DANIËL 4:1-18

Deel

DANIËL 4:1-18 Bybel vir almal (ABA)

Koning Nebukadnesar het 'n brief geskryf vir al die mense op die hele aarde. Hy het geskryf: “Ek hoop dit gaan baie goed met julle! Ek wil graag vir julle vertel wat met my gebeur het. Die Hoogste God het tekens en wonderwerke gedoen. Sy tekens en wonderwerke is groot en wonderlik. Hy sal altyd Koning wees, Hy sal altyd regeer. “Ek, Nebukadnesar, het lekker in my huis gewoon, en dit het goed gegaan met my. Maar toe het ek gedroom en ek het iets gesien toe ek gedroom het. Ek het groot geskrik. Ek het gesê al die wyse mense van Babel moet hier by my bymekaarkom en vir my sê wat die droom beteken. Al die slim mense het gekom, en ek het vir hulle gesê wat ek gedroom het, maar hulle kon nie vir my sê wat die droom beteken nie. Toe het Daniël gekom, sy ander naam is Beltsassar. Dit is ook die naam van my god. Dit is die heilige gode wat vir Daniël help, daarom is hy baie slim. Ek het vir hom vertel wat ek gedroom het. “Ek het gesê: ‘Beltsassar, jy is die hoof van die slim mense. Ek weet die heilige gode help jou, en jy weet dinge wat ander mense nie weet nie. Sê vir my wat beteken my droom. Wat beteken die ding wat ek gesien het toe ek gedroom het? Ek het geslaap, en toe sien ek daar staan 'n boom in die middel van die aarde. Die boom was baie hoog. Dit het baie groot en sterk geword, so groot dat dit aan die hemel geraak het. Al die mense op al die plekke kon die boom sien. Die boom het mooi blare en baie vrugte gehad. Almal kon van sy vrugte eet. Die diere het onder die boom kom lê, en die voëls het in sy takke gewoon. Die boom se vrugte was kos vir al die mense en die diere. “ ‘Ek het geslaap en gedroom daar kom 'n heilige engel uit die hemel. Die engel het hard gepraat en gesê: “Kap af die boom, sny af sy takke, skud af sy blare, gooi sy vrugte oral rond. Die diere onder die boom moet wegvlug, en die voëls moet wegvlug uit sy takke. Maar moenie die boom se stam uithaal nie, laat staan dit in die grond. Sit 'n band van yster en brons om die stam en laat die stam tussen die gras staan. Die dou uit die lug moet die stam natmaak. Nebukadnesar moet wilde plante eet soos die diere. Sy verstand moet verander, dit moet sewe jaar lank soos 'n dier se verstand word. Dit het die heilige engele gesê, en dit sal gebeur. Dan sal almal wat lewe, weet dit is God, die Hoogste God, wat besluit wie koning sal wees. Hy kan enige mens kies en hom koning maak, ook die onbelangrikste mens.” “ ‘Dit is die droom wat ek, Nebukadnesar, gehad het, en jy, Beltsassar, moet vir my sê wat die droom beteken. Al die wyse mense in my land kan nie vir my sê wat dit beteken nie, maar jy kan, want dit is die heilige gode wat jou help.’ ”

DANIËL 4:1-18 Afrikaans 1933/1953 (AFR53)

