ZAA 'BƆGƲ 8
8
Gbʋyɩlɩnglɔɔ wɛlɩ
1Zezwi -sɔ-a 'wʋ, 'n ɔ ji-e -ma -gɔgɔgbʋ wa la-a olivieswie -gɔgɔgbʋ 'klʋ mö. 2Zlɩ zɩ-a, ɛ -papapii 'n ɔ ji-e -ma -Lagɔbudu 'kadʋ 'mö nimï mö, 'n nɩkpaa -bɛ jio-a yawʋ nyini. Ɔ glɩ-a yɛ 'n ɔ ji-a wa nglipapɩɛ tɛ-ɛ. 3-Lagɔɔ gböö nglipangwa -yɛ falizɩɛ 'sɔ -su 'nglɔ -bhlʋ -ɔ wa köbha-a nyɩbhɛlʋ -gömö, 'n wa jio-a Zezwi -la. Wa 'nɩgbanɩɔ-ɔ -bha 'du 'mö, 4wa nɛ -bha Zezwie de naa: “-Abhitɩbha, nglɔ la'a nyɩbhɛlʋ -a köbhɔ-a -gömö. 5-Ma -aa gbö 'mö, Moyizɩ nɛ -sɩbhaa 'ngwlɩ -a 'lɩbhʋa -gboku 'mö wa 'yɛ tlɩ. -Ma ɩ 'mö, -nmöö -nɩ sa -n gba-a -na 'nɩ?”
6-Wʋʋ yɛ wa gba la-a -sɩbha, 'mö -jɩla kwla'a wa jio la -bha, wɛlɩköbhë -a 'kɔ-a gbʋ köbha wa 'ka ghlɩɛ yɛ. Zezwi kwlinɩ-a 'wlu -bha dʋdʋ'ʋ, ɔ-ɔ la'a -bha wlijeyi nya 'cɛlɩnɩ 'le, 7wa -wʋɔ-a -sɩbha debhlʋ -debhlʋ ngli 'jɩbha 'le, 'n ɔ ji-a 'wlu 'libhï, ɔ nɛ -bha wa de naa: “-Ma a gla'aa nɩkpɛ -ɔ 'nɩ-ɛ -bhla 'jinyloli nʋ 'lɩlɩlɩ, ɔ 'pɔ taka -gboko.” 8Ɔ kwlinɩ 'yɛ-a 'wlu 'sɔ, ɔ-ɔ -bha dʋdʋ'ʋ 'cɛlɩ 'le 'sɔ. 9Wa 'nʋ-a Zezwie wɛlɩ la'a, wa dlɩa-a -wʋʋa-a gbʋ 'wʋ kwa 'lee yɛ, mömɩɛ wa tɛ-a -bhlʋ -bhlʋ, tɛnɩ nɩkpazɔgblʋɩ 'wʋ -n 'yɛ -gbɔtɩ 'wʋ nyini, 'n ɔ -yɛ 'nglɔ 'sɔɔ 'nyize ji-e -bha tʋ-ʋ. 10Zezwi 'libhï-ë 'mö-a 'wlu-o, ɔ nɛ -bha ɔ de naa: “'Nglɔ, la -na gbʋɔ 'wʋkwangwa -wʋ-a 'nɩ? Nɩkpɛ -nɩmö-ö -lu nʋ?” 11Ɔ nɛ: “Nyininyɔ, nɩkpɛ nɩ'ɩ-ɛ -lu nʋ.” Ɔ gba-a sa'a, Zezwi nɛ -bha ɔ de naa: “-Amöö -nɩ 'yɛ, n 'na -kamö na-a -lu nʋ. Mö, -nn nʋ-a 'mö 'jinyloli 'sɔ -nɩ.”]
