ZAA 'BƆGƲ 9
9
Zezwi yɛ nɩkpɛ -ɔ 'lɔkpɔ-a wa gwalɩ-a göpö
1Zezwi-e 'plɩ 'le, ɔ nyini-e -bha de -bhlʋ, 'n ɔ ji-a nɩkpɛ -ɔ 'lɔkpɔ-a wa gwalɩ-a yɩlɩ. 2'N ɔ 'wʋbhlinɩngwa jio-a ngli 'jɩbha naa: “-Abhitɩbha, nɩkpɛ -la ɔ -lowlengwaa cɛ-ɛ nʋ-a 'jinyloli 'nɩɩ, bhlɩ'ɩ ɔ bhë-ë nʋ-a 'jinylolie yɛ ɔ 'lɔkpɔ-a 'n wa jio-a gwalɩ-ɛ?” 3Zezwi nɛ: “Ɛ'ɛ -lɛ ɔ bhë-ë nʋ 'jinyloli, ɛ'ɛ -lɛ 'yɛ ɔ -lowlengwa nʋ 'jinyloli. -Lagɔɔ libho 'yɛ -ma ɔ 'mö 'tuluanɩɔɔ yɛ ɔ 'lɔkpɔ-ɔ -bha. 4Bhla zlɩ -ga -bhla, -a bhɛlɩ -a 'yɛ -ɔ tia'a-a libho nʋ, sɛ-ɛ julu 'le la nɩkpɛ 'nɩ-a bhɛlɩ ɔ 'yɛ libho nʋnʋ. 5N -yɛ -bhla ma'a 'pɩ 'wʋ -wʋ, ma'a 'pɩ 'wʋɔ yʋlokpë n glɩnɩ -bha.”
6Zezwi gba-a sa'a 'bhë, 'n ɔ ji-e -bha dʋdʋ'ʋ -dlɛ 'pa, ɔ nʋnʋɛ-a plaplɩ nɛ, 'n ɔ jiɩ-e -bha 'lɔkpɔlɔkpɔnyɔɔ 'jie 'klʋ tli. 7Ɔ nɛ -bha ɔ de: “Mö -ma Silowee 'nyibhë 'mö -n 'yɛ budo.” Silowee 'nglɩɛ zɔmö -yɛ-a “tiatianyɔ.” 'Lɔkpɔlɔkpɔnyɔ la'a -sɔ-a 'wʋ, 'n ɔ ji-e -ma mö, ɔ budo-a, ɔ -wʋ-a nimï ji 'le ɔ jɩnɩ yɛ. 8Ɔ yawʋglɩngwa -yɛ nɩkpa -wa yɩlɩɔ la-a 'jɩbhajɩbhalɩ'ɩ 'sɔ nɛ: “Nɩkpɛ -ɔ glɩ-ɛ la'a -bha 'yuogblʋɔ -kʋkʋyawʋ -ɔ jɩbha-a la'a, mɔ-ɔ 'nɩ-ɛ -la -wʋ?” 9-Mʋmʋa nɛ: “Mɔ -bha.” -Mʋabha nɛ naa: “Yuo -bha, ɔ 'wlʋnʋnyɔ -bha.” Wa-a -sɩbha kpɛnɩ 'le, nɩkpɛɛ 'bhë nɛ: “-Amö -bha.” 10Ɔ gba-a -sɩbha, 'n wa jio-a ngli 'jɩbha naa: “Sa -na 'jie 'kalɩkalɩnɩɔ-a 'mö 'nɩ?” 11Ɔ nɛ: “Nɩkpɛ wa la-a Zezwi, mɔ-ɔ nʋ-a plaplɩ nɛ, 'n ɔ -jimɩ'ɩ-a 'jie 'klʋ tli, 'bhë 'n ɔ ji-a na de nʋ naa: Mö -ma Silowee 'nyibhë 'mö -n 'yɛ budo. N mö-ö -ma n budo-a, 'n n ji-a sɛ jɩnɩmanɩ.” 12Ɔ gba-a -sɩbha, 'n wa jio-a ngli 'jɩbha naa: “La 'mɔ nɩkpɛ -wʋ-a 'nɩ?” Ɔ nɛ: “N 'nɩɔ de -ji.”
