ZAA 'BƆGƲ 7
7
Zezwie -dagwiee 'bhï 'nɩɔ dlɩ 'wʋ -ka
1-Mɩ la'a 'plɩ-a 'bhë, Zezwi -sɔ-a 'wʋ 'n ɔ ji-a Galilee -gwlɩ bie mö. 'Zwiföa-a -wʋɔ la-a 'nama 'le wa 'kɔ 'lɩbhaa yɛ, ɔ'ɔ-ɔ la 'jɩbha ɔ 'yɛ -ma Zwidee dʋdʋ -gömö mö. 2'Zwiföaa 'pɩpɩ wa la-a -Katiaa zɔmögʋpɩpɩɛ de-e -wʋ la-a nyini 'le. 3Zezwie -dagwie nɛ -bha ɔ de naa: “-Sɔ 'wʋ -n 'yɛ -ma Zwide mö, -na 'wʋbhlinɩngwa -mʋa la'a -wa -wʋ-ɔ -ma wa 'yɛ 'yɛ -nɩ -na nʋnʋli yɩlɩ. 4Nɩkpɛ -yɛ nʋ ɔ 'nglɩ 'yɛ mö nʋ, ɔ'ɔ ziza ɔ nʋnʋli. -N -yɛ -saa libho nʋ 'le -wʋ-ɔ, tuluanɩ -najɩ -gwlɩ 'ji wa -kamö yɩlɩ.” 5Ɔ -dagwiee 'bhï 'nɩɔ la dlɩ 'wʋ -kaa yɛ wa gba-a -sɩbha. 6Zezwi nɛ -bha wa de naa: “Na de 'nɩ-ɛ -bhla nyini, abhaa -nɩ-ɛ, a de 'nyinio 'kɔmʋʋ. 7'Pɩnɩkpa 'na 'kaya -nɩ 'jɛbhɛlɩ, -amöö -nɩ-ɛ, 'jinyloli wa nʋ-a ɩ 'dɩ n sa -bhaa yɛ wa wʋ'ʋ-ɔ na-a 'jɛbhɛlɩ 'le. 8Abhaa -nɩ a mö 'mɛ 'pɩpɩ 'wʋ, na -nɩ de 'nɩ-ɛ -bhla nyinie yɛ, n'n -ma mö 'le -wʋ.” 9Ɔ gba-a -sɩbha wa de, 'n ɔ ji-e -ma Galile-e tʋ-ʋ.
Zezwi yɛ -Katiaa zɔmögʋpɩpɩ 'wʋ mö
10Zezwie -dagwie mö-a 'pɩpɩ 'wʋ, ɔ -sɔ-a 'wʋ 'n ɔ ji 'yɛ-a -nɩ 'wi 'mö mö. 11-Ma 'pɩpɩ 'wʋ 'zwiföa -wʋɔ la'a 'nama 'le, 'n wa nʋ-a: “La ɔ -wʋ-a 'nɩ?” 12-Ma nɩkpa -nyɩdɩ 'n wa 'ngungwa-a -ma ɔ gbʋ 'mö. -Mʋmʋa nɛ: “Nɩkpɛɛ -nɩkpɛ -bha”, 'n -mʋmʋa nʋ-a: “Yuo -bha, nɩkpa ɔ pa-a 'kwla 'mö.” 13-Ma ɩ 'mö, 'zwiföaa -gugu yɛ -bɛ 'nɩ 'pa la wɛlɩ ghayɩ ɔ 'yɛ ɔ gbʋ gba. 14Wa-a 'bhli 'le, -ma 'pɩpɩɛ 'jibhɩabhɛyɩ, 'n Zezwi ji-e -ma -Lagɔbudu 'kadʋ 'mö pla, 'n ɔ ji-a nɩkpa -Lagɔwɛlɩɛ nglipapɩɛ tɛ-ɛ. 15Ɔ -wʋ-a gba 'le, ngli-i möna-a 'zwiföa. Wa nɛ: “Sa nɩkpɛ -la -wʋnʋ-a 'mö, wa 'nɩɔ-ɔ -Lagɔwɛlɩ -slʋnʋ 'n ɔ -jiɩ-a 'nɩ?” 16Wa gba-a -sɩbha, Zezwi nɛ -bha wa de naa: “-Lagɔwɛlɩ n -wʋ-a ngli 'pa 'le, ɩ'ɩ-ɩ -ma na 'bhë 'mö 'bhönɩ, -ma -ɔ la'a -ɔ tia'a-a 'mö ɩ 'bhönɩ -bha. 17-Ɔ la'a -ɔ 'jɩbha-a ɔ 'yɛ -ɩ -Lagɔ 'jɩbha-a nʋ-ɔ, -ɩ n -wʋ-a ngli 'pa 'le, 'n ɩ -yɛ -Lagɔ 'mö 'bhönɩ, ɩ -yɛ 'yɛ na 'bhë 'mö 'bhönɩ-ɛ, ɔ jiɩ jɩblɩnɩ. 