Rute 1
1
Naomi Baale Na Ɔ Bia Tewulɛɛ Yeŋ
1Debaŋ keŋ nombiadiira ne diina Iserae tɛɛle dɔɔ nɛ, tanam keyala daale yalawɔ tɛɛle keŋ dɔɔ. Lee mena dɔɔ balee ŋolo ŋon ɔ ba lee Bɛtelɛhɛm keŋ ke kyaa Yuda tɛɛle man nɛ, moo ɔ wɛɛle na ɔ bia tewulɛɛ bala lee botɔɔ gyu Moabe tɛɛle man be kaa kyaa botɔɔ kyomii. 2Balee ŋonaŋ yele yɛna Ɛlimɛlɛke te ɔ wɛɛle yele yɛna Naomi. Ɔ bia tewulɛɛ baŋ mɔ yela yɛna Malɔn na Kilion. Ba lee Ɛferayim dekpaŋalaŋ keŋ ke kyaa Bɛtelɛhɛm donɔɔ keŋ ke kyaa Yuda tɛɛle man nɛ man. Keŋte be gyuuwɔ ke kyaa Moabe.
3Ba kekyaa botɔɔ te Naomi baale Ɛlimɛlɛke yeŋawɔ tina ŋon na ɔ bia tewulɛɛ bala baŋ yela. 4Tewulɛɛ baŋ yala Moabetena ala botɔɔ. Ŋolo wɛɛle yele yɛna Orepa te ŋolo mɔ wui yɛna Rute. Be ke di ŋgba kulutooneŋ kufu botɔɔ nɛ, 5te Malɔn na Kilion mɔ yeŋawɔ tina be naa Naomi yela keŋ ɔ taŋ baale yaa bia tewulɛɛ ya.
Naomi Na Rute Kabese Gyu Bɛtelɛhɛm
6Ba kekyaa Moabe nɛ te Naomi nyiiwɔ nyi Degbeŋgyoo te wii ɔ balaŋ yela be te nyiŋ weenɛɛ. Mena dɔɔ ŋon na ɔ bia ala baŋ desina ba wose nyi baa bese gyu ɔ dɛɛ. 7Ŋon na ɔ bia ala bala baŋ korowɔ lee ba dekyae keŋ man te ba moo gbɛɛ bee gyu Yuda tɛɛle man.
8Be kee gyu nɛ te Naomi yako ɔ bia ala baŋ nyiaa, <<Ɛ man ɔkamasɛ waa bese gyu ɔ naa dɛɛ. Degbeŋgyoo waa yɛɛ deeli fa ŋon ŋgba mena keŋ ɛ be yɛɛ deeli fa ɛ baala baŋ bɔɔ yekee na maŋ nɛ. 9Degbeŋgyoo waa yela ɛ man ɔkamasɛ kenyiŋ dekyae kpaakpaa baale ŋon waa yala nɛ dɛɛ.>>
Keŋte Naomi pukaa wɔ te be wiiwɔ keŋkeŋ, 10te be yako e nyiaa, <<Dee sila neŋ gyu n balaŋ gyaŋ.>>
11Mɔna Naomi yako wɔ nyiaa, <<Me bia, ɛ bese gyu ɛ dɛɛ. Woŋ dɔɔ te ɛ ne gyae nyi ɛ ke sila maŋ? Maa bese tale lola bia tewulɛɛ baŋ baa kaa yala ŋon? 12Me bia, ɛ bese gyu ɛ dɛɛ. Ma te ŋmɛɛ keŋ nyi mɔɔ gyae maa yala bela ya. Nyi akpaa me loo gyakaa nyi maa yala koraŋ na, nyi me nyiŋ baale nelim kei te ma lola bia tewulɛɛ koraŋ na, 13ɛ ke kyaa daa wɔ nyi baa bee? Lee baŋ dɔɔ ɛ ke kyaa nyi ɛ be yale yee? Koa me bia, na wee maŋ koraŋ kela ɛmɛɛ. Nawolo nyi Degbeŋgyoo ta lese ɔ sia lee me dɔɔ.
14Keŋte ba besewɔ wii keŋkeŋ bela. Botɔɔ te Orepa pukaa wa awu te ɔ kaalaa e. Mɔna Rute dɔɔ, ŋon mataana wa awu.
15Te Naomi yako Rute nyiaa, <<Kɛɛ, n dao ta bese ɔ ne gyu ɔ balaŋ na ɔ wurubuarɛse gyaŋ. Nyaŋ mɔ bese sila e ta.>>
16Mɔna Rute yako e nyiaa, <<Na ŋere maŋ nyi maa tina neŋ yela yaa maa bese lee n wɔle ya. Botɔɔ keŋ nyaŋ ke gyu te maa gyu, te botɔɔ keŋ nyaŋ ke kyaa te maa kyaa. N balaŋ baa bese me balaŋ, na n Wurubuarɛ mɔ ke yɛɛ me Wurubuarɛ. 17Botɔɔ keŋ nyaŋ ka yeŋ te maa yeŋ na baa wuu maŋ botɔɔ. Nyi na yeŋ ya te kolo de tira daa na neŋ nsana nɛ, kenaŋ na Wurubuarɛ dee nyiŋ kpu maŋ nideli.>> 18Naomi kena nyi Rute te sara sia nyi waa sila e gyu nɛ, ɔ ta tekaa ŋere e nyi waa bese bela ya.
19Mena dɔɔ be balaŋ bala tɛɛwɔ menɛɛ kelii Bɛtelɛhɛm donɔɔ man. Be ka gyoo Bɛtelɛhɛm donɔɔ man nɛ, donɔɔ keŋ pou siŋiiwɔ lee baŋ dɔɔ. Keŋte ala baŋ fae yeesa nyiaa, <<Naomi gbagba yaa?>>
20Te Naomi yako wɔ nyiaa, <<Ɛ na baake maŋ Naomi #1:20 Gyoŋ. ya. Mɔna ɛ baake maŋ nyi Maara#1:20 Ŋan. Nawolo nyi Wurubuarɛ Dekpataakpere ŋon#1:20 Doo kekala 21 mɔ te yeli nombia ne takaa maŋ nideli. 21Mee gyu na me dana ma wose, mɔna Degbeŋgyoo ta besena maŋ kɔŋ nyiŋmaase wolo. Weera ɛ sɛɛ ɛ ne baake maŋ Naomi lee keŋ Degbeŋgyoo be yeli mɔɔ naa diyem, te Wurubuarɛ Dekpataakpere ŋon be yeli nombia be yala maŋ nɛ?>>
22Mena dɔɔ Naomi na ɔ bu alo Rute ŋon ɔ ba lee Moabe tɛɛle man nɛ besewɔ kɔŋ Bɛtelɛhɛm. Debaŋ kenaŋ te ba gyoo ba aboŋ kekɛrɛɛ.
Àwon tá yàn lọ́wọ́lọ́wọ́ báyìí:
Rute 1: NTR
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
2026 Ghana Institute of Linguistics Literacy and Bible Translation