ZAA 'BƆGƲ 10
10
Zezwi yɛ ɔjɩ 'bhlabhlɩɛ ngokʋnyɔ 'wʋ palɩ
1Zezwi nɛ: “Sa'a n gba-a sa'a naa: -Ɔ la'a -ɔ -yɛ nʋ ɔ 'yɛ -ma 'bhlabhlɩɛ -gbʋ 'mö pla nʋ, ɔ nɩ -bha ngwlele ngli planɩ ɔ -yɛ -gbʋ 'wlu 'plɩnɩ-ɛ, 'winyɔ -yɛ 'kulɩbhanyɔ 'sɔ ɔ glɩnɩ -bha. 2-Ɔ la'a -ɔ planɩ-ɛ -bha ngwlele ngli-e, 'bhlabhlɩɛ ngokʋnyɔ -bha. 3-Bha klanakʋnyɔ kalɩ-a ɔ yɛ, 'bhlabhlɩ -ji ɔ wɛlɩ, 'n ɔ wɔzɩnɩ-a ɔ 'bhlabhlɩ ɩ 'nglɩ 'mö -bhlʋ -bhlʋ 'n ɔ pɩ-a 'pɩ. 4Ɔ -yɛ bhlabhlɩ -ɩ -yɛ-a ɔ -li 'pɩ 'pa, ɩ -ji ɔ wɛlɩɛ yɛ ɔ -ganɩɩ 'yu, 'n ɩ -ga-a -ma ɔ nimï. 5Ɩ'ɩ kabönɩkpaa wɛlɩ -jie yɛ, yawʋ ɩ ji-a kabönɩkpɛ -guo, ɩ 'na 'kɔ 'bɩ mö.” 6Zezwi 'panʋa-a nine la'a, wa 'nɩa-a 'mö 'nʋ, 'manɩɛ 'bhëë gbʋ ɔ gba wa 'nʋ -ji.
7Ɩ yɛ Zezwi nɛ -bha wa de 'sɔ naa: “'Dɩɛ -dɩ n nyɛya -bha naa: -Amö-ö -yɛ-a 'bhlabhlɩɛ -gbʋɔ ngwlele. 8-Wa bhuo-o -ganɩ'ɩ-a 'yu -wa ji-a, 'wingwa -yɛ 'kulɩbhangwa 'sɔ wa glɩnɩ -bha, 'bhlabhlɩ 'nʋa-a 'yukwli pönɩ. 9-Amö-ö -yɛ-a ngwlele, nɩkpɛ -yɛ -bha 'ma ngwlele la'a ngli planɩ-ɛ, 'pʋɔ ɔ ji -bha. Ɔ bhɛlɩ ɔ 'yɛ pla, ɔ 'yɛ 'pɩ 'wlʋ ɔ 'pɩ 'yɛ 'yɛ plonʋ. 10'Winyɔ -yɛ -nɩ ji-e, ɔ 'yɛ 'wi ghli, ɔ 'yɛ 'lɩbha ɔ 'yɛ sɛ -saa yɛ -bha. -Amöö -nɩ, -wʋʋ yɛ n ji-e na-a, 'bhlabhlɩ 'yɛ 'pɩɛ pɩ ghlɩ ɩ 'pɩ 'yɛ -gömö bhlinɩɛ yɛ -bha. 11-Amö-ö -yɛ-a 'bhlabhlɩɛ ngokʋnyɔɔ -ngokʋnyɔ. 'Bhlabhlɩɛ ngokʋnyɔɔ -ngokʋnyɔ, ɔ 'pɩ ɔ zʋ-a ɔ 'bhlabhlɩɛ yɛ. 12Libhonʋnyɔ -ɔ 'nɩ-a 'bhlabhlɩɛ ngokʋnyɔ glɩnɩ, -ɔ 'nɩ 'yɛ-a 'bhlabhlɩ nyini-e, ɔ -yɛ gbi yɩlɩ ɛ -yɛ ji 'le -wʋ-ɔ, -bha ɔ tɩ-a 'bhlabhlɩ 'n ɔ fito -bha. 'N gbi lɩbha-a bhlabhlɩ -mɩmɩ 'n -mɩbha -dɩdɩnɩ -bha. 13-Ɔ la'a -ɔ nʋ-ɔ -sɩbha, libhonʋnyɔ -ɔ wa 'pɛnɩ-a mɔ-ɔ -bha, ɔ gbʋ 'nɩ 'bhlabhlɩ 'mö -wʋ. 14-Amö-ö -yɛ-a 'bhlabhlɩɛ ngokʋnyɔɔ -ngokʋnyɔ, n -ji na 'bhlabhlɩ, na 'bhlabhlɩ ji'i, 15sa na -Tɩbha ji'i-a, 'n n -ji-a na -Tɩbha. Na 'pɩ n zʋ-a na 'bhlabhlɩɛ yɛ. 16N ka bhlabhlɩ -mɩmɩ -ɩ 'nɩ-ɛ ma'a -gbʋ la'aa 'mö -wʋ. 