18Nɩkpɛ la'a -ɔ gbanɩ-a ɔjɩɛ 'nglɩ 'mö, ɔjɩɛ 'nglɩmömɩɛ ɔ 'nama -bha. -Ma ɩ 'mö, -ɔ la'a -ɔ 'nama-a -ɔ tio-aa 'nglɩmömɩɛ 'dɛdɛ'ɛ ɔ ka-a ngli, ɔ gbagbawɛlɩ 'nɩ yuo 'mö -ka. 19N -tɔnʋ Moyizɩ kaya -Lagɔɔ gbö 'nyɛ 'bhë? 'Bhë -ma a gla'aa nɩkpɛ -bhlʋɔ 'bhë 'nɩ zʋ -bha 'mɩ gbö. 'Manɩɛ yɛ a nʋ-a a ka'a 'lɩbha 'nɩ?” 20Ɔ gba-a sa'a, 'n -wa su la-a -bha jio-a ngo'o palɩ. Wa nɛ -bha ɔ de: “'Jinylozuzuko -n ka-a -gömö, a'a -mɔ nʋ-a ɔ -kamö 'lɩbha 'nɩ?” 21Zezwi nɛ: “N nʋ-a 'köbhë -bhlʋ 'tɩ, a 'bhuo -kpö ngli-i mönaya-a? 22Moyizɩ nʋ-a a -dɩ nyɩbhɛlɩgwiee zɔmö 'wʋ, ɔ 'bhë mɔ-ɔ 'nɩɩ-ɩ sɛ -la, nyɩbhlangwa -lɩɩ-a yɛ 'bhë-ë, -gwlɛnɩzlɩ 'n a dɩ-a nɩkpaa zɔmö 'wʋ. 23Moyizɩɛ gba ji-e 'sɔ-ɔɔ yɛ a dɩ la'a -gwlɛnɩzlɩ nɩkpaa zɔmö 'wʋ-ɔ, n -yɛ na-a -gwlɛnɩzlɩ nɩkpɛɛ -gëgëbhë göpö, 'manɩɛ yɛ a -panɩ'ɩ-a yʋlʋ yawʋ 'nɩ? 24A'a yɩlɩ nɩkpaa 'klʋ 'wʋ a'a tua -nɩ, a tua 'möslɛnɩswɩ'ɩ.”
'Zwiföa yɛ Puanyɔ -ɔ -Lagɔ -sa-a -bhaa gbʋ 'mö kpɛnɩ
25Zelwizalɛmöö nɩkpaa gla'aa -mʋmʋa nɛ: “-Ɔ wa -wʋ la-a 'nama 'le wa 'kɔ 'lɩbhaa yɛ, mɔ-ɔ 'nɩ-ɛ -la -wʋ-ɔ? 26Mɔ-ɔ -wʋ-ɔ -la -glodu'u gbanɩ 'le, -bɛ 'nɩ -dɩɔ gbʋ 'wʋ, -aa 'yuganɩngwa yɛ bhe 'jinanɩswɩ'ɩ sɛ jɩblɩnɩ 'bhë naa, mɔ-ɔ -yɛ-a Puanyɔ -ɔ -Lagɔ -sa-a -bha? 27Nɩkpɛ -mɔ -laa -nɩ -a -ji ɔ 'bhönɩde, -mɩlado'o Puanyɔ -ɔ -Lagɔ -sa-a -bhaa -nɩ, ɔ -yɛ ji -bɛ 'na ɔ 'bhönɩde -ji.” 28Zezwi-e la -ma -Lagɔbudu 'kadʋ 'mö ngli 'pa 'le, wa gba-a -sɩbha, ɔ nɛ: “A nɛ a ji'i, la n 'bhönɩ 'yɛ-a a -ji -bha, -mɩlado'o n'n-n najɩ 'wʋ ji. -Ma ɩ 'mö, -ɔ tia'a-a dlɩtɛnɩnyɔ -bha, a 'nɩɔ -ji. 29-Amöö -nɩ-ɛ, -ma ɔ yawʋ n 'bhö-ö -bha, 'n ɔ ji'i 'yɛ-a tiaa yɛ n -jio.”