Zezwi mɔ-ɔ -yɛ-a 'pɩ 'wʋɔ yʋlokpë
12Nɩkpaa -zakpa-a glɩ la-a -bha, Zezwi nɛ 'sɔdo'o -bha wa de naa: “-Amö-ö -yɛ-a ma'a 'pɩ 'wʋɔ yʋlokpë. -Ɔ ka'a -ganɩ ɔ 'na -ma 'misikpoko 'mö namönɩ, 'kɔgwlɛpɩɛ yʋlokpë ɔ ji-a ghlɩɛ.” 13Ɔ gba-a -sɩbha, falizɩɛ nɛ -bha ɔ de naa: “-Najɩɛ dɩ -n sa-a -saa yɛ, -na -sasadɩ 'nɩ-ɛ 'dɩɛ -dɩ.” 14Zezwi nɛ: “'Dɛdɛ'ɛ, najɩɛ 'dɩ n sa-a 'bhë-ë, -ɩ n -wʋ-a -sa 'le 'dɩɛ -dɩ -bha. -Wʋʋ yɛ-a, la n 'bhönɩ-a 'bhë la n -wʋ-a mö 'le n -ji -bha de. Abhaa -nɩ-ɛ, la n 'bhönɩ-a 'bhë, la n -wʋ 'yɛ-a mö 'le, a'a -bha de -ji. 15A -nɩ de, nɩkpaa swɩ a tu -bha, -amöö -nɩ n'n tu na-a nɩkpɛ. 16-Ma ɩ 'mö, n -yɛ la na-a tuo ji-e, 'möslɛnɩswɩ'ɩ n ji la-a tuo, -wʋʋ yɛ-a, na -bhlʋ 'nɩ-ɛ tuo ji, -ɔ tia'a-a ɔ-ɔ -ma na nimï. 17Sa'a ɩ 'cɛlɩɔ 'yɛ-ɛ sa'a -ma a gböö 'bɔgʋ 'mö naa: Nɩkpa 'sɔɔ -sasadɩ 'dɩɛ -dɩ -bha. 18Na 'bhë -amö-ö glɩnɩ-ɛ najɩɛ 'dɩɛ -sasanyɔ, na -Tɩbha -ɔ tia'a-a 'n ɔ sa 'yɛ-a na 'dɩ.” 19Zezwi bhɩa-a 'ji, wa nɛ: “La -na -Tɩbha -wʋ-a 'nɩ?” Zezwi nɛ: “A nɩ'ɩ -ji yaa, a'a na -Tɩbha -ji yaa, a ka'a la -ji-e, a ji la 'yɛ na -Tɩbha -ji.” 20Zezwi-e -ma -Lagɔbudu 'kadʋ 'mö -Lagɔwɛlɩ ngli 'pa 'le, la -dakwɩ wa palɩ-a mëni 'mö yɛ glɩ-a, 'n ɔ ji-a wɛlɩ la'a gba. Ɔ de 'nɩ la -bhla nyinie yɛ, -bɛ 'nɩɔ-ɔ köbha.
Zezwi nɛ ma ɔ ji-a möö wa'a bhɛlɩ wa 'yɛ -ma mö
21'N Zezwi ji 'yɛ-ɛ -bha wa de gba 'sɔ naa: “Möö n ji -bha, 'n a ka'a-a 'nama, 'n a 'yɛ-ɛ -ma a 'jinyloli 'mö tlɩnɩ, ma n -wʋ-a mö 'le a'a bhɛlɩ a 'yɛ -ma mö.” 22Ɔ gba-a -sɩbha, 'zwiföa nɛ: “Ɔjɩɛ cɛ ɔ ji 'lɩbhaa yɛ ɔ nʋ: Ma n -wʋ-a mö 'le a'a bhɛlɩ a 'yɛ -ma mö 'nɩ?” 23Zezwi nɛ -bha wa de naa: “Ma'a zɔmöö -lʋa a glɩnɩ -bha. -Amöö -nɩ, -ma ghayɩɛ -lɔ n glɩnɩ-ɛ na-a. Pɩ la'aa 'möö -lʋa a glɩnɩ-a -nɩ. -Amöö -nɩ, n'n-n na-a ma'a pɩ la'aa 'möö -lɔ. 24Wʋ yɛ n 'nyɛya la-a 'dɩ naa: -Ma a 'jinyloli 'mö a ji-a tlɩnɩɛ. -Wʋʋ yɛ-a, a nɩ -ɔ n glɩnɩ-a dlɩ 'wʋ -ka, -ma a 'jinyloli 'mö a ji-a tlɩnɩɛ.” 25Wa nɛ -bha ɔ de: “A'a -mɔ -n glɩnɩ-a 'nɩ?” Zezwi nɛ naa: “-Bha tɛnɩde, -ɔ n nʋ la-a n glɩnɩ, 'mɔ n glɩnɩ -bha. 26N ka a de wɛlɩkïbhïë -bɛ n 'kɩ gba, n ka 'yɛ kïbhï -ɩ n 'kaya-a 'wʋ kwa. -Ma ɩ 'mö, -ɔ la'a -ɔ tia'a-a 'dɛdɛ'ɛ ɔ ka-a ngli, -ɩ n 'nʋ-ɔ -bha ɔ de 'mɩ n gba-a 'pɩnɩkpaa de.”
