Matius 10
10
Yesus nangkio hampulu rodua rasul
(Mrk. 3:13-19; Luk. 6:12-16)
1Hangkani tempo, Yesus nangkiora hampulu rodua ana guru-Na to laiuli-Na rasul, pade nampawaikara baraka mampopalai anudaa to nampehuai tauna pade mampakauri to nohaki bo to napungku. 2Eimi hangara rasul to hampulu rodua ee. Pamulana, Simon to laikahangai mui Petrus pade Andreas tuaina, napu ee Yakobus ana Zebedeus pade Yohanes tuaina, 3Filipus, Bartolomeus, Tomas, Matius to peduhu paja, Yakobus ana Alfeus, Tadeus, 4Simon lako kahiromua Zelot#10:4 Zelot ei hanga kahiromua to Yahudi to nampaewa to poparenta Roma. pade Yudas Iskariot to mampobalu Yesus mei.
Yesus nampahuro hampulu rodua rasul
(Mrk. 6:6b-13; Luk. 9:1-6)
5Yesus nampahuro rasul to hampulu rodua ee pade laiboha-Nara, “Nemo komi rau i ngatara to moma to Israel pade nemo komi mehua i ngata to Samaria, 6naupawee koimo komi hi hira to Israel, to nahibali hante bimba to nahalatara. 7Koi karebaimi iwei, ‘Namohumi tempona Alatala moparenta halaku Magau.’ 8Pakaurira to nadua, pakatuwu nculi tauna to namate, pakaurira tauna to nohaki kusta pade popalaira anudaa to nampehuai tauna. Baraka etu mai laiwai mara moto komi. Aji kana mitulungi mara moto mui tau ntanina.
9Nemo mikeni doi bulawa, doi halaka, ba doi tambaga i rara kantomi. 10Nemo komi mangkeni bokumi i rara pomakoami, nemo komi mangkeni waru, nemo komi mangkeni hapatu pade lua, habana to pobago mahipato mantarima napa to iparaluuna lako hi tauna to laitulungina.
11Ane mehua komi i rara hangu ngata, palimi hadua tauna to madota mantarima komi hante goe rarana, pade katidamo komi i ria dohena duu meongko komi rau ngata ntanina. 12Ane mehua komi i hangu hou, ulimi hi tumpu hou, ‘Pue mantiroi komi.’ 13Ane tumpu hou ee mantarima komi hante goe rarara, ratarimarami petiroi lako hi Alatala. Bo ane moma komi ratarimara, petiroi to laiulimi ee mitarima komi moto. 14Ane maria hadua moma mantarima komi pade moma mangepe to laiulimi, pehuwumo komi lako hou ba ngata ee pade tontahi awu lako paami mampalingaira ane Nahukura mei Alatala. 15Mpuu-mpuu Ku'ulika komi, tempo eo pobotuhia, melabipi pehuku to ratarimara lako pehuku to ratarimara todea ngata Sodom pade Gomora owi to nadaa mpuu ingkura.”
Kahehaa to marata mei pade pangakua hi Yesus
(Mrk. 13:9-13; Luk. 12:2-9; 21:12-19)
16“Hilo, Aku mampahuro komi ewa bimba to rau i lentongo serigala. Etumo, maingahawo ewa ule, pade malori rara ewa tonci bangkebodo. 17Kana mainga komi hi humawee tauna, habana mariara mei to mangkeni komi i pobotuhia agama pade racambura komi i hou-hou pepuea. 18Komi mei rakeni i tingoora to poparenta pade magau-magau habana peparahayami hi Aku. Tempo eemi logami mangkewo nangkambelai Aku hi to poparenta pade hi hira to moma Yahudi. 19Pangkenira komi, nemo mamere rarami nangkambelai napa to miulikara pade bewa komi mei mehono hi hira, habana tempo ee mui mei Alatala moto mampawaika komi noto napa to kana miuli. 20Apa napa mei to miuli moma meumba lako pampekirimi moto. Naupawee, Inoha to Nagaha lako Tuamami to i huruga to mampakanotoka komi napa to kana miuli.
21Marata mei tempona, tauna mampopewai ompina rapatehi. Wetu moto mui to tuama mampopewai anana rapatehi. Ngana-ngana mei me'ewaramo hi totuara pade mampopewai totuara rapatehi.
