PSALMS 92:2-9
PSALMS 92:2-9 Afrikaans 1983 (AFR83)
Dit is goed om die Here te loof, om u Naam te besing, Allerhoogste, om elke môre van u liefde te getuig, en elke aand van u trou, om dit te doen met snaarinstrumente, met harp en lier. U groot dade, Here, het my baie bly gemaak, ek wil juig oor wat U gedoen het. Groots is alles wat U doen, Here, ondeurgrondelik u gedagtes. Wie dit nie besef nie, is 'n dom mens, wie dit nie insien nie, is sonder verstand. Al is die goddelose voorspoedig, al floreer almal wat onreg doen, hulle sal vir goed uitgewis word. U regeer vir ewig, Here
PSALMS 92:2-9 Nuwe Lewende Vertaling (NLV)
Dit is goed om die HERE te dank, om u Naam te loof, Allerhoogste; om soggens u goedheid aan te kondig, en in die aand u getrouheid, met snaarinstrumente, met die harp en die begeleiding met die lier. U groot dade maak my bly, HERE! Ek juig oor u handewerk. Hoe groot is u werke, HERE! Hoe diep is u gedagtes! Net ’n onkundige sal dit nie weet nie! Net ’n dwaas sal dit nie verstaan nie! Die goddeloses floreer soos onkruid, en boosdoeners woeker met sukses; tog sal hulle vir goed vernietig word. Maar U is hoog verhewe. U, HERE, bestaan vir ewig.
PSALMS 92:2-9 Bybel vir almal (ABA)
Dit is goed om vir die Here dankie te sê, om te sing vir U, Hoogste God, om elke môre te sê dat U doen wat U belowe, om elke nag te sê dat U dieselfde bly. Ek doen dit met 'n tiensnaar-harp, en met die musiek van 'n lier, want die dinge wat U gedoen het, het my bly gemaak, ek wil sing oor die dinge wat U gedoen het. Here, dit is groot dinge wat U gedoen het, die dinge wat U dink, is vir my moeilik om te verstaan. Dom mense, dwase, weet nie en hulle verstaan nie dat mense wat verkeerd doen, soos plante groei nie, hulle verstaan nie dat dit goed gaan met al die mense wat slegte dinge doen, maar dat hulle vir altyd sal sterf nie. Maar Ú, Here, U regeer altyd oor alles.
PSALMS 92:2-9 Afrikaans 1933/1953 (AFR53)
Dit is goed om die HERE te loof en tot eer van u Naam te psalmsing, o Allerhoogste, om in die môre u goedertierenheid te verkondig en u getrouheid in die nagte; by die tiensnarige instrument en by die harp, by snarespel op die siter. Want U het my bly gemaak, HERE, deur u dade; ek jubel oor die werke van u hande. Hoe groot is u werke, o HERE; baie diep is u gedagtes! 'n Dom mens weet nie, en 'n dwaas verstaan dit nie: as die goddelose mense groei soos die plante en al die werkers van ongeregtigheid bloei, is dit om hulle vir ewig te verdelg. Maar U is hoog verhewe tot in ewigheid, HERE!
PSALMS 92:2-9 Die Bybel 2020-vertaling (AFR20)
Dit is goed om die HERE te dank, om u Naam te besing, Allerhoogste; om in die môre u troue liefde te verkondig, en u trou in die nagte – met tiensnarige instrumente, met harpe en die speel van liere. Want U maak my bly met u werk, HERE, oor u handewerk jubel ek. Hoe groot is u werke, HERE, hoe uitermate diep u gedagtes! 'n Dom mens weet nie, en 'n dwaas verstaan dit nie: Wanneer goddeloses soos onkruid opskiet en almal wat onreg pleeg, gedy – is dit net om vir ewig uitgedelg te word. Maar U is vir ewig hoog verhewe, HERE.
PSALMS 92:2-9 Contemporary Afrikaans Bible 2023 (CAB23)
Om U goedertierenheid in die môre te openbaar en U getrouheid elke nag, Op 'n instrument van tien snare en op 'n psalter; op die harp met 'n plegtige klank. Want U, HERE, het my bly gemaak deur u werk; ek sal triomfeer in die werke van u hande. O HERE, hoe groot is u werke! en jou gedagtes is baie diep. 'n Bruis man weet nie; en 'n dwaas verstaan dit nie. Wanneer die goddelose spring soos die gras, en as al die werkers van ongeregtigheid floreer; dit is dat hulle vir ewig vernietig sal word. Maar U, HERE, is die Allerhoogste tot in ewigheid. Want kyk, U vyande, HERE, want kyk, U vyande sal omkom; al die werkers van ongeregtigheid sal verstrooi word.
PSALMS 92:2-9 Die Boodskap (DB)
Allerhoogste Here, dit maak my baie bly om vir U ’n danklied te sing. Ek wil liedere sing om aan U eer te gee. Vroeg in die môre wil ek van u groot liefde vertel. In die aand wil ek uitjubel dat U altyd op u pos is. U slaap nooit nie. Ek wil dit uitsing met die geklank van viole, kitare, harpe en liere. Here, ek sal sing, want U het my lewe vol blydskap gemaak. Ek juig oor alles wat U gedoen het. Wat U gedoen het, is te groot vir ons klein verstandjies. Wat U dink en beplan, is te groot vir mense om te verstaan. As jy nie oor die Here se grootheid nadink nie, is jy dom; dan het jy geen verstand in jou kop nie. Ook al gaan dit baie goed met mense wat U nie dien nie, en al het mense wat lelike dinge doen sakke vol geld, hulle gaan die een of ander tyd onder. Maar Here, U is altyd baie groot.