MATIUS 27
27
Yesus nyeripa Pilatus
(Un te neng Markus 15.1; Lukas 23.1-2; Yaya 18.28-32)
1Laho laho neng kenempam me, mung diaʹ detaʹu lataʹ ngan diaʹ lataʹ lepoʹ Yahudi tai pempun peseket ke lematai Yesus. 2Kun nte lemeka ujoʹ o man ampit, penco tai re ngkin ia palaʹ Pilatus, iaʹ ina Gebenur lepoʹ Rum.
Puyan ketai patai Yudas
(Un te neng Pemuyan Lawa Injil 1.18-19)
3Tegoʹ Yudas, laki iaʹ ban mencai Yesus ina, taʹan dulu lepa pelaboʹ ukum neng Yesus, tai nesen ne tekaʹ neng penyalaʹ a, sulo tai ie ngkin telu puloʹ ligit pirak didai are ngeliwet palaʹ diaʹ detaʹu lataʹ ngan diaʹ lataʹ lepoʹ Yahudi. 4Un dau ue: “Akeʹ lepa salaʹ, moʹ keʹ mencai kelunan iaʹ are un salaʹ pa dulu pelaboʹ ukum patai neng ia.”
Sulo re mipa Yudas, un dau re: “Mpi meʹ pesingo ina laʹa. Moʹ ina ban puyan ncoʹ tengen.”
5Kun Yudas lemintet ligit dina are kukoʹ iaʹ buheʹ, penco tai ie mecin ida ngan lemueng ngediding usa ha.
6Kun diaʹ detaʹu lataʹ dina are nemo ligit didai, ngan un dau re: “Ligit ini, ligit suaʹ dahaʹ kelunan. Tuman ina, buk le ke naʹ a kaʹ dalem buhan pengencai Umaʹ Palan Allah, seʹ le ke ngesa adet le ne ina.” 7Tai ne kuaʹ dau ayo re ʹo, sulo re naʹ ligit ina man nte lemeli tanaʹ neng tukeng kuden, uyan ne pulung kukoʹ patai kelunan lepoʹ diaʹ ca. 8Ina ukoʹ pabeʹ naʹkini ne dulu kuma ha tanaʹ ina “Tanaʹ Jaka.”
9Tuman ina palup ne dau tiraʹ pegawa Yeremia iaʹ kuma ha: “Ida ke alaʹ telu puloʹ ligit pirak, iaʹ lepoʹ Israil ban payo ke naʹ suaʹ a, 10ngan ligit ina dulu ke kanan man nte lemeli tanaʹ tukeng kuden, koʹ baʹan dau tiraʹ iaʹ Tuhan lepa badaʹ makeʹ.”
Pilatus nugen puyan Yesus
(Un te neng Markus 15.2-5; Lukas 23.3-5; Yaya 18.33-38)
11Yesus nekejeng neng juma Gebenur Pilatus, sulo Pilatus lemutu ia, un dau ue: “Lan ncoʹ paren bioʹ lepoʹ Yahudi mo?”
Un dau Yesus mipa ia: “Pekina lete koʹ baʹan dau hoʹ ne.” 12Un sepuʹo abeʹ Yesus mipa dau isiu diaʹ detaʹu lataʹ ngan diaʹ lataʹ lepoʹ diaʹ mekem salaʹ neng ia.
13Tuman ina Pilatus pisiu ia, un dau ue: “Un te ikoʹ kenahan dau mung puyan nte mekem salaʹ mikoʹ ini mo?”
14Un sepuʹo ca luʹung isiu pe Yesus abeʹ un ubaʹ ke mipa, pa Gebenur ina salam tekaʹ a.