22Komi mei rapodaa humawee tauna habana peparahayami hi Aku. Naupawee, tauna to matigu duu kahuduana, Napakahalama Alatala. 23Ane rapakahehara komi i hangu ngata, palaimo komi rau i ngata ntanina. Apa mpuu-mpuu Ku'ulika komi, Ana Manuhia mei marata kapomami mahudu mangkarebai Kareba Belo i humawee ngata i Israel.
24Moma naria ana guru to nelabi lako guruna ba hadua batua nelabi lako maradikana. 25Maganami ane hadua ana guru mahibali hante guruna pade hadua batua mahibali hante maradikana. Ane Aku raulira Beelzebul#10:25 Beelzebul ei hanga ntani Magau Heta. , magau humawee heta, neparauli komi to pantuku-Ku. 26Aji, nemo komi maeka hi hira to mampaewa komi. Habana moma naria to laitabuhini to moma rahungke pade moma naria to laipopalerui to moma makewa. 27Napa to laiulika-Ku bongo komi, kewomi hi humawee tauna. Napa to laitewai i talingami, karebaimi hi todea lako wumu hou.
28Nemo komi maeka hi hira to mamala mampatehi wotomi naupawee momara nabaraka mampatehi inohami. Alatala aga to kana mipokaeka apa nabaraka-'I mampatehi inoha bo wotomi i rara naraka. 29Ncanimi motomi ane romaa tonci rone laioli hampeka doi see aga. Naupawee, moma naria hamaa tonci rone ee to manawu i tana, ane moma Napodota Tuamami Alatala. 30Neparauli komi. Butu ngkau wuluami napumi laibila. 31Etumo, nemo maeka apa nelabipi pampotowe-Na komi Alatala lako nadea maa tonci rone.
32Hema-hema to mampangaku-'A i tingoo manuhia ane hia to pantuku-Ku, Aku mui mei mampangaku'i i tingoo Tuama-Ku i huruga ane hia ee to nantuku-'A. 33Naupawee hema-hema to mampehapuka-'A i tingoo manuhia, Aku mui mei mampehapuka'i i tingoo Tuama-Ku i huruga.”
Nakoro nantuku Yesus naupawee naria tomona
34“Nemo mipekiri ane Aku narata nangkeni pohingkabelo i dunia. Moma-'A narata nangkeni pohingkabelo. Narata-'A nangkeni pohiwali. 35#Mi. 7:6 Apa hante karata-Ku, ngana balailo mampaewa tuamana, ngana bangkele mampaewa tinana pade mania bangkele mampaewa panianana bangkele. 36Tauna to nantuku-'A, raewara tauna to nohancou hante hia moto. 37Hema-hema to mampotowe tuamana ba tinana melabi lako pampotowena-'A, moma'i mahipato mawali to pantuku-Ku. Pade hema-hema to mampotowe anana balailo ba anana bangkele melabi lako pampotowena-'A, moma'i mahipato mawali to pantuku-Ku. 38Hema-hema to moma madota mangkolo kahehaa duuna mamate pade mantuku ingku-Ku, moma'i mahipato mawali to pantuku-Ku. 39Hema to mampetahai tuwuna, kana makarontoa tuwuna. Naupawee, hema-hema to makarontoa tuwuna habana Aku, kana narata moto mei tuwuna.”
40“Hema-hema to mantarima komi, hia mui nantarima-'A, pade hema-hema to mantarima-'A, hia mui nantarima Tuama-Ku to nantudu-'A tumai. 41Hema-hema mantarima hadua nabi halaku nabi, hia mei mantarima tomo lako Alatala mahibali hante tomo to laitarima nabi, pade hema-hema mantarima tauna to nanoro halaku tauna to nanoro, kana mantarima tomo lako Alatala mahibali hante tomo tauna to nanoro. 42Hema-hema to mampawaika nau hacangkiri ue ngongo aga hi tauna to nakahiahi habana to nakahiahi ee to pantuku-Ku, mpuu-mpuu Ku'ulika komi, natantu amimi tauna ee mantarima tomo lako hi Alatala.”
Àwon tá yàn lọ́wọ́lọ́wọ́ báyìí:
Matius 10: MYL
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