ลามูลา 11
11
รูมัฮ ตีงี เดะ นังฆรี บาบีโลน
1วะตู อีตู_ ซือมียา ซือมูฮา เดะ ดือนียา_ อาดา ซา บาซา_ อาดา ปือมือเลา ซือรูปา. 2ตานา กูญา ปาคัจ บือฌาลัด ปี มาแรฮ_ ดาตัก เดะ โซะ ตีมอยํ_ กูญา ดาปัจ ตือปัจ ตานัฮ นู ซามา_ โซะ นังฆรี ซีนา. กะฆีเตอ_ กูญา ปาคัจ ดูโดะ ปัจ อีตู. 3กูญา ปาคัจ มือเลา จะ_ “บอฮ_ บรี กีตา บูวัจ บาตา เลอ_ ตูนู บรี ตือฆัยํ.”_ กะฆีเตอ_ กูญา ซูโรฮ บาตา ฆาตี บาตู_ ซูโรฮ มีญะ ฮีตับ ฆาตี ซือแมน.
4กะฆีเตอ_ กูญา มือเลา จะ_ “บอฮ_ บรี กีตา บูวัจ นังฆรี ซา นังฆรี_ บูวัจ รูมัฮ ตีงี บรี ฮูโฌก ดาปิก รอจ กะ ลาแงะ. บรี กีตา อาดา ปือนามา_ บรี กือนา มือโอจ. เตด กะฆีเตอ_ กีตา นะ กือนา บูวัจ บรี ปือจัฮ บือลัฮ ปี_ ราตา เดะ ดือนียา.”
5กะฆีเตอ_ ตูฮัด บือซัยํ เดะ อาตัซ เตอ_ ญา ตูโรด มาแรฮ ตีญุง ลีฮัจ นังฆรี_ ฌางัน รูมัฮ ตีงี_ นู โกะ ซือมียา บูวัจ ดัฮ. 6กะฆีเตอ_ ตูฮัด บือซัยํ เดะ อาตัซ มือเลา จะ_ “ลีฮัจ เลอ_ กูญา ฌาดี ซา บักซา_ อาดา ซา บาซา. อีนี เลอ_ ฌาดี ลาฆู ลามูลา_ นู กูญา ฮืนตะ นะ บูวัจ ดัฮ. กูญา อีงัจ นะ บูวัจ นามา โปด_ บูวัจ บือเลฮ ฮาปา. 7กะฆีเตอ_ กามี นะ ตูโรด ปี_ นะ บูวัจ บรี บาซา นะ กูญา กือลาจุ_ ตือปัจ อีตู_ บีดา ตีเมา บรี กูญา มือเลา มาโซะ เดะ ฮาตี บาซา นะ กูญา ซิกมาซิก บือเลฮ”_ ตูฮัด ญา จะ.
8กะฆีเตอ_ ตูฮัด บือซัยํ เดะ อาตัซ_ ญา บูวัจ บรี กูญา อีตู ปือจัฮ บือลัฮ ตรือเบะ เดะ ตือปัจ อีตู_ ปี ราตา ตือปัจ เดะ ดือนียา. กะฆีเตอ_ กูญา บราดู บูวัจ นังฆรี อีตู ดัฮ. 9ซาเบะ กะฆีนี เลอ_ ปือนามา นังฆรี อีตู กือนา บลาโลก จะ_ บาบีโลน#11.9 บาบีโลน เฆอ นะ บาเบน เดะ บาซา ฮีบรู ปือนามา อีนี ดืองัยํ ซือรูปา กะ ปือมือเลา จะ “กือลาจุ.”_ กรานา ตือปัจ อีตู เลอ_ ตูฮัด บือซัยํ เดะ อาตัซ บูวัจ บรี บาซา_ นะ ลูมอฮ ซือมียา ราตา ดือนียา_ กือลาจุ ดัฮ. ดาตัก เดะ นังฆรี อีตู เลอ_ ตูฮัด บือซัยํ เดะ อาตัซ_ บูวัจ บรี ลูมอฮ ซือมียา ปือจัฮ บือลัฮ ปี_ ราตา ตือปัจ เดะ ดือนียา ดัฮ.
บือแนฮ นะ เชม
(1 จรือตา 1.17-27; ลูกา 3.34-36)
10ตะเดะ อีนี_ ฌาดี บือแนฮ นะ เชม. กาลา เชม อูมอยํ นะ ญา ซือราตุซ (100) ตาโฮด_ ญา โปด_ บือเลฮ นานะ ปือนามา อาระปักชาด_ ลือปัซ เดะ นู อาเย อาโปฮ ดูวา ตาโฮด. 11ตะเดะ เชม ญา อาดา นานะ ปือนามา อาระปักชาด ดัฮ_ อูมอยํ นะ ญา โปด_ ปาญัก ปี ลีมา ราตุซ (500) ตาโฮด ลาฆี. ญา อาดา นานะ กีลากี_ นานะ นีบีนี_ บาญะ อูรัก.
12กาลา อาระปักชาด อูมอยํ นะ ญา_ รอจ กะ ตีฆา ปูโลฮ ลีมา (35) ตาโฮด_ ญา บือเลฮ นานะ ปือนามา เซลัฮ. 13ตะเดะ อาระปักชาด บือเลฮ นานะ ปือนามา เซลัฮ ดัฮ_ ญา อาดา ฮีโดะ ลาฆี ปัจ ราตุซ ตีฆา (403) ตาโฮด_ อาดา นานะ กีลากี_ นานะ นีบีนี_ บาญะ อูรัก.
