“Die angel is getrek”

Die anderkant interesseer baie mense aan hiérdie kant. Ek bedoel die lewe aan die dood se kant! Wanneer iemand naby aan ons sterf, wil ons graag weet hoe dit sal wees daar oorkant die doodsvallei. 

Wel, Jesus het dwarsdeur daardie einste vallei gestap. Hades, die doderyk, was nie sterk genoeg om Hom gevange te hou nie. Jesus het die dood se uitdaging aanvaar. Die angel van die grootste vyand van ons almal aan hierdie kant van die graf is uitgetrek. Jesus hou die sleutels van die dood en die doderyk stewig in sy eie hande vas. Daarom is daar hoop vir elkeen wat sy Naam aanroep. 

Ware lewe wen vir ewig, selfs al loop ons uurglas aan hierdie kant op ’n dag leeg. Hoop dryf in Jesus se teenwoordigheid. Moedverloor se vlakte is oorstroom met nuwe lewe. Daarom kan ons al die seer en die swaar van hierdie lewe trotseer met nuwe hoop in ons harte.

Hierdie oordenking is geneem uit OP GOD SE GENADEPAD deur Stephan Joubert © Christelike Uitgewersmaatskappy.