Ukum patai neng Yesus
(Un te neng Markus 15.6-15; Lukas 23.13-25; Yaya 18.39–19.16)
15Kelayan ne singket singket tegoʹ Bunut Paska, Gebenur nakau ca usa cen amin sepin, mele aheʹ iaʹ kelunan kadoʹ nyat. 16Dalau ina, un ca usa neng amin sepin iaʹ denga ngadan ne, iaʹ ina Yesus Barabas. 17Lepa mung kelunan kadoʹ nai pempun, sulo Pilatus lemutu ida, un dau ue: “Aheʹ iaʹ ikem ubaʹ akeʹ ke nakau mikem tupe? Yesus Barabas mo, buk ke are Yesus iaʹ dulu pisiu Keristus?” 18Tisen te Gebenur ina puyan kelunan kadoʹ dina mencai Yesus me ia moʹ de miʹet neng ia.
19Dalau Pilatus madung neng use kukoʹ dulu pebetep tiraʹ ina, sulo kenai ca denga cen leto ho, un dau ue: “Ayen ncoʹ pemung ngan dulu idaʹ ke ngejaʹat kelunan iaʹ abeʹ un salaʹ ina, ban ne dalem kenupi heʹ tahup de akeʹ tisen tekaʹ tuyen laleʹ ban tuman laki ina.”
20Un sepuʹo diaʹ detaʹu lataʹ ngan diaʹ lataʹ lepoʹ Yahudi dina, pekasing kelunan kadoʹ apan nte nyat Pilatus nakau Barabas, ngan lematai Yesus. 21Un sepuʹo kun Pilatus lemutu ida: “Aheʹ neng ahang kelunan dua dini iaʹ ikem ubaʹ akeʹ ke nakau mikem?”
Un dau re mipa ia: “Barabas.”
22Sulo Pilatus lemutu ida: “Buk ke pekina, inu iaʹ akeʹ ke uyan neng Yesus ia dulu pisiu Keristus ini?”
Kun nte mipa ia: “Lematai ne ia neng kayu tecek.”
23Kun Pilatus lemutu ida laʹa, un dau ue: “Inu penyalaʹ iaʹ ia lepa uyan tupe?”
Sulo re ngelengap mipa ia, un dau re: “Lematai ne ia neng kayu tecek.”
24Tisen ne Pilatus uban abeʹ nyatan ne ke ti inu laʹa, ngan ia pe malap ida kenai beteʹ nyakat perinta, ina tuman ne alaʹ sungai ngan muheʹ ujoʹ o neng juma dulu mung, mentung nge kuma ha: “Abeʹ keʹ ke un kahum neng salaʹ iaʹ ke lematai kelunan ini, ban ne ini puyan ncem tengen.”
25Un dau kelunan kadoʹ dina mung mipa ia: “Talan ne ukum ban tuman patai ie laboʹ neng usun ameʹ, ngan neng diaʹ anak meʹ.”
26Sulo Pilatus nakau Barabas me ida, ngan cuk ida sedadu dina lemeta Yesus, ngan mencai ia me dulu diaʹ ke napek ia neng kayu tecek.
Sedadu pelunyeʹ Yesus
(Un te neng Markus 15.16-20; Yaya 19.2-3)
27Lepa ina, sulo kenai diaʹ sedadu Pilatus ngkin Yesus kaʹ amin Gebenur, ngan mung mpun sedadu un teliling ia. 28Kun nte sau gelam Yesus, ngan naʹ ca gelam bala silem neng ia. 29Kun nte manyam ca tapung suhaʹ, penco re naʹ a neng ulu ue, ngan naʹ ca kayu neng ujoʹ o tahaʹ taʹu, mentung nte nyelama ia ngan taro dau. Un dau re: “Dadoʹ le udip koʹ, iaʹ paren lepoʹ Yahudi.” 30Kun nte lemulaʹ ia, ngan alaʹ kayu idai are, sulo re metung nge neng ulu ue. 31Lepa re pelunyeʹ Yesus, sulo re sau sapai bala silem idai, ngan naʹ gelam mo loʹ ngeliwet neng ia laʹa. Lepa ina, sulo tai re ngkin ia kawang, moʹ de ubaʹ ke napek ia neng kayu tecek.