27Ɔ gba-a -ɩ la'a, wa 'nɩɩ-ɩ 'mö 'nʋ naa -Tɩbha -Lagɔɔ gbʋ ɔ gba la -bha. 28'N Zezwi ji-e 'mö-ö sa'a wa de gba naa: “A 'na Nɩkpɛɛ 'Gu ghayɩ kwa 'bhë, 'n a 'yɛ-a sɛ jɩblɩnɩ naa -ɔ n glɩnɩ-a 'mɔ n glɩnɩ -bha, 'n a 'yɛ 'yɛ-a sɛ jɩblɩnɩ naa, n'n nʋ najɩ 'wʋ -lu nɛ, na -Tɩbha -Lagɔ -ʋ tia'a-a, -ɩ ʋ pa'a-a ngli 'mɩ n gba -bha. 29-Ɔ la'a -ɔ tia'a-a, ɔ-ɔ -ma na nimï, -ɩ la'a -ɩ nanɩɔ-a dlɩ yawʋ 'mɩ n nʋ-a 'kɔmʋʋɔ yɛ, ɔ nɩ'ɩ-ɛ -bha tɩ.” 30-Ɩ la'a 'mɩ Zezwi gba-aa yɛ, 'n nɩkpaa -bɛ jio-a dlɩ 'wʋ -ka.
Zezwi -yɛ Ablaamö 'sɔɔ wɛlɩ
31Zezwi nɛ -bha 'zwiföa -wa kɔ la-a dlɩ 'wʋɔ de naa: “Wɛlɩ n 'paya-a ngli a -kɩɩ -gömö namönɩ 'mɩ a glɩnɩ-a 'dɛdɛ'ɛ na 'wʋbhlinɩngwa. 32A ji -ɩ -yɛ-a 'dɛdɛ'ɛ jɩblɩnɩ, 'bhë 'mɛ 'dɛdɛ'ɛ jiya gïyi 'mö -sa.” 33Ɔ gba-a -sɩbha, wa nɛ -bha ɔ de naa: “Ablaamöö ngëyi -a glɩnɩ-a -nɩ, -aa-a -bhla nɩkpɛɛ gïyi zʋ 'lɩlɩlɩ. Sa ɩ -wʋnʋ-a 'mö 'n -n nʋ-a a ji gïyi 'mö 'wlʋ 'nɩ?” 34Zezwi nɛ naa: “'Dɩɛ -dɩ n nyɛya -bha naa: -Ɔ la'a -ɔ nʋ-a 'jinyloli-e, 'jinylolie gïyi ɔ glɩnɩ -bha. 35A -ji sɛ naa, wa'a zɛlɩnɩ gïyi 'ligbënɩkpɛ, -ɔ -yɛ-a 'ligbë'ëë gu-o, -bhaa -lɔ ɔ glɩnɩ-a -kitiki. 36'N -Lagɔɔ 'Gu kaya gïyi 'mö -sa-a, 'mɩ a ji-a 'jinanɩswɩ'ɩ -gömö -wlonʋɔ. 37N -ji sɛ naa, Ablaamöö ngëyi a glɩnɩ -bha 'bhë, wɛlɩ n wʋya-a ngli 'pa 'le ɩ 'nɩya dlɩ zɔmö pla 'le -wʋɔ yɛ, a 'jɩbha a ka'a 'lɩbha. 