Matius 9
9
Yesus nampakauri to napungku i Kapernaum
(Mrk. 2:1-12; Luk. 5:17-26)
1Naliu ee, nencawimi Yesus hante ana-ana guru-Na i rara duanga pade nedipo nculi rano ee duura narata i ngata po'ohaa-Na. 2Lauparia, narataramo bahangkua dua tauna hi Yesus nangkowa hadua to napungku to noturu i lolo alina moto'i. Pampahilo-Na Yesus peparahayara, iulika-Nami to napungku ee mai, “Pakaroho raramu ana, doha-dohamu laiampunimi.”
3Bahangkua dua to nataualu buku Taurat to i hee, nanguli rara bongora, “Hia ei nampahauru Alatala!”
4Naupawee laincani-Na Yesus napa to laipekirira, pade iulika-Nara, “Napa pade nampekiri to nadaa komi i rara bongomi? 5Mamala-'A manguli hi tauna ei, ‘Dohamu laiampunimi’ ba ‘Pokangkoremoko pade pomakomoko.’ Uma to mipokono Ku'uli? 6Bona mincani, Ana Manuhia nabaraka moampuni doha i dunia ei.” Napu ee, Yesus nangulika to napungku ee, “Pematamoko, ongkomi alimu pade panculimoko rau i houmu.” 7Nemata mpuumi tauna ee pade raumi i houna.
8Pampahilora todea ee napa to nadupa lauria, namangka purara pade nampaune Alatala to nampawai manuhia baraka bohe to ewa ee mai.
Matius to peduhu paja nantuku Yesus
(Mrk. 2:13-17; Luk. 5:27-32)
9Peongko-Na Yesus lako i hee, laihilo-Na hadua tauna to ikahangai Matius noncuna i hou popahirurua paja. Yesus nangulika'i, “Tuku-'Amo.” Neongko mpuumi Matius rau nantuku-'I.
10Tempo Yesus nangkoni i hou Matius, narataramo to peduhu paja hante tauna to nadoha ntanina nangkoni dohe Yesus hante ana-ana guru-Na. 11Pampahilora to Farisi lauria, nojaritaramo hi ana-ana guru Yesus, iulira, “Napa pade Gurumi nangkoni dohera to peduhu paja pade to nadoha?”
12Laiepe-Na Yesus to laipojaritara pade iuli-Na, “Tauna to naseha moma namparaluu dokutoro. Tauna to nadua aga to namparaluu dokutoro. 13#Hos. 6:6 Aji, koimo komi pade peguruimi napa patuju lolita Alatala to nanguli iwei, ‘To laipodota-Ku, ahi rara, moma kurban.’ Apa Aku narata i dunia, moma-'A mangkio tauna to nanoro, naupawee narata-'A mangkio tauna to nadoha.”
Patudu Yesus moma mamala rapomegalo hante ada kabiahaa
(Mrk. 2:18-22; Luk. 5:33-39)
14Napu ee, narataramo ana guru Yohanes to Pediu rau hi Yesus pade nampekune-'I, “Napa pade kami hante to Farisi naharo kami nopuaha nantuku ada kabiahaata, bo hira ana guru-Mu moma?”
15Yesus nampahonoira, “Moma nahipato bale-bale pongante balailo madua rarara ane laipodohera i heedipi pongante balailo ee. Naupawee, marata moto mei tempona pongante balailo ee ra'ala lako hi hira. Tempo ee mei pade mopuaharada.
16Moma hema haduaa tauna motampala waru to nauha hante potaia kae to nabou, apa ane rapowee'i, kae bou to laipake notampala ee mei, mampadii kae to nauha ee mai, alaana mabohekimi kabentaa waru ee. 17Wee moto mui ue anggur to nabou, moma'i laikahini rara kuhita kuliba to nauha. Apa ane wee, mabentami kuhita kuliba ee hampena mabubumi anggur ee pade kuhita kuliba ee mai marotami. Ue anggur to nabou kana rakahini i rara kuhita kuliba to nabou, bona ue anggur bo kuhita kuliba ee mai manimpu hingkani moto'i.”