KONING Nebukadnésar aan al die volke, nasies en tale wat op die hele aarde woon: Mag julle vrede groot wees! Dit behaag my om die tekens en wonders wat die allerhoogste God aan my gedoen het, te verkondig. Hoe groot is sy tekens, en hoe magtig sy wonders! Sy koninkryk is 'n ewige koninkryk, en sy heerskappy is van geslag tot geslag! Ek, Nebukadnésar, het rustig in my huis gelewe en was voorspoedig in my paleis. Ek het 'n droomgesig gesien wat my verskrik het — droombeelde op my bed en die gesigte van my hoof het my verontrus. Daarop is deur my bevel gegee om al die wyse manne van Babel voor my te bring, dat hulle my die uitlegging van die droom bekend kan maak. Toe het die geleerdes, die besweerders, die Chaldeërs en die waarsêers gekom, en ek het hulle die droom vertel, maar hulle het sy uitlegging my nie bekend gemaak nie; totdat eindelik Daniël voor my ingekom het, wie se naam Béltsasar is, na die naam van my god, en in wie die gees van die heilige gode is; en ek het hom die droom vertel: Béltsasar, owerste van die geleerdes, van wie ek weet dat die gees van die heilige gode in jou is en dat geen enkele geheim jou kwel nie, vertel my die droomgesigte wat ek gesien het, naamlik die uitlegging daarvan. Wat nou die gesigte van my hoof op my bed betref — ek het gesien, en kyk, daar was 'n boom in die middel van die aarde, en sy hoogte was groot. Die boom het groot geword en sterk, en sy hoogte het tot aan die hemel gereik, sodat hy tot aan die einde van die hele aarde sigbaar was. Sy blare was mooi en sy vrugte baie, en aan hom was vir alles voedsel; onder hom het die diere van die veld skaduwee gesoek, en in sy takke het die voëls van die hemel gewoon, ja, alle vlees is daardeur gevoed. Ek het in die gesigte van my hoof op my bed gesien, en kyk, 'n bode, naamlik 'n heilige, het uit die hemel neergedaal; hy het hardop geroep en só gesê: Kap die boom om en kap sy takke af, trek sy blare af en verstrooi sy vrugte; laat die diere onder hom uit wegvlug en die voëls uit sy takke. Maar laat sy penwortel in die aarde staan, en dit met 'n band van yster en koper in die groen gras van die veld; en laat hy deur die dou van die hemel natgemaak word en saam met die diere deel hê aan die plante van die aarde. Laat sy hart anders word as dié van 'n mens en 'n dierehart aan hom gegee word, en laat sewe tydperke oor hom heengaan. Op 'n besluit van die bodes berus die bevel, en 'n woord van die heiliges is die saak, met die bedoeling dat die lewendes kan erken dat die Allerhoogste mag het oor die koningskap van die mens en dit gee aan wie Hy wil, en die nederige onder die mense daaroor aanstel. Dit is die droomgesig wat ek, koning Nebukadnésar, gehad het; en jy, Béltsasar, sê my die uitlegging, omdat al die wyse manne van my koninkryk my die uitlegging nie kon bekend maak nie; maar jy is daartoe in staat, want die gees van die heilige gode is in jou.

DANIËL 4:1-18 Afrikaans 1983 (AFR83)

“Koning Nebukadnesar aan al die volke, nasies en taalgroepe wat oor die hele wêreld woon: Voorspoed! “Ek betuig met blydskap dat ek die tekens en wonders wat die allerhoogste God gedoen het, kon belewe. “Hoe groot is sy tekens, hoe magtig sy wonders! Sy koninkryk is 'n ewige koninkryk, sy heerskappy duur van geslag tot geslag. “Ek, Nebukadnesar, het rustig en voorspoedig in my paleis gewoon, maar toe het ek 'n droom gehad wat my ontstel het, visioene in my slaap, wat deur my kop gemaal en my laat bang word het. Daarom het ek 'n bevel uitgevaardig dat al die koninklike raadgewers voor my gebring moes word om vir my die droom uit te lê. Toe het die towenaars, die voorspellers, die sterrekykers en die besweerders gekom, en ek het hulle die droom vertel, maar hulle kon dit nie vir my uitlê nie. Uiteindelik het Daniël, genoem Beltsasar na die naam van my god en in wie die gees van die heilige gode is, ingekom en ek het hom die droom vertel. “Ek het vir hom gesê: Beltsasar, hoof van die towenaars, ek weet dat die gees van die heilige gode in jou is en dat geen geheim vir jou onverklaarbaar is nie. Hier is nou my droom, lê dit vir my uit. “Ek het hierdie visioen in my slaap gehad: “Toe ek kyk, sien ek 'n boom in die middel van die aarde, en dit was baie hoog. Die boom het so groot en sterk geword dat sy top aan die hemel geraak het, en dit was oral op die aarde sigbaar. Sy blare was mooi en sy vrugte was groot, daar was genoeg kos aan hom vir die hele wêreld. Onder hom het die wilde diere skaduwee gesoek, en in sy takke het die voëls nes gemaak. Alles wat leef, het van hom hulle kos gekry. “Toe ek nog so kyk, terwyl ek in my slaap die visioen sien, kom daar 'n wag, 'n engel, uit die hemel uit af. Hy het hard geroep: “ ‘Kap af die boom, kap af sy takke, stroop af sy blare en gooi weg sy vrugte. Die wilde diere moet onder hom uit wegvlug en die voëls uit sy takke uit. Maar bind 'n yster- en 'n bronsband om sy stomp en laat dit in die grond bly saam met die gras in die veld. Nebukadnesar moet snags deur die dou natgemaak word en van plante leef saam met die wilde diere. Sy verstand moet anders word as dié van 'n mens, hy moet die verstand van 'n dier kry. Dit moet sewe tydperke lank oor hom kom. “ ‘Hierdie aankondiging berus op 'n besluit van dié wat wag hou, die engele, en hulle maak hierdie beslissings bekend. So sal alle mense weet dat die Allerhoogste mag het oor al die koninkryke op aarde en dat Hy dit gee aan wie Hy wil; Hy stel selfs die onbelangrikste mens daaroor aan.’ “Dit is die droom wat ek, koning Nebukadnesar, gehad het. Lê dit nou vir my uit, Beltsasar, want geen raadgewer in my koninkryk is in staat om dit vir my uit te lê nie. Jy is daartoe in staat, want die gees van die heilige gode is in jou.”