38-Ɩ la'a -ɩ n yɩlɩ-ɛ -ma na -Tɩbhaa 'bhɛyɩ, 'mɩ n sa -bha. Abhaa -nɩ-ɛ, -ɩ a 'nʋ-ɔ -ma a -tɩbhaa ngli, 'mɩ a -wʋ-ɔ -la nʋ 'le.” 39Wa nɛ -bha ɔ de naa: “Ablaamö -yɛ-a -aa -tɩbha.” Wa gba-a -sɩbha, Zezwi nɛ naa: “A -yɛ la Ablaamöö 'gwie glɩnɩ-ɛ, a ji la Ablaamöö -li nʋ. 40Abhaa -nɩ, 'dɛdɛ'ɛ n 'nʋ-ɔ -bha -Lagɔɔ de, -ɛ n 'nyɛya-aa yɛ, a 'jɩbha a ka'a 'lɩbha. Ablaamö 'nɩ-ɛ -nɩ -ɩ -la nʋ. 41A -tɩbhaa nʋnʋli a -wʋ-a nʋ 'le.” Wa nɛ: “-Aa -lalagwie glɩnɩ, -aa -Tɩbha -bhlʋ 'tɩ, mɔ-ɔ -yɛ-a -Lagɔ.” 42Wa gba-a -sɩbha, Zezwi nɛ -bha wa de naa: “-Lagɔ -yɛ la 'dɛdɛ'ɛ a -Tɩbha glɩnɩ-ɛ, a ji'i la 'jɩbha. -Wʋʋ yɛ-a, -ma -Lagɔ 'mö -ma n 'wlʋ -bha, ʋ 'nglɩ 'mö n jinɩ-ɛ ma'a, n'n-n najɩ 'wʋ ji, mʋ-ʋ tia'a -bha. 43'Manɩɛ yɛ a'a 'nʋ bhe na gbagbagbʋ 'mö 'nɩ? A'a bhɛlɩ a 'yɛ na wɛlɩ 'yukwli kwanɩɛ yɛ -bha. 44'Jinylozuzukuo 'bhitɩbha mɔ-ɔ -yɛ-a a -tɩbha, ɩ yɛ -ɩ a -tɩbha 'jɩbha-a, ɩ 'nyize 'mɩ a 'jɩbha-a a 'yɛ nʋ. Tɛnɩ -ma 'pɩɛ tɛnɩde, 'kulɩbhanyɔ ɔ glɩnɩ-a 'kɔmʋʋ. -Ma ɔ 'pɩ 'mö 'dɛdɛ'ɛ 'nɩ -ma -wʋɔ yɛ, -ɩ -yɛ-a 'dɛdɛɛ ɔ 'nɩɩ-ɩ 'jɩbha 'lɩlɩlɩ. Yuoo -tɩbha ɔ glɩnɩ-a 'n ɔ glɩnɩ-a yuonyɔɔ yɛ, ɔ -yɛ yuo -dɩ 'le -wʋ ɔ 'bhëë -li ɔ -wʋ-a nʋ 'le. 45-Sɩbha ɩ -wʋ -bha. -Amöö -nɩ-ɛ, 'dɛdɛ'ɛ n ka na-a nglie yɛ a'a nglu na dlɩwʋkagbʋ. 46-Ma a gla'aa -mɔ bhɛlɩ-a ɔ 'kɩ tulua naa, n yɛ 'ylɩ -bhlʋ 'jinyloli nʋ 'bhë 'nɩ? -Ɩ n -wʋ-a gba 'le -yɛ 'dɛdɛ'ɛ glɩnɩ-ɛ, 'manɩɛ yɛ a'a ka'a 'mö-a dlɩ 'wʋ 'nɩ? 47-Ɔ -yɛ-a -Lagɔɔ -lɔ, -Lagɔɔ wɛlɩ ɔ pönɩ-a 'yukwli, a nɩɩ 'yukwli pönɩ, -mɩlado'o a'a -Lagɔɔ -lʋa glɩnɩ-ɛɛ yɛ -bha.”
