaya i Yesu inceʼe koro-A ngkalio-A. 22Ripurinya, ri pembangu i Yesu ungka ri kapate-A, nepa naendo waʼa anaguru-A, kakononya inceʼe reʼemo ndapantoʼoka tau seʼe. Inceʼe painaka naayamo ntau seʼe nunjaa anu ndaʼuki ri Sura Magali pai nunjaa anu ndatoʼo i Yesu.
I Yesu maincani raya ntau pura-pura
2:23-25
23Sindara ngkalau i Yesu ri Yerusale ri tempo mPosusa Pasa, maria tau anu maaya Sira ua mangangkita waʼa ntanda ngkuasa anu ndapowia. 24Paikanya i Yesu ngkalio-A bareʼe ndaaya, maka ndaincani raya ntau pura-pura. 25Mau bereʼe tau anu mantoʼoka Sira engko ntau, maka Sira ngkalio-A ndaincani nunjaa anu lau ri raya ntau.
Àwon tá yàn lọ́wọ́lọ́wọ́ báyìí:
YOHANE 2: LAIPMF
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