DANIËL 4:1-18 Die Bybel 2020-vertaling (AFR20)

“ Koning Nebukadnesar aan alle volke, nasies en taalgroepe wat op die hele aarde woon: Mag julle vrede groot wees! “ Dit is vir my goed om die tekens en wonders wat die Allerhoogste God aan my gedoen het, openlik bekend te maak. “Sy tekens – hoe groot is hulle nie, en sy wonders – hoe magtig is hulle nie! Sy koninkryk is 'n ewige koninkryk, en sy heerskappy is van geslag tot geslag. “ Ek, Nebukadnesar, was sorgeloos in my huis en voorspoedig in my paleis. Ek het 'n droom gehad, en dit het my verskrik. Die droombeelde in my bed en die visioene in my kop het my ontstel. 'n Bevel is deur my uitgevaardig dat al die wyses van Babilonië voor my gebring moes word, sodat hulle die uitleg van die droom aan my bekend kon maak. Toe die waarsêerpriesters, die towenaars, die Galdeërs en voorspellers gekom het, het ek die droom aan hulle vertel, maar sy uitleg kon hulle nie aan my bekend maak nie. Oplaas het voor my verskyn Daniël, wie se naam Beltsasar is – na aanleiding van die naam van my god – en in wie die gees van die heilige gode is. Ek het toe die droom aan hom vertel, ‘Beltsasar, hoof van die waarsêerpriesters, ek weet dat die gees van die heilige gode in jou is en geen geheim jou onderkry nie; die visioene in die droom wat ek gehad het – vertel wat die uitleg daarvan is. Wat die visioene in my kop daar in my bed betref: Ek het gesien, kyk, daar was 'n boom in die middel van die aarde, en sy hoogte was geweldig. Die boom het gegroei en sterk geword. Sy hoogte het tot aan die hemel gereik, en hy was sigbaar tot aan die einde van die hele aarde. Sy blare was mooi en sy vrugte baie. Daar was kos aan hom vir almal. Onder hom het die diere van die veld skaduwee gevind, en in sy takke was die voëls van die hemel tuis – al wat leef, is deur hom gevoed. Daar in my bed het ek in die visioene in my kop gesien: Kyk, 'n boodskapper, 'n heilige, was besig om uit die hemel neer te daal. Terwyl hy hardop uitroep, het hy die volgende gesê: “ ‘ “Vel die boom, en kap sy takke af! Stroop sy blare af, en verstrooi sy vrugte! Die diere moet onder hom uit vlug en die voëls uit sy takke. Maar sy penwortel – laat dit in die grond, vasgeketting met yster en brons in die groenigheid van die veld. Van die dou van die hemel sal hy nat word, en met die diere sal hy die gras van die aarde deel. Sy hart sal verander weg van dié van 'n mens, en die hart van 'n dier sal aan hom gegee word. Sewe tydperke sal oor hom heen gaan. Die bevel berus op die beslissing van boodskappers, en die saak is in opdrag van heiliges, met die doel dat lewendes sal erken dat die Allerhoogste mag het oor 'n menslike koninkryk, en dat Hy dit gee aan wie Hy wil. 'n Nederige onder die mense sal Hy daaroor aanstel.” “ ‘Dit is die droom wat ek, koning Nebukadnesar, gehad het. En jy, Beltsasar, vertel wat die uitleg is, aangesien geeneen van die wyses in my koninkryk daarin kon slaag om die uitleg aan my bekend te maak nie. Maar jy is in staat daartoe, omdat die gees van die heilige gode in jou is.’ ”

DANIËL 4:1-18 Contemporary Afrikaans Bible 2023 (CAB23)