Falizɩɛ yɛ 'lɔkpɔlɔkpɔnyɔ -ɔ Zezwi göpö la-a ngli 'jɩbha
13Wa 'libhï-a nɩkpɛ -ɔ 'lɔkpɔ la-a 'wʋ, 'n wa jio-o -ma falizɩɛɛ 'bhɛyɩ kwa. 14-Gwlɛnɩzlɩ Zezwi nʋ la-a -sɩbha plaplɩ nɛ, 'n ɔ jio-a 'jie kalɩ. 15Ɩ yɛ 'n falizɩɛ ji 'yɛ-a -nɩ 'mɔ nɩkpɛ la'a ngli 'jɩbha naa, sa ɔ 'jie 'kalɩkalɩnɩɔ-a 'mö 'nɩ? Ɔ nɛ -bha wa de naa: “Plaplɩ ɔ tli-e -bha na 'jie 'klʋ, n budo-a, 'n n ji-a sɛ jɩnɩmanɩ.” 16-Ma falizɩɛ gla'aa nɩkpa -mʋmʋa nɛ: “Nɩkpɛ -mɔ -la 'nɩ-ɛ -nɩ -Lagɔɔ 'bhɛyɩ 'bhönɩ, -wʋʋ -yɛ-a, ɔ'ɔ zʋ -bha -gwlɛnɩzlɩ.” -Mʋabha nɛ: “Samɩ 'jinylolie nʋnyɔ bhɛlɩ-a ɔ 'yɛ -saa bhatɩ -la 'mö nʋnʋ 'nɩ?” 'N wa 'bhïë 'nyize ji-a 'mö donʋ. 17'N wa ji 'yɛ-a 'lɔkpɔlɔkpɔnyɔ -ɔɔ jie-e 'kaluo la-a ngli 'jɩbha 'sɔ, wa nɛ: “-Nmöö -nɩ 'na-a, sa -n gba-a -na -ɔ -kalɩmö-ö -la 'jiee yɛ 'nɩ?” Ɔ nɛ: “-Lagɔɔ 'mögbanɩnyɔ -bha.”
18-Ma ɩ 'mö, 'zwiföa nɛ wa nɩ -lɛ nɩkpɛ la'aa -lowlengwa wɔzɩ 'bhë, wa 'na 'kɩ dlɩ 'wʋ -ka naa -lɔkpɔ-ɔ 'lɔkpɔ la -bha 'bhë 'n ɔ ji-a 'pʋ. 19Wa wɔzɩ-a ɔ -lowlengwa wa ji-a, 'n wa jua-a ngli 'jɩbha naa: “-Ɔ la'a a gu-a? Wa gwalɩɔ-a ɔ 'lɔkpɔ-ɔ? Sa ɩ -wʋnʋ-ɔ 'mö-a -sɩka'a 'mö 'n ɔ jɩnɩ-a yɛ 'nɩ?” 20Ɔ -lowlengwa nɛ naa: “-A -ji sɛ naa -aa gu -bha, ɔ 'lɔkpɔ-ɔ 'n -a jio-a gwalɩ. 21Sa ɩ -wʋnʋ-a 'mö -sɩka'a 'mö 'n ɔ jɩnɩ yɛ, -a 'nɩɩ -nɩ -ji, -ɔ kalɩɔ 'yɛ 'jie -a 'nɩɔ -ji, a 'jɩbha ɔ 'bhë ngli, ɔ 'kadɔ -bha, ɔ ji ɔjɩɛ -gömöö gbʋ 'mö -sanɩ.” 22'Zwiföa ɔ -lowlengwa -wʋ la-a -gu 'lee yɛ wa gba-a -sɩbha. -Wʋʋ yɛ-a, 'zwiföa yɛ la 'dɩ zʋ 'bhë naa, nɩkpɛ -mɔ -yɛ Zezwi Puanyɔ -ɔ -Lagɔ -sa-a -bha 'wlumö jɩblɩnɩ-ɛ, -ma -Lagɔbudu'u wa jio-a kpëtie. 23Ɩ yɛ ɔ -lowlengwa nʋ-ɔ naa: “A 'jɩbha ɔ 'bhë ngli, ɔ 'kadɔ -bha.”
