MATIUS 28
28
Yesus ngeliwet mudip laʹa
(Un te neng Markus 16.1-10; Lukas 24.1-12; Yaya 20.1-10)
1Uʹo lepa Tau Kelineʹ ina, iaʹ ina dalau tading kenai sepurat dema Tau Mingku, sulo Mariam Madalina, ngan Mariam iaʹ ca idai, tai naʹat liang idai arei. 2Belekaʹ nyarem laleʹ tekaʹ liung tanaʹ. Dalau ina lete sulo nai ca melikat Tuhan kentaʹ cen surga, ngan pelubit batu kep liang ina are, ngan penco ho madung neng usun ne. 3Melikat ina koʹ baʹan seʹ ca bekilet are, ngan gelam me puteʹ koʹ baʹan puteʹ ca kuntan are. 4Mung sedadu diaʹ mengau liang ina are ngeregen seʹ de, takut pa re metan, koʹ baʹan seʹ kelunan matai are.
5Un dau melikat ina neng leto dina: “Ayen ncem takut, ban ne akeʹ tisen ikem nai mita Yesus iaʹ dulu lepa napek neng kayu tecek idai. 6Abeʹ e un kini laʹa. Lepa ne ia nai mudip koʹ baʹan dau ue neng ikem are. Nai ne kini, ngan naʹat seʹ ban ukoʹ dulu peken ia are. 7Tai ne ikem uleʹ, ngan sangkit badaʹ me diaʹ bayaʹ katuk ke: ‘Ia lepa mudip cen patai, ngan ia ke tai kaʹ Galilia tahaʹ tena neng ikem. Kina hem ke taʹan ia ʹo.’ Nawai tiga le neng inu iaʹ akeʹ lepa badaʹ mikem ini.”
8Penco tai re ngasa mecin liang ina, mentung nte bisau ngan bangen. Sulo ketai re ngasa, badaʹ a me diaʹ bayaʹ katuk Yesus.
9Belekaʹ Yesus petegoʹ ngan leto dina. Un dau ue neng ida: “Bangen saheʹ ne ikem.” Penco kenai re palaʹ ia, ngkang taket te, ngan nyelama ia. 10Un dau Yesus neng ida: “Ayen ncem takut. Tai ne ikem uleʹ, ngan cuk diaʹ cenganak keʹ tai kaʹ Galilia. Kina re ke taʹan akeʹ ʹo.”
Sedadu badaʹ puyan iaʹ palo
11Dalau ketai leto dina neng asat de are, un kudaʹ usa sedadu diaʹ lepa jagaʹ liang ina are, nai kaʹ lepoʹ ngan badaʹ mung inu iaʹ lepa ban nuyan, palaʹ diaʹ detaʹu lataʹ dina. 12Penco diaʹ detaʹu lataʹ dina ngan diaʹ lataʹ lepoʹ Yahudi dina peseket ke naʹ ligit me sedadu dina, 13ngan un dau re neng ida: “Tiga hem badaʹ me dulu ban diaʹ bayaʹ katuk Yesus nai ngelau patai ie dalau beluaʹ alem, dalau hem luntoʹ. 14Ngan buk Gebenur tisen puyan ini, ameʹ ke pekaluk ia ʹo. Ayen ncem iʹut tawai neng puyan ini.”
15Sulo sedadu dina alaʹ ligit ina are, ngan uyan inu iaʹ ida lepa cuk. Pabeʹ tau ini, ina lete denga iaʹ tai libut neng ahang lepoʹ Yahudi.
Yesus peluhaʹ ia neng ata diaʹ bayaʹ katuk ke
(Un te neng Markus 16.14-18; Lukas 24.36-49; Yaya 20.19-23; Pemuyan Lawa Injil 1.6-8)
16Mung nte diaʹ puloʹ ca usa diaʹ bayaʹ katuk Yesus didai tai kaʹ ca mudung kaʹ Galilia, kukoʹ iaʹ Yesus lepa badaʹ mida cen kena are. 17Tegoʹ de taʹan Yesus, penco re nyelama ia, naʹ pe un lepe palai neng ahang ida diaʹ kawaʹ tekaʹ ngelan. 18Nai Yesus ngenyeng ida, penco dau ue neng ida: “Mung penyukat lepa un ne neng akeʹ, koʹ baʹan kaʹ surga, pekina pe kusun tanaʹ. 19Tuman ina, tai ne ikem palaʹ mung puhoʹ kelunan, mele kempi kempi kusun tanaʹ ini, ngan uyan ida kelunan diaʹ bayaʹ katuk keʹ. Ngan ngebatis ida man ngadan Amai Bioʹ, ngan Anak, ngan Berua Buheʹ. 20Ngan pekatuk ida bayaʹ mung inu iaʹ akeʹ lepa ban cuk ikem. Ngan nawai tiga le neng ini: Akeʹ ke lemuto un ngan ncem, pabeʹ ketai kuʹo udip ini ʹo.” 98
Àwon tá yàn lọ́wọ́lọ́wọ́ báyìí:
MATIUS 28: KNT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Kenyah New Testament © Bible Society of Malaysia, 1984.