30Ɔ gba-a -sɩbha, wa 'jɩbha wa 'kɔ la köbha 'bhë-ë, ɔ de 'nɩ-ɛ -bhla nyinie yɛ -bɛ 'nɩɔ-ɔ cɛ zʋ. 31-Ma nɩkpaa -zakpa nyɩdɩ 'n nɩkpaa -bebe jio-a dlɩ 'wʋ -ka, 'n wa nʋ-a: “Puanyɔ -ɔ -Lagɔ -sa-a -bha -yɛ ji-e, bhatɩ nɩkpɛ la'a -wʋ-ɔ la'a nɛ nʋ 'le, ɔ jiɩ bhe -gömö 'plɩ?”
Wa yɛ Zezwi 'slʋja 'wʋ tia
32-Ma -zakpa nyɩdɩ 'kïbhï wa -wʋ la'a -sɩbha Zezwie yɛ 'mö 'ngungwa 'le, 'n ɩ ji-a falizɩɛɛ 'yukwlie yawʋ bhlinɩ. Wa -yɛ -Lagɔbʋbɔngwaa 'bhitɩbhangwa 'sɔ, 'n wa ji-a Zezwi 'slʋja 'wʋ tia wa 'kɔ köbhaa yɛ. 33Zezwi nɛ naa: “N-n -bhla la'a a yawʋ, 'bɩ 'na 'mö gwlɛ 'n n 'yɛ-ɛ -ma -ɔ tia'a-aa 'bhɛyɩ mö. 34'Nama a ji'i -bha, a 'na ka'a yɩlɩ, la n ji 'yɛ-a glɩɛ, a'a bhɛlɩ a 'yɛ -bha mö.” 35Zezwi gba-a sa'a, 'zwiföa nɛ -ma wa 'bhïë 'nyizee nyɩdɩ naa: “Ma 'bhë ɔ ji-a möö 'n -a 'na 'kɔ-a yɩlɩ 'nɩ? 'Zwiföa -wa ba-a -ma 'glɛköaa -gwlɩ -gömö, 'mʋa ɔ ji-e -ma ghlɩɛ ɔ 'yɛ 'glɛköa ngli 'paa? 36Slɛ-a 'mö wɛlɩköbhë -ma ɔ gba-a -laa zɔmö 'nɩ? Naa: 'Nama a ji'i -bha a 'na ka'a yɩlɩ, la n ji 'yɛ-a glɩɛ a'a bhɛlɩ a 'yɛ -bha mö?”
Zezwi nɛ, mɔ-ɔ ji-a 'kɔgwlɛpɩɛ 'nyu nɩkpa 'nyɛɛ
37'Pɩpɩɛ 'wʋbhlonʋzlɩ -ɛ -yɛ-a zlɩ 'kadɛ, ɛ 'mö Zezwi 'nɩgbönɩ-ɛ -bha -gwlɩ 'ji 'klʋ ghayɩ, ɔ nɛ: “Nɩkpɛ -mɔ 'nyutʋ -yɛ 'lɩbha 'le -wʋ, ɔ ji ma'a na 'bhɛyɩ ɔ 'yɛ 'nɩma. 38-Ɔ ka'a dlɩ 'wʋ -ka, sa -Lagɔwɛlɩɛ 'bɔgʋ 'möö 'köbhë -bhlʋ gba-a naa:
-Ma ɔ 'mö 'kɔgwlɛpɩɛ nyia-a ji-e -ma 'bhönɩɛ,
-sɩbha ɩ ji-a ɔ de 'plɩɛ.” 39-Wa ka-a Zezwi dlɩ 'wʋ -Lagɔɔ Zuzu-u jua-a -gömö jie gbʋ ɔ -wʋ la-a gba 'le. -Wʋʋ yɛ-a, Zezwie 'nglɩ 'nɩ la -bhla 'ghlimanɩɔɔ yɛ, ʋ'ʋ-ʋ la -bhla -bɛ -gömö ji.
