YOHANE 3
3
I Yesu pai Nikodemu
3:1-21
1Reʼe sambaʼa to Parisi anu ndatubunaka ri Agama nto Yahudi i Nikodemu toʼonya. 2Ri anu sambengi njoʼu siʼa mampomberataka i Yesu, natoʼoka Sira, “Guru, kuincani kakominya ndaposuro i mPue Ala. Maka bereʼe tau anu mangkoto da mampowia tanda ngkuasa ewa anu Ndipowia ane banya i Pue Ala sangkani-ngkani pai siʼa.”
3Mesono i Yesu ndatoʼo, “Da nuayamo, bereʼe mau sambaʼa tau anu mangkoto da mewali tau i mPue Ala, ane bareʼe ndawali mpoana muni.”
4Natoʼo i Nikodemu ri Yesu, “Ewambeʼi da pewalinya tau anu bangkemo da ndawali mpoana muni. Ara da mewali siʼa da wali mpesua ri kompo inenya, nepa da ndawali mpoana muni?”
5Mesono i Yesu ndatoʼo, “Monco kojo anu Kutoʼo seʼi; tau ane bareʼe ndapoana ri ue pai ri Inosa mPue Ala, tau setu bareʼe da nakoto mewali tau i mPue Ala. 6Malulu katolino, tolino napoana ntau tuʼanya, paikanya malulu kaʼinosa, napoana Inosa mPue Ala. 7Mewali, neʼe nupojingki ane Kutoʼo, komi pura-pura sangaya-ngaya da ndawali mpoana muni. 8Ngoyu mewui ri mbeʼi pepokononya; tadonge oninya, paikanya bareʼe taincani ungka ri mbeʼi kamaʼinya pai ri mbeʼi da kanjoʼunya. Ewanceʼemo woʼu tau anu ndapoana ri Inosa mPue Ala.”
9Meoasi i Nikodemu, natoʼo, “Ewambeʼi da pewalinya incetu?”
10Mesono i Yesu, ndatoʼo, “Siko guru ri to Isaraeli; wenu painaka bareʼe da nuincani? 11Da nuayamo: Kami podo mangampau nunjaa anu kaincani, pai kami podo mangancabi nunjaa anu kakitamo; paikanya komi bareʼe mantarima posabi mami. 12Ane Kupauka komi waʼa anu ungka ri lino seʼi bareʼe ndiaya; ewambeʼi da ndipangaaya ane Kupauka komi kono waʼa anu ri suruga? 13Bareʼepa reʼe sambaʼa tau anu mepone ndeki suruga, waʼanya podo siʼa anu menaʼumo ri lino, inceʼemo i Ana Manusia.
14 #
Pai. 21:9
Ewa napangawangu i Musa ule tambaga nabasula ri wuntu ngkaju ri pada bone, ewanceʼe seʼe da ndapaloeka ri kaju i Ana Manusia, 15da naka pura-pura tau anu meaya ri Sira, da mangarata katuwu anu monco pai bereʼe kapusanya.”
16Maka ewaseʼi kabangke ntowe ndaya mPue Ala ri tolino ri lino seʼi, painaka Sira mawai Ana-A anu sambaʼa-mbaʼa, da naka waʼa ntau anu maaya Sira bareʼe da magero, paikanya da marata katuwu anu monco pai bareʼe da reʼe kapusanya. 17Maka tunggai ndaya i mPue Ala mampokau Anaa, banya da mangahuku lino seʼi, paikanya da mangancorepaka lino. 18Tau anu mangaaya Sira bareʼe da ndahuku. Paikanya tau anu bareʼe meaya, lawi ndahukumo i mPue Ala, ua kabareʼenya naaya Ana mPue Ala anu sambaʼa-mbaʼa. 19Anu da naponcuruka inceʼemo, “Reme tudumo ri lino paikanya tau seʼe mampobangke kuasa mbani, napobanciika ntau seʼe reme maka powia ntau seʼe majaʼa. 20Sambaʼa-sambaʼa tau anu mowia majaʼa, napobanciika reme; pai siʼa bareʼe napokono da njoʼu ri reme, da naka powianya anu majaʼa bareʼe ndakita. 21Paikanya tau anu mawianaka pepokono i mPue Ala, da rata ri karemenya, da naka tongawa nunjaa anu nawianaka setu silulu pai pepokono mPue Ala.”
I Yesu pai i Yohane Topopariu
3:22-30
22Ungka lairia malaimo i Yesu pai waʼa anaguru-A njoʼu ri tana Yudea. Bara tesangkuja ndeme karoo-roo ntau seʼe njairia, sindara setu Sira mopariu. 23-24#Mat. 14:3, Mrk. 6:17, Luk. 3:19-20 Sindara setu i Yohane bareʼepa ndapari ntarunggu. Siʼa mopariu ri Aino, bareʼe lawa ungka ri Sali, maka njairia maria ue. Waʼa ntau rata ri siʼa mekiriu, nariu waʼa ntau setu.
25Ri anu sangkani mewali pombetoli waʼa anaguru i Yohane pai to Yahudi, kakononya ada mpompakagali. 26Tau seʼe njoʼu ri Yohane natoʼoka siʼa, “Guru, bara ntongo ndiendopa tau anu sangkani-ngkani pai komi ri sambote ngKoro Yarade setu, anu nditujuka kami owi? Sira wawaseʼi mopariu woʼu, pai pura-pura tau njoʼu ri Sira!”
27Mesono i Yohane, natoʼo, “Tolino bareʼe da nakoto mampotumpu bara nunjaa-njaa, ane bareʼe ndawaika i mPue Ala. 28#Yoh. 1:20 Komi ngkaliomi ndidongemo anu kutoʼo, ‘Yaku banya Mokole Tadungkadago. Yaku ndapokau mamporiuka Sira.’ 29Tumpu ngkoro weʼa inceʼe tumpu ngkoro tuama tumpunya. Waʼa balenya podo maaweri siʼa, pai maʼai kojo kawongko ndaya waʼa balenya ane nadonge oni nganga i tumpu ngkoro tuama. Ewanceʼemo woʼu yaku, seʼi-seʼi maʼai kawongko ndayaku. 30Siramo anu sangaya-ngaya kako totongawa kabangkea pai yaku da kako kodi-kodi.”
Sira anu rata ungka ri suruga
3:31-36
31Anu rata ungka ri wawonya, inceʼe anu ri wawo pura-puranya. Anu rata ungka ri lino seʼi inceʼe tesua tau lino. Sira anu rata ungka ri wawonya, inceʼe ri wawo pura-puranya. 32Siʼa mampau kono anu nakita pai nadongemo, paikanya bereʼe mau sambaʼa tau anu mampoaya monco posabinya. 33Tau anu mangampoaya monco posabinya setu, mangaʼaku kamonco i mPue Ala. 34Maka tau anu ndapokau mPue Ala, mampobambarika waʼa nuntu mPue Ala, ua Inosa mPue Ala ndawai mangkuasai siʼa. 35#Mat. 11:27, Luk. 10:22 Ua katowe ndaya mPapa ri Ana-A, painaka waʼa ngkuasa ndawaikamo siʼa. 36Tau anu meaya ri Ana setu, siʼa da mangarata katuwu anu monco pai bereʼe kapusanya. Paikanya tau anu bareʼe mepoʼinaya ri Ana setu bareʼe da mangarata katuwu. Siʼa ndahuku i mPue Ala rantani masae-sae.
Àwon tá yàn lọ́wọ́lọ́wọ́ báyìí:
YOHANE 3: LAIPMF
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