Dulu napek Yesus neng kayu tecek
(Un te neng Markus 15.21-32; Lukas 23.26-43; Yaya 19.17-27)
32Dalau nai re kawang, kun nte petegoʹ ngan ca kelunan nai cen lepoʹ Kirini, ngadan ne Simun. Penco re lemejen cuk ia nyuʹun kayu tecek Yesus ina. 33Tai abeʹ de kaʹ ca ukoʹ, ngadan ne Gulguta, iaʹ sen ne “Kukoʹ Tekahing Ulu.” 34Sulo re naʹ telang anggur pekelet ngan lisan tumu me Yesus. Un sepuʹo lepa ha ten tekaʹ a, sulo ho abeʹ un ubaʹ ke nisep pe.
35Lepa sedadu dina napek Yesus neng kayu tecek, kun nte pelubit undi neng ahang ida, apan nte tisen aheʹ iaʹ ke alaʹ naʹan naʹan gelam me. 36Lepa ina, sulo re madung mengau ia. 37Kun nte naʹ ca surat tahaʹ mpau ulu ue iaʹ badaʹ isiu iaʹ pesalaʹ ia. Un dau isiu ina: “Ini ne Yesus, paren bioʹ lepoʹ Yahudi.” 38Ngan laʹa kun nte napek dua re kejamun neng kayu tecek lete pemung ngan Yesus, ca usa tahaʹ taʹu ngan ca usa tahaʹ kabing.
39Mung dulu diaʹ tai lapa ia kina, ida miling miling ulu re, mentung nte pejaʹat dau neng ia, un dau re: 40“E, naʹ pe ikoʹ iaʹ ubaʹ ke ngasing Umaʹ Palan Allah ngan ke medeng nge telu tau ʹo ina laʹa. Buk lan ncoʹ Anak Allah, pudip ne usa hoʹ tengen. Nai ne kentaʹ cen kayu tecek ina.”
41Pekina pe diaʹ detaʹu lataʹ ngan diaʹ guru Katuk Adet Musa, ngan diaʹ lataʹ lepoʹ Yahudi pelunyeʹ Yesus, un dau re: 42“Mencam me pudip dulu diaʹ ca, un sepuʹo abeʹ e mencam pudip usa ha tengen. Moʹ abeʹ ia iaʹ paren bioʹ lepoʹ Israil idai tupe? Buk ke nai kentaʹ cen tecek ina naʹ kini, ina le ameʹ ke ngelan ia. 43Kun ne nebelum palaʹ Allah, ngan pekina pe ia badaʹ ia Anak Allah. Buk lan ne Anak Allah, ilu naʹat selu Allah ubaʹ ke pudip ia naʹkini.”
44Pekina pe dua usa kejamun iaʹ dulu napek serengan Yesus idai pelunyeʹ ia.
Yesus matai
(Un te neng Markus 15.33-41; Lukas 23.44-49; Yaya 19.28-30)
45Tegoʹ beluaʹ tau ina, tai mentem ne pa tipo tanaʹ ina, dalem telu jam majan ne. 46Dalau jam telu tai tahup tau ina, sulo Yesus ngelengap ngan dioʹ dau ue kuma ha: “Eli, Eli, lama sabak-tani?” sen isiu ina: “Tuhan Allah heʹ, Tuhan Allah heʹ, moʹ inu hoʹ peterai akeʹ?”
47Un palai kelunan diaʹ nekejeng nyeng kata kina kenahan dau isiu ina are, un dau re: “Seʹ e mengin Ilia taʹin.” 48Sulo ca usa neng ahang ida ngasa tai ngkin ca keruko abak, ngan mejep pe dalem telang anggur jakan, sulo ho netuk ke neng bulan ca kayu, ngan naʹa kaʹ paʹ Yesus.
49Un sepe dulu diaʹ ca kuma ha: “Pekena ading, ilu naʹat selu Ilia kenai pudip ia.”
50Ca liwai laʹa Yesus ngelengap, lepa ina kun ne menat laset te iaʹ bayaʹ, penco ho matai.