Nɩkpa yɛ Zezwie yɛ 'mö donʋ
40-Ma nɩkpaa -zakpa 'möö nɩkpaa -bɛ -wa 'nʋ-a 'mɩ wɛlɩ la'a, wa nɛ naa: “Nɩkpɛ -la, -Lagɔɔ 'mögbanɩnyɔ -ɔ ji la-a jie mɔ-a 'dɛdɛ'ɛ.” 41-Mʋmʋa nɛ: “Puanyɔ -ɔ -Lagɔ -sa-a -bha, mɔ -bha.” -Mʋmʋa nɛ 'yɛ -nɩ: “Puanyɔ -ɔ -Lagɔ -sa-a -bha, Galilee dʋdʋ -gömö ɔ ji-a 'bhönɩɛ? 42Wɛlɩ -ɩ 'cɛlɩɔ-ɔ -ma -Lagɔwɛlɩɛ 'bɔgʋ 'mö, sa'a ɩ'ɩ-ɩ la gba naa:
Puanyɔ -ɔ -Lagɔ -sa-a -bha,
-ma Davidɩɛ ngëyi 'mö ɔ ji-a 'wlʋɔ,
'n ɔ 'yɛ-ɛ -ma Davidɩɛ 'bhiglɔ'ɔ,
-ma Bɛtɩlɛmö 'bhönɩ nʋ?”
43Zezwie yɛ 'n -zakpa 'möö nɩkpa ji-a 'mö donʋ. 44-Ma wa gla'a -mʋmʋa 'jɩbha la wa 'kɔ köbha 'bhë wa 'nɩɔ-a 'mö cɛ zʋ.
'Zwiföaa 'yuganɩngwa 'nɩ Zezwi dlɩ 'wʋ -ka
45'Slʋja mö-a nimï, wa ghlɩ-ɛ -bha -Lagɔbʋbɔngwaa 'bhitɩbhangwa -yɛ falizɩɛ 'sɔ, 'n -mʋa la'a jua-a ngli 'jɩbha naa: “'Manɩɛ yɛ a -nyɔɔ 'nɩ-a ji 'nɩ?” 46'Slʋja nɛ: “-Aa -lɛ -bhla ma'a 'pɩ 'wʋ nɩkpɛ -laa swɩɛ wɛlɩɛ nglikanyɔ yɩlɩ.” 47Wa gba-a -sɩbha, falizɩɛ nɛ -bha wa de: “Abhaa -nɩ 'yɛ, ɔ kaya 'yɛ -nɩ yʋlʋ nʋ 'gamö 'bhë? 48A yɛ -bhla -ma -aa 'bhitɩbhangwa gla'aa nɩkpɛ yɩlɩ, a yɛ 'yɛ falizɩɛyi -ɔ kɔ-a dlɩ 'wʋ yɩlɩ 'bhë 'nɩ-ɩ? 49-Ma ɩ 'mö, nɩkpa -la wa'a -Lagɔɔ gbö -ji, -bhlɩ wa 'bhlɩɔ -bha.” 50Wa gla'aa nɩkpɛ -bhlʋ, Nikodɛmö -ɔ ji la-a 'ylɩ -bhlʋ Zezwi yɩlɩ kwla'a nɛ -bha wa de naa: 51“-Aa gböö do'o, wa nɩ -lɛ nɩkpɛɛ nglie wɛlɩ 'nʋ 'bhë, wa nɩ 'yɛ -lɛ ɔ nʋnʋli yɩlɩ 'bhë, wa bhɛlɩ wa 'kɔ gbʋ köbha-a 'nɩ-ɩ?” 52Nikodɛmö gba-a -sɩbha, wa nɛ -bha ɔ de: “Galileyi -n glɩnɩ 'yɛ-ɛ -na-a? Yɩlɩ -ma -Lagɔwɛlɩɛ 'bɔgʋ 'mö 'jinanɩswɩ'ɩ, -n ji sɛ jɩblɩnɩ naa -Lagɔɔ 'mögbanɩnyɔ -bhlʋɔ 'bhë 'nɩ-ɛ -bhla -ma Galilee dʋdʋ -gömö 'wlʋ.” [ 53Wa -sɔnʋ-a 'ji, 'n wa ji-a -bhlʋ -bhlʋ -ma wa 'ligbï'ï mö.
Àwon tá yàn lọ́wọ́lọ́wọ́ báyìí:
ZAA 'BƆGƲ 7: BNT96
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Bete New Testament © Bible Society of Côte d'Ivoire 1996