Ana to pangkeni i hou pepuea pade bangkele to nohaki noraa
(Mrk. 5:21-43; Luk. 8:40-56)
18Bula Yesus nampojarita humawee lauria hi ana-ana guru Yohanes to Pediu, ngkali narata hadua to pangkeni i hou pepuea, notingkodu i tingoo Yesus pade nanguli, “Anaku bangkele lako namate ntoto'i. Kuperapi, rauta olu i houku pade Muboli pale-Mu i wotona bona matuwu nculi'i.” 19Lauparia, neongkomi Yesus hante ana-ana guru-Na nantuku tauna ee.
20Bulara nomako, ngkali naratami hadua bangkele to hampulu rompaemi naharo noraa. Bangkele ee mai nampamohuki Yesus lako talikua-Na pade nantui wuntu waru Yesus. 21Apa laipekirina, “Ane kutuidimi wuntu waru-Na, mauri'amo.”
22Lauparia, Yesus nampeili bangkele ee mai pade nangulika'i, “Pakaroho raramu ana, peparahayamu hi Aku nampakauriko.” Tempo ee mui, naurimi bangkele ee mai.
23Karata Yesus i hou to pangkeni ee, laihilo-Na to potawui tulali habana najuu rarara pade nadea tauna nogeho nangkakeohi to mate ee. 24Laiulika-Nara, “Panculimo komi, apa moma'i namate ngana ei mai. Naleta moto'i.” Naupawee, laitawanakara moto-'I.
25Hangka laipopehuwurapa tauna to nadea ee lako rara hou, nehuami Yesus rau nangkakamu pale ngana ee, pade ngana ee natuwu nculimi. 26Lauparia, notolelemi kareba nangkambelai to nadupa lauria nahobo i ngata ee pade ngata-ngata to namohu lako hee.
Yesus nampakauri rodua tauna to naburo
27Neongkopi Yesus lako i hee, rodua tauna to naburo nantuku-'I pade ngare-ngarena nanguli, “Muli Magau Daud#9:27 Muli Magau Daud ei mai hanga peatu hi Yesus to biahana laipake to Yahudi nangkahangai Magau to Pepakahalama to laitipa Alatala., potowe kamikawo.”
28Pehua Yesus i rara hangu hou, nehua muirahawo to naburo ee nampotomuka Yesus. Alaana, nepekunemi Yesus hi hira, “Laiparahayami ane naria baraka-Ku mampakauri komi?”
Nehonora, “Io Pue. Laiparahaya kami.”
29Lauparia, Yesus nodama matara pade iuli-Na, “Maurimi matami, mantuku peparahayami.” 30Tempo ee mui narawami penaara to naburo ee. Napu ee Yesus nampatagira, iuli-Na, “Nemo maria haduaa tauna mikewoka napa to nadupa hi komi ei.” 31Naupawee, momara nepangala. Rau oara nampopotolele kareba nangkambelai Yesus nahobo i ngata ee pade ngata-ngata to namohu lako hee.
Yesus nampakauri hadua to nabobo
32Pehuwura rodua tauna to naburo lako i hee, ngkali narata muiramo tau ntanina nangkeni hi Yesus hadua to nabobo habana laipehua anudaa. 33Hangka laipopalai-Napi Yesus anudaa ee, namalami tauna ee nojarita. Namangka purara tauna to nadea ee nampahilo to nadupa lauria. Iulira, “Poma naria kajadia to ewa ei laihilo kami nadupa i Israel.”
34Naupawee, hira to Farisi nanguli, “Laipopalai-Na heta hante baraka Magau Heta.”
Ahi rara Yesus hi todea
35Yesus noliliko i humawee ngata bohe bo ngata kodi, nopatudu tauna i hou-hou pepuea, nangkarebai Kareba Belo nangkambelai bewa Alatala noparenta halaku Magau pade nampakauri to nohaki bo to napungku.
36Pampahilo-Na Yesus todea ee, nehuwu ahi rara-Na hi hira, habana nahehara pade moma naria to nantulungira, nahibali hante bimba to moma naria to poewura. 37Alaana Yesus nangulika ana-ana guru-Na, “Nadeamo tauna nahadia mantarima Kareba Belo. Hira ee mai nahibali ewa pae to natahami, totonami rasangki. Nadea mpuu pae to rasangki, naupawee to posangki momara nadea. 38Aji, perapimi hi Alatala Tumpu pae ee bona Natudu to posangki rau mosangki pae-Na.”
Àwon tá yàn lọ́wọ́lọ́wọ́ báyìí:
Matius 9: MYL
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