24'Sɔdo'o, 'n falizɩɛ ji-a 'lɔkpɔlɔkpɔnyɔ -ɔ 'pʋ la-a wɔzɩ, wa nɛ -bha ɔ de naa: “-Lagɔ ji klʋ -a glɩ-ɛ la'a, gba 'dɛdɛ'ɛ, -a -ji sɛ naa nɩkpɛ -la 'jinylolie nʋnyɔ -bha.” 25Wa gba-a -sɩbha, ɔ nɛ: “Ɔ -yɛ 'jinylolie nʋnyɔ glɩnɩ, n 'nɩɩ na-a -ji. -Ɩ n -ji-e na-a, mɩ-ɩ -yɛ-a naa: -Lɔkpɔ n 'lɔkpɔ-ɔ la -bha, -sɩka'a-a 'mö n jɩnɩ yɛ.” 26Ɔ gba-a -sɩbha, wa nɛ -bha ɔ de: “'Manɩ ɔ -nʋmö-a 'ji 'nɩ? Sa ɔ kalɩkalɩnɩ-ɛ -na 'jie 'mö 'nɩ?” 27Ɔ nɛ: “N kɩ a de gba 'bhë, a nɩ'ɩ-ɛ 'yukwli pönɩ. 'Manɩɛ yɛ a 'jɩbha 'mö-a n 'kɩ gba 'sɔ 'nɩ? Bhlɩ'ɩ a 'jɩbha 'yɛ -nɩ a 'yɛ ɔ 'wʋbhlinɩngwa zʋ-a?” 28Ɔ gba-a -sɩbha, 'n wa jio-a sa. 'Bhë wa nɛ: “-Nmö -yɛ-a ɔ 'wʋbhlinɩnyɔ, -abhaa -nɩ-ɛ, Moyizɩɛ 'wʋbhlinɩngwa -a glɩnɩ-a -nɩ. 29-A -ji -nɩ sɛ naa, -bha Moyizɩɛ de -Lagɔ gba -bha, -mɔ -laa -nɩ, la ɔ 'bhönɩ -aa -bha de -ji.” 30Nɩkpɛ nɛ: “-Ɩ möna 'mö-a ngli mɩ-ɛ -la: La ɔ 'bhönɩ, a'a -bha de -ji 'bhë, 'n ɔ ji'i-a 'jie kalɩ. 31-A -ji sɛ naa -Lagɔ 'nɩ pönɩ 'jinylolie nʋngwa 'yukwli, nɩkpɛ -ɔ wɔlʋmanɩ-a -Lagɔ 'wʋ 'bhë -ɔ nʋ-a -ɩ ʋ 'jɩbha-a, 'mɔ ʋ pönɩ-a 'yukwli. 32-A -yɛ la 'wlʋ -aa -lɛ -bhla 'nʋ naa, nɩkpɛ -ɔ 'lɔkpɔ-a wa gwalɩ-a, nɩkpɛ kɔ 'jie kalɩ. 33'N nɩkpɛ -la -Lagɔ nɩɔ la tia, ɔ 'na la -lu nʋ.” 34Ɔ gba-a -sɩbha, wa nɛ: “-Na -gëgëbhë wa gwalɩnɩ-ɛ -ma 'jinyloli 'mö, -nmö -jiya-a ngli 'paa?” 'N wa jio-a 'pɩ 'pa.
35'N Zezwi ji-a 'nʋ naa wa kɔ kpëti 'bhë. Ɔ -nyɔɔ 'sɔ gbënɩ-a, ɔ nɛ -bha ɔ de: “-N ka Nɩkpɛɛ 'Gu dlɩ 'wʋ 'nɩ-ɩ?” 36Nɩkpɛ la'a nɛ: “Nyininyɔ, -slʋnʋmö'öɔ n 'kɔ dlɩ 'wʋ -ka.” 37Zezwi nɛ -bha ɔ de naa: “-N kɔ yɩlɩ 'bhë, mɔ -wʋ-ɔ la'a -na de gba 'le.” 38Zezwi gba-a -sɩbha, nɩkpɛ nɛ: “Nyininyɔ, n -kamö dlɩ 'wʋ.” 'Bhë 'n ɔ ji-e -bha ɔ dlɩ'ɩ -kokomunigbö glu 'pa.
-Wa 'lɔkpɔ-a 'dɛdɛ'ɛ
39Zezwi nɛ -bha ɔ de naa: “-Lie yawʋsanɩ -yɛ n ji-e ma'a pɩ la'aa 'wʋ. -Wa 'nɩ-a sɛ jɩnɩ wa 'yɛ sɛ jɩnɩmanɩ, 'bhë -wa jɩnɩ-a yɛ wa 'yɛ 'lɔkpɔ.” 40Falizɩɛ -ja -wa -wʋ la-a -bha ɔ yawʋ, 'n wa jio-a ngli 'jɩbha, wa nɛ: “-Abhaa -nɩ, -lɔkpɔ -a 'lɔkpɔ 'yɛ-a -nɩ-ɛ?” 41Zezwi nɛ -bha wa de naa: “A -yɛ la 'lɔkpɔ-ɔ, a 'na la 'jinyloli 'wlumö -ka, -ma ɩ 'mö, sa'a a nʋ-ɔ naa: -A jɩnɩ yɛɛ yɛ a 'jinyloli wʋya -bhla 'wlumö 'kɔmʋʋ.”
Àwon tá yàn lọ́wọ́lọ́wọ́ báyìí:
ZAA 'BƆGƲ 9: BNT96
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Bete New Testament © Bible Society of Côte d'Ivoire 1996