“Minder is meer”

Die skrywer Malcolm Gladwell vertel in een van sy boeke dat Dawid vir Goliat verslaan het omdat hy hom op ’n onkonvensionele manier aangevat het. Nie net was Dawid veel meer beweeglik as die reus met sy swaar gevegsdrag nie, maar hy was ook ’n meester met sy slingervel. Nee, hierdie was nie maar net ’n speelding nie, maar ’n dodelike wapen in sy vaardige hande. Van die begin af het Goliat eintlik geen kans gestaan teen hierdie jong man wat nie geskrik het vir die groot reus voor hom nie. In een oomblik het Dawid die bordjies vir altyd verhang. 

Partykeer neem dit net een mens om ’n ware verskil tussen hoop en wanhoop te maak in die Here se Naam. Dit is nie altyd die sterkstes wat die gevegte van die lewe wen nie. Vindingrykheid en afhanklikheid van die Here is baie meer werd wanneer beslissende veldslae geveg word. Dan oorwin gewone mense reuse!

Hierdie oordenking is geneem uit OP GOD SE GENADEPAD deur Stephan Joubert © Christelike Uitgewersmaatskappy.