51Dalau ina, tape iaʹ ngediding neng ahang ukoʹ iaʹ buheʹ dalem Umaʹ Palan Allah nyahin tai pepak dua, cen mpau pabeʹ ntaʹ. Tanaʹ pe liung, bila batu tai peʹ, 52ngan un pe kudaʹ kudaʹ liang diaʹ nai pesik, ngan kadoʹ usa kelunan diaʹ ngelan Tuhan, diaʹ ban lepa matai, nai ngeliwet mudip laʹa. 53Penco re mecin liang nte, ngan uʹo lepa Yesus ngeliwet mudip cen patai ie, sulo kelunan dina tai kaʹ dalem Lepoʹ Buheʹ, kukoʹ kelunan kadoʹ ke taʹan ida.
54Tegoʹ kaptin sedadu ina ngan sedadu ue diaʹ ban jagaʹ Yesus taʹan seʹ tanaʹ tai liung, ngan mung inu iaʹ nuyan, tai takut ne tekaʹ de, mentung nte kuma ha: “Atek lan lete ia ini Anak Allah.”
55Un pe kudaʹ usa leto naʹat cen coʹ, iaʹ ban lepa nai bayaʹ Yesus cen Galilia ngan mepo ia. 56Neng ahang ida un Mariam Madalina, Mariam ueʹ Yakup ngan Yusup, ngan pekina pe ueʹ diaʹ anak Sapdi.
Masek patai Yesus
(Un te neng Markus 15.42-47; Lukas 23.50-56; Yaya 19.38-42)
57Tai tahup tau ina, nai ca laki cen lepoʹ Arimatia, ngadan ne Yusup. Ia lete ban ca usa diaʹ bayaʹ katuk Yesus. 58Sulo nai ie palaʹ Pilatus ngan nyat patai Yesus. Penco Pilatus cuk diaʹ sedadu ue naʹ patai Yesus me Yusup. 59Tai kun ne alaʹ patai Yesus ngan lemino ia man ca apeʹ puteʹ iaʹ mading. 60Penco tai Yusup masek ia kaʹ dalem ca lubang batu, iaʹ ina liang nge tengen iaʹ lepa ban dulu mekat neng ca mudung batu. Kun ne pelubit ca batu bioʹ neng paʹ liang ina. Lepa ina penco kenai ie uleʹ. 61Dalau ina Mariam Madalina, ngan Mariam iaʹ ca idai madung nyeripa liang ina.
Sedadu diaʹ jagaʹ liang
62Neng kenempam me, iaʹ ina lepa tau kelema, nai kun diaʹ detaʹu lataʹ ngan kelunan Perisi palaʹ Pilatus. 63Un dau re neng ia: “Ahaʹ amai, ameʹ petawai ban dalau laki iaʹ pelingu dulu idai un mudip are, un dau ue: ‘Lepa telu tau akeʹ kenai ngeliwet mudip laʹa.’ 64Tuman ina, tiga hoʹ cuk sedadu tai mengau liang ina pa iaʹ ketelu tau ue, apan diaʹ bayaʹ katuk ke are un tai ngelau ia sulo re kuma ha: ‘Lepa ne ia beteʹ cen patai.’ Ban ne puyan pelingu iaʹ bayaʹ ini ʹo, ke lapa jaʹat neng ʹo iaʹ ading are.”
65Un dau Pilatus mipa ida: “Senteng ngkem alaʹ sedadu. Tai ne, ngan mengau liang ina pa supeʹ tekaʹ penyukat cem.”
66Sulo tai re mecin ukoʹ de kina, ngan mengau liang ina, mentung nte naʹ man penyalit batu iaʹ neng paʹ liang ina, ngan sedadu dina pe penco mengau ue.
Àwon tá yàn lọ́wọ́lọ́wọ́ báyìí:
MATIUS 27: KNT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Kenyah New Testament © Bible Society of Malaysia, 1984.