Wanneer My Pad Nie Gelyk Is Nie ...Voorbeeld

Alleen-leef is onnodig

Ons stoei dikwels met so baie dinge: ons is bekommerd, angstig, ontsteld … voel selfs verlore … Miskien omdat ons so hard probeer om op ons eie te leef. Dit terwyl ons eintlik diep binne-in ons weet: Ons ís lote aan die groot Wingerdstok. Ons is deel van die groot Vader, Versorger, van die groot Vloei wat lewe, krag, moed en hoop gee. Kom ons herinner onsself weer aan Jesus se eie woorde in Johannes 15:

• Dis juis ons swakheid en afhanklikheid van Hom wat ons sterk maak.

• Wanneer ons in Hom bly, hoef ons nie in beheer van alles te wees nie. Hy ís, Hy weet wat die beste vir ons is en sal gee wat nodig is.

• Ingeplante lote kan Hom vra net wat hulle wil. Hy gee altyd op sý manier.

• Ons in-Hom-wees en in-Hom-blý maak van ons méér-mense: mense groter in hoop, krag en genade.

Ingeplant leef beteken ook om te “laat gaan”. Dat ek sal besef wanneer ek my “ek” en my “self ” uit die pad skuif, Hy ’n groter kans kry om deur my te vloei. Dan word ek as’t ware deel van sý veel groter hart: van sy ewigheidsplan.

Ontferm U tog oor hierdie wingerdstok, die loot wat U self geplant het … (Ps. 80:15b-16a).