Koning Nebukadnésar, aan al die volke, nasies en tale wat op die hele aarde woon; Vrede word vir julle vermenigvuldig. Ek het dit goed gedink om die tekens en wonders te doen wat die hoë God aan my gedoen het. Hoe groot is sy tekens! en hoe magtig is sy wonders! sy koninkryk is 'n ewige koninkryk, en sy heerskappy is van geslag tot geslag. Ek, Nebukadnésar, het in my huis gerus en in my paleis gefloreer. Ek het 'n droom gesien wat my bang gemaak het, en die gedagtes op my bed en die gesigte van my hoof het my verskrik. Daarom het ek 'n bevel gegee om al die wyse manne van Babel voor my in te bring, sodat hulle my die uitlegging van die droom bekend kan maak. Toe het die towenaars, die sterrekykers, die Chaldeërs en die waarsêers ingekom, en ek het die droom aan hulle vertel; maar hulle het my die uitlegging daarvan nie bekend gemaak nie. Maar op die laaste het Daniël voor my ingekom, wie se naam Béltsasar was, volgens die naam van my god, en in wie die gees van die heilige gode is; en voor hom het ek die droom vertel en gesê: O Béltsasar, meester van die towenaars, omdat ek weet dat die gees van die heilige gode in jou is, en geen verborgenheid jou pla nie, vertel my die gesigte van my droom wat ek gesien het, en die uitlegging daarvan. So was die gesigte van my hoof in my bed; Ek het gesien, en kyk, daar was 'n boom in die middel van die aarde, en sy hoogte was groot. Die boom het gegroei en sterk geword, en sy hoogte bereik tot aan die hemel, en sy gesig tot aan die einde van die hele aarde. Sy blare was mooi, en sy vrugte was baie, en daarin was voedsel vir almal: die diere van die veld het skaduwee daaronder gehad, en die voëls van die hemel het in sy takke gewoon, en alle vlees is daarvan gevoed. Ek het in die gesigte van my hoof op my bed gesien, en kyk, 'n wagter en 'n heilige het uit die hemel neergedaal; Hy het hard uitgeroep en gesê: Kap die boom af en kap sy takke af, skud sy blare af en strooi sy vrugte; laat die diere daaronder wegkom en die voëls van sy takke. Maar laat die stomp van sy wortels in die aarde, met 'n band van yster en koper, in die sagte gras van die veld; en laat dit nat word met die dou van die hemel, en laat sy deel wees met die diere in die gras van die aarde. Laat sy hart verander word van die mens s'n, en laat 'n dier se hart aan hom gegee word; en laat sewe maal oor hom gaan. Hierdie saak is volgens die bevel van die wagters en die eis deur die woord van die heiliges: met die bedoeling dat die lewendes kan weet dat die Allerhoogste in die koninkryk van die mense heers en dit gee aan wie Hy wil, en aanstel bo-oor dit die laagste mans. Hierdie droom het ek, koning Nebukadnesar, gesien. Nou maak jy, o Béltsasar, die uitlegging daarvan bekend, omdat al die wyse manne van my koninkryk nie in staat is om my die uitlegging bekend te maak nie; maar jy is daartoe in staat; want die gees van die heilige gode is in jou.

DANIËL 4:1-18 Die Boodskap (DB)

Koning Nebukadnesar het die volgende boodskap aan al die volke, nasies en taalgroepe van die wêreld gestuur: “Mag daar vrede en voorspoed vir julle wees! “Ek wil julle vertel van al die tekens en wonders wat die allerhoogste God my laat sien het. “Hoe asemrowend is sy tekens! Hoe ongelooflik is sy wonders! God is vir ewig koning en Hy heers vir ewig! “Ek, Nebukadnesar, het rustig en voorspoedig in my paleis gebly. Maar toe een aand terwyl ek op my bed gelê en slaap het, het ek ’n skrikwekkende droom met vreesaanjaende visioene gehad. Ek het toe beveel dat al die koninklike raadgewers na my toe moes kom om die droom vir my te kom uitlê. Al die towenaars, toekomsvoorspellers, sterrevoorspellers en besweerders het toe na my toe gekom. Ek het vir hulle vertel wat ek gedroom het, maar nie een van hulle kon dit vir my verklaar nie. Uiteindelik het Daniël, ook genoem Beltsasar na die naam van my god, na my toe gekom. Die Gees van die heilige God is in hom en ek het vir hom van my droom vertel. Ek het vir hom gesê: Hoofraadgewer Beltsasar, ek weet dat die Gees van die heilige God in jou is en dat daar nie ’n geheim is wat jy nie kan verklaar nie. Kom ek vertel jou wat ek gedroom het, dan verklaar jy dit vir my. “Ek het hierdie visioen in my slaap gehad: ek het ’n groot boom in die middel van die aarde sien staan. Hierdie boom het al hoe groter en sterker geword totdat die top daarvan naderhand aan die hemel geraak het en die hele wêreld dit kon sien. Sy blare was dig en lowergroen en daar was soveel vrugte aan die boom dat daar genoeg was vir almal om van te eet. Die wilde diere het in die skaduwee van die boom kom lê en rus en die voëls het in sy takke nes gemaak. Almal het van die boom se vrugte geëet. Terwyl ek nog so lê en droom, het ek ’n hemelse wese, ’n opsigter uit die hemel, sien kom. Hy het kliphard uitgeroep: ‘Kap af die boom. Sny sy takke af! Stroop hom kaal van al sy blare en vrugte! En jaag al die diere en voëls weg wat daar kom rus en nes maak het. Los net die stomp van die boom met sy wortels in die grond met die gras wat daarom groei. Bind dan ’n band van yster en brons om die stomp. Dit sal elke aand op ’n mens dou omdat hy buite moet slaap en hy sal saam met die diere van plante leef. Hy sal sewe jaar lank nie soos ’n mens dink en reageer nie, maar soos ’n dier. “‘Hierdie bevel is deur die hemelse opsigters gegee. Die engele maak hierdie dinge bekend. Die doel hiervan is om vir die hele wêreld te wys dat die allerhoogste God oor al die koninkryke van die aarde heers. Hy het die mag om dit te gee aan wie Hy wil, selfs al sou dit in die wêreld se oë onbelangrike mense wees.’ “Dit is die droom wat ek gehad het,” het koning Nebukadnesar gesê. “Beltsasar, nou moet jy vir my sê wat dit beteken. Nie een van my ander raadgewers kon dit vir my uitlê nie, maar jy kan, want die Gees van die heilige God is in jou.”