'Mɩ bhlabhlɩ la'a jie n -nyɩɩ ji -bha, ɩ 'yɛ-a na wɛlɩ 'yukwli pönɩ, 'bhlabhlɩɛ -zakpa 'yɛ-a -bhlʋ -wʋ, 'n ɩ ngokʋnyɔ 'yɛ-a -bhlʋ -wʋ. 17Na 'pɩ n zʋ -bha 'bhë, n 'kɛ 'wʋ 'libhï 'sɔɔ yɛ na -Tɩbha -jɩbha'a -bha. 18-Bɛ 'na -kamɩ'ɩɛ cɛ'ɛ -sa, na bhë-ë zʋɛ-a najɩ 'wʋ. N ka 'gba n 'yɛ na 'pɩ zʋ, n ka 'gba n 'kɛ 'yɛ 'wʋ 'libhï 'sɔ. -Sɩbha na -Tɩbha nyɛ'ɛ-a 'dɩ.”
19Wɛlɩkïbhï Zezwi gba-a la'aa yɛ, -ma 'zwiföa nyɩdɩ 'mödlinɔ 'wlʋ 'yɛ-ɛ -ma 'sɔ. 20-Ma wa gla'aa nɩkpaa -bɛ nɛ: “'Jinylozuzuko ɔ ka-a -gömö, gwɩ-ɩ -wʋɔ-a köbha 'le, 'manɩɛ yɛ a pönɩɔ bhe 'yukwli 'nɩ?” 21-Mʋmʋa nɛ: “Ɔ wɛlɩ 'nɩ 'jinylozuzukoo -gömökanyɔɔ -lie swɩ -wʋ. 'Jinylozuzuko bhɛlɩ-a a 'yɛ 'lɔkpɔlɔkpɔngwaa 'jie kalɩ-ɛ?”
Zezwi nɛ -Lagɔɔ 'Gu ɔ glɩnɩ -bha
22Wotlokojido'o, wa-a -ma Zelwizalɛmö -Lagɔbudu 'kadʋɔ 'pɩpɩ 'wʋ, 23-ma -Lagɔbudu 'kadʋ 'mö Zezwi-e -ma 'wʋ binɩ 'le, 'n ɔ tʋtʋnʋ-ɔ -bha ngwlele wa la-a Salomɔɔ ngwlele zɔmö 'mö. 24'Zwiföa palɩɔ-a -di 'mö, wa nɛ -bha ɔ de naa: “-Zlɩmɩ -n ji bhe-a 'mö -aa dlɩa -gbaghayɩ -saa 'nɩ? -Nmö -yɛ Puanyɔ -ɔ -Lagɔ -sa-a -bha glɩnɩ-ɛ, -sanɩya 'dɩ gbaa.” 25Zezwi -sa-a -gömö, ɔ nɛ naa: “N kaya 'dɩ -sanɩ 'bhë a 'nɩɩ dlɩ 'wʋ -ka, libho n -wʋ-ɔ na -Tɩbhaa 'nglɩ 'mö nʋnʋ 'le, mʋ-ʋ sa-a na 'dɩ. 26A'a na 'bhlabhlɩ gla'aa 'bhlabhlɩ glɩnɩɛ yɛ a 'nɩɩ-a -nɩ dlɩ 'wʋ -ka. 27Na 'bhlabhlɩ -ji na wɛlɩ, n -jiɩ, 'n ɩ -ganɩ'ɩ -bha. 28'Kɔgwlɛpɩ n nyɩ -bha, ɩ 'na tlɩ 'lɩlɩlɩ, -bɛ 'na -kamɩ'ɩ cɛ'ɛ -sa. 29Na -Tɩbha -ɔ -nyɛmɩ'ɩ-a 'ye, ɔ 'ghli-i ɔ zi -li 'bhuo 'wʋ, -bɛ 'nɩ bhɛlɩ ɔ 'kɩ na -Tɩbha cɛ'ɛ -sa. 30N -yɛ -Tɩbha 'sɔ -bhlʋ -a -wʋ -bha.”