14กาลา เซลัฮ อูมอยํ นะ ญา_ รอจ กะ ตีฆา ปูโลฮ (30) ตาโฮด_ ญา บือเลฮ นานะ ปือนามา เอเบอ. 15ตะเดะ เซลัฮ บือเลฮ นานะ ปือนามา เอเบอ ดัฮ_ ญา อาดา ฮีโดะ ลาฆี ปัจ ราตุซ ตีฆา (403) ตาโฮด_ อาดา นานะ กีลากี_ นานะ นีบีนี_ บาญะ อูรัก.
16กาลา เอเบอ อูมอยํ นะ ญา_ รอจ กะ ตีฆา ปูโลฮ ปัจ (34) ตาโฮด_ ญา บือเลฮ นานะ ปือนามา เปเลก. 17ตะเดะ เอเบอ บือเลฮ นานะ ปือนามา เปเลก ดัฮ_ ญา อาดา ฮีโดะ ลาฆี ปัจ ราตุซ ตีฆา ปูโลฮ (430) ตาโฮด_ บือเลฮ นานะ กีลากี_ นานะ นีบีนี บาญะ อูรัก.
18กาลา เปเลก อูมอยํ นะ ญา_ รอจ กะ ตีฆา ปูโลฮ (30) ตาโฮด_ ญา บือเลฮ นานะ ปือนามา เรอู. 19ตะเดะ เปเลก บือเลฮ นานะ ปือนามา เรอู ดัฮ_ ญา โปด_ อาดา ฮีโดะ ลาฆี ดูวา ราตุซ ซือมีลัด (209) ตาโฮด_ บือเลฮ โกะ นานะ กีลากี_ นานะ นีบีนี บาญะ อูรัก.
20กาลา เรอู อูมอยํ รอจ กะ ตีฆา ปูโลฮ ดูวา (32) ตาโฮด_ ญา บือเลฮ นานะ ปือนามา เซรุก. 21ตะเดะ เรอู บือเลฮ นานะ ปือนามา เซรุก ดัฮ_ ญา อาดา ฮีโดะ ลาฆี ดูวา ราตุซ ตูโฌฮ (207) ตาโฮด_ บือเลฮ นานะ กีลากี_ นานะ นีบีนี_ บาญะ อูรัก.
22กาลา เซรุก อูมอยํ นะ ญา_ รอจ กะ ตีฆา ปูโลฮ (30) ตาโฮด_ ญา บือเลฮ นานะ ปือนามา นาโฮระ. 23ตะเดะ เซรุก บือเลฮ นานะ ปือนามา นาโฮระ ดัฮ_ ญา อาดา ฮีโดะ ลาฆี ดูวา ราตุซ (200) ตาโฮด_ บือเลฮ นานะ กีลากี_ นานะ นีบีนี_ บาญะ อูรัก.
24กาลา นาโฮระ อูมอยํ นะ ญา_ รอจ กะ ดูวา ปูโลฮ ซือมีลัด (29) ตาโฮด_ ญา บือเลฮ นานะ ปือนามา เทรัฮ. 25ตะเดะ นาโฮระ บือเลฮ นานะ ปือนามา เทรัฮ ดัฮ_ ญา อาดา ฮีโดะ ลาฆี ซือราตุซ ซือมีลัด บือลัซ (119) ตาโฮด_ บือเลฮ นานะ กีลากี_ นานะ นีบีนี_ บาญะ อูรัก.
26กาลา เทรัฮ อูมอยํ รอจ กะ ตูโฌฮ ปูโลฮ (70) ตาโฮด_ ญา บือเลฮ นานะ ปือนามา อับราม_ นาโฮระ_ ฌางัน ฮาราน.
บือแนฮ นะ เทรัฮ
27ตะเดะ อีนี ปี_ ฌาดี บือแนฮ นะ เทรัฮ. เทรัฮ อาดา นานะ กีลากี_ ปือนามา จะ_ อับราม_ ฌางัน นาโฮระ_ ฌางัน ฮาราน. ฮาราน อาดา นานะ กีลากี_ ปือนามา จะ_ โลด. 28ตาปี ฮาราน ญา มาตี ดูลู เดะ เทรัฮ_ อาโปก เดะ ญา_ เดะ นังฆรี นะ ญา_ ฌาดี จะ_ เดะ ตูโปะ อูระ_ นังฆรี นะ ลูมอฮ คันเดีย. 29อับราม ฌางัน นาโฮระ_ กูญา ปาคัจ อาเมด บีนี. บีนี นะ อับราม ปือนามา จะ_ ซารัย. บีนี นะ นาโฮระ_ ปือนามา จะ_ มิละคา. มิละคา ฌาดี นานะ นีบีนี นะ ฮาราน_ นู ฌาดี อาโปก นะ มิละคา ฌางัน อีซะคา. 30ตาปี ซารัย ญา ฌาดี ซือมือโฆจ_ ฮอย นานะ ดัฮ.
31เทรัฮ บาวา อับราม_ นานะ นะ ญา_ ฌางัน โลด_ นานะ นะ ฮาราน_ นู ฌาดี จูจู นะ ญา_ ฌางัน ซารัย_ มือนาตู นะ ญา_ นู ฌาดี บีนี นะ อับราม. ญา บาวา กูญา บือปี บือซามา_ ตรือเบะ เดะ ตูโปะ อูระ_ นังฆรี ลูมอฮ คันเดีย_ บีดา นะ มาโซะ ปี กะ นังฆรี คานาอัน. ตาปี กาลา รอจ กะ นังฆรี ฮาราน_ กูญา ดูโดะ ปัจ อีตู. 32เทรัฮ อูมอยํ นะ ญา ดูวา ราตุซ ลีมา (205) ตาโฮด_ ญา บารู มาตี_ เดะ นังฆรี ฮาราน.
Àwon tá yàn lọ́wọ́lọ́wọ́ báyìí:
ลามูลา 11: ULBIBLE
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