Zezwi nɛ naa: Ablaamö 'yɛ ma'a 'pɩ 'wʋ jie ji, ɔ bhlɩ
48Zezwi gba-a -sɩbha, 'zwiföa nɛ: “Yia, -a ka zugo -a 'yɛ nʋ naa Samalie nɩkpɛ -n glɩnɩ -bha, 'n 'jinylozuzuko -wʋmö 'yɛ-a -gömö nʋ.” 49Zezwi nɛ naa: “N'n 'jinylozuzuko -gömö -ka, na -Tɩbha n -wʋ-a 'wʋ 'wɔlʋmanɩ 'le 'bhë, 'n a wʋ'ʋ-a -nɩ 'wʋ fɩna 'le. 50N'n najɩɛ 'nglɩmömɩɛ 'nama 'le -wʋ, -ɔ -wʋɩ-a na yɛ 'nama 'le ɔ-ɔ -bha, mɔ-ɔ -yɛ-a -zijlitunyɔ. 51'Dɩɛ -dɩ n nyɛya-a naa: -Ɔ -yɛ na wɛlɩ 'ji zʋ, ɔ 'na tlɩ 'lɩlɩlɩ.” 52Zezwi gba-a -sɩbha, 'zwiföa nɛ naa: “-A -ji-a 'mö -sɩka'a sɛ naa, 'jinylozuzuko -n ka-a -gömö, Ablaamö yɛ tlɩ 'bhë, -Lagɔɔ 'mögbanɩngwa yɛ 'yɛ tlɩ 'bhë, 'n -n nʋ-ɔ -na naa: -Ɔ -yɛ -na wɛlɩ 'ji zʋ, ɔ 'na tlɩ 'lɩlɩɛ? 53-Nmöö cɛ-ɛ -yɛ-a 'kadɔ -nmö zi-a -aa -tɩbha Ablaamö -ɔ tlɩ-a 'wʋɔ? -Lagɔɔ 'mögbanɩngwa yɛ 'yɛ -nɩ tlɩ 'bhë, -mɔɔ wlumö -n libhï-ë -najɩ 'wʋ 'nɩ?” 54Zezwi nɛ naa: “N -yɛ najɩɛ 'nglɩ 'ghlimanɩ-ɛ, na 'ghlinɔ 'nɩ -lu 'ji -ka, na -Tɩbha -ɔɔ gbʋ a -wʋ-ɔ -la gba 'le naa mɔ-ɔ -yɛ-a a -Lagɔ, mɔ-ɔ 'ghlimanɩ-ɛ na 'nglɩ, 55'bhë a 'nɩɔ 'yɛ -ji. N -yɛ la nʋ naa, n 'nɩɔ -ji nʋ-ɔ, yuonyɔ n ji la-a a swɩ glɩnɩɛ. -Ma ɩ 'mö, n -jio na-a, 'n n zʋ-ɔ -bha ɔ wɛlɩ. 56A -tɩbha Ablaamö jɩblɩnɩ-a sɛ naa, ɔ ji na zlɩ yɩlɩ-ɛ, 'mʋna yeo-a dlɩ zɔmö. 'Mɛ zlɩ ɔ yɩlɩɛ-a, 'n 'mʋna jio-a 'lɩbha.” 57Ɔ gba-a -sɩbha, 'zwiföa nɛ -bha ɔ de: “-Nn la'a -bhla 'ylʋböö gwlɩ 'sɔ 'ylʋbö kugbïa ghlɩ-ɛ, -nmö nʋ-a -n yɛ Ablaamö yɩlɩ 'bhëë?” 58Zezwi nɛ: “'Dɩɛ -dɩ n nyɛya-a sa'a naa: Ablaamö 'nɩ-ɛ -bhla ma'a 'pɩ 'wʋ ji-e, -ɔ n glɩnɩ-a 'mɔ n glɩnɩ -bha.” 59Zezwi gba-a sa'a, 'n wa ji-a tɩkpaku 'libhï wa 'kɔ 'mö 'lɩbhaa yɛ, ɔ zuzonʋa-a 'ji, 'n ɔ ji-e -ma -Lagɔbudu 'kadʋ 'mö 'wlʋ.
Àwon tá yàn lọ́wọ́lọ́wọ́ báyìí:
ZAA 'BƆGƲ 8: BNT96
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Bete New Testament © Bible Society of Côte d'Ivoire 1996