Krag Vir Elke Dag Voorbeeld

Onverwags – is Hy!

God verskyn soms aan ons op die mees onverwagse tye en plekke. Ja, Hy kies nie noodwendig net kerkbank- en stiltetye om met ons te praat nie. Heel dikwels verskyn Hy sommer daar waar ons ons gewone lewens leef, ons dagtaak verrig, die sleurwerk van die lewe afhandel, in die motor ry, met ander gesels … dáár gee Hy Homself aan ons. Dáár gee Hy aan ons antwoorde op vreemde maniere, ’n rigting wat ons nie verwag het nie en ’n stuk wonderwerk wat ons nie kon voorsien nie.

Soos toe Hy aan ’n gewone vrou, Maria, verskyn het daar waar sy met haar eenvoudige lewe besig was en aan haar gesê het dat sý die een is wat dié Seun in die wêreld gaan bring. 

Regte geloof hoef nie (nou al) alles te sien nie en op alles antwoorde te hê nie. Dit hoef net te weet: God is deel van my hier en nou. En sal my ook wys waarheen ek op pad is. Verwag dat God jou kan verras!

Here, op U vertrou ek onwrikbaar!