DANIËL 4:1-18 Nuwe Lewende Vertaling (NLV)

Koning Nebukadnesar het ’n brief uitgestuur aan al die volke, tale en nasies van die wêreld: “Mag dit goed gaan met julle almal. Ek wil graag vir julle vertel van die tekens en wonders wat God die Allerhoogste my laat ervaar het. “Hoe groot is sy tekens en hoe magtig sy wonders! Sy koninkryk hou nooit op nie. Hy heers oor geslag na geslag. “Ek, Nebukadnesar, was gerieflik en voorspoedig in my paleis. Ek het toe ’n droom gehad wat my baie banggemaak het. Ek het daar op my bed dinge gesien wat my onrustig gemaak het. Ek het toe opdrag gegee om al die slim manne van Babel na my toe te bring om vir my te kom sê wat die droom beteken. “Toe al die towenaars, besweerders, voorspellers en sterrekykers gekom het, het ek vir hulle gesê wat ek gedroom het. Hulle kon egter nie vir my sê wat dit beteken nie. “Op die ou einde het Daniël na my toe gekom. Ek het hom na my god Beltsasar vernoem, want die gees van die heilige gode is in hom. Ek het vir hom vertel wat ek gedroom het. Ek het vir hom gesê: ‘Beltsasar, leier van die towenaars, ek weet dat die gees van die heilige gode in jou is. Geen geheim is vir jou te groot nie. Ek sal jou vertel wat ek gedroom het, dan moet jy vir my sê wat dit beteken. “‘Ek het op my bed gelê en in die middel van die wêreld ’n hoë boom gesien. Die boom het groot en sterk geword. Dit was naderhand so hoog soos die wolke. Almal op die wêreld kon dit sien. Dit het groen blare gehad en genoeg vrugte gedra dat almal daarvan kon eet. Die diere van die veld het in sy skaduwee gestaan. Die voëls van die lug het daarin nes gemaak. Almal wat leef, kon van sy vrugte lewe. “‘Terwyl ek op my bed lê en droom, het daar ’n bo-aardse wese uit die hemel uitgekom. Hy het hardop uitgeroep: Kap die boom af! Breek sy takke af! Stroop sy blare af! Skud sy vrugte af! Jaag die diere weg van sy skaduwee! Jaag die voëls uit sy takke! Laat staan net sy stomp en sy wortels tussen die gras in die grond met ’n band van yster en koper om. Die dou uit die lug moet hom natmaak. Hy moet saam met die diere in die oop veld bly. Laat sy geaardheid word soos dié van ’n dier, en laat dit vir sewe tydperke aanhou. “‘Dit was die besluit van die bo-aardse wesens. Dit was wat die heiliges geëis het sodat almal wat leef, kan weet dat God die Allerhoogste regeer oor die koninkryke van mense. Hy gee mag aan mense soos Hy wil. Hy kan selfs die geringste mens aanstel. “‘Dit was die droom wat ek, koning Nebukadnesar, gehad het. Beltsasar, jy moet nou vir my sê wat dit beteken. Nie een van die ander raadgewers in my koninkryk kan dit vir my verklaar nie. Jy kan dit doen, want die gees van die heilige gode is in jou.’”