31Ɔ gba-a -sɩbha, 'n 'zwiföa ji-a tɩkpaku 'libhï 'sɔ wa 'kɔ 'mö 'lɩbhaa yɛ. 32'N Zezwi jua-a ngli 'jɩbha naa: “-Lie -li -ɩ 'bhönɩ-ɛ -ma -Tɩbha 'mö, ɩ -bebe n tuluanɩya-a 'ji, -ma ɩ gla'aa -lu -mʋɔ yɛ a ji'i-a tɩkpaku 'mö 'lɩbhaa 'nɩ?” 33'Zwiföa nɛ: “-A -nɩmö-ö libhoo -libho -n nʋ-aa yɛ tɩkpaku 'mö 'lɩbhaa ji, -Lagɔ -n nyimanɩ-a nglie yɛ -bha. -Nmö glɩnɩ-a nɩkpɛ 'bhë, -Lagɔ wʋ -n libhï-ë -najɩ 'wʋ.” 34Zezwi nɛ naa: “Köbhë la'a 'nɩ sa'a -ma a gböö 'bɔgʋ 'mö 'cɛlɩɔ-ɔ naa:
-Lagɔ nɛ: -Lagwɩ a glɩnɩ -bha-a?
35'Ma wɛlɩköbhë la'a -Lagɔ gba-a, nɩkpa -wa 'nʋ-a -Lagɔwɛlɩ 'mʋa ʋ la-a -lagwɩ. -Mɩlado'o a 'bhï -ji sɛ naa wɛlɩ -ɩ 'cɛlɩɔ-ɔ -ma -Lagɔwɛlɩɛ 'bɔgʋ 'mö -bɛ 'nɩ bhɛlɩ ɔ 'kɩ sɛ -sa. 36-Ɔ la'a -ɔ -Lagɔ -sa-a -bha, ʋ tia-a ma'a 'pɩ 'wʋɔ de a nʋ-a -nɩ: -Lagɔ -n -wʋ-a ngli nyimanɩ 'le, 'manɩɛ yɛ n nʋ -Lagɔɔ 'Gu n glɩnɩ-aa yɛ. 37-Ɩ n -wʋ-a nʋ 'le, ɩ nɩ na -Tɩbhaa nʋnʋli glɩnɩ-ɛ, a 'na ka'a dlɩ 'wʋ -nɩ. 38'Mɩ na -Tɩbhaa nʋnʋli 'mɩ n -yɛ nʋ 'le -wʋ-ɔ, a nɩ'ɩ na-a dlɩɛ 'bhë 'wʋ -ka oo, a -ka na nʋnʋli dlɩ 'wʋ. A 'yɛ sɛ jɩblɩnɩ -sɛɛ sɛ naa, -Tɩbha-a -ma na 'mö, n-n -ma -Tɩbha 'mö.” 39Zezwi gba-a -sɩbha, wa 'jɩbha wa 'kɔ la köbha 'sɔ, 'n ɔ jua-a cɛ'ɛ 'wlʋ.
40Zezwi -sɔ-a 'wʋ, 'n ɔ ji-e -ma Zludɛ -gömö mö 'sɔ, bhle -aa 'wʋ Za badizenɩ la-a -tɩtɛɛ do'o nɩkpa, 'n ɔ ji-e -ma sɛ glɩ-ɩ. 41Nɩkpaa -bɛ ghlɩɔ-ɔ -ma, 'n wa nʋ-a: “Za 'nɩ-ɛ bhata -bhlʋɔ 'bhë nɛ nʋ 'bhë-ë, -ɩ la'a 'bhuo ɔ gba la-a nɩkpɛ la'aa yɛ 'dɛdɛɛ -bha.” 42-Ma la'a, 'n nɩkpaa -bebe jio-a dlɩ 'wʋ -ka.
Àwon tá yàn lọ́wọ́lọ́wọ́ báyìí:
ZAA 'BƆGƲ 10: BNT96
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Bete New Testament © Bible Society of Côte d'Ivoire 1996