AltydVoorbeeld

Dag 3: Medisyne

Psalm 119:8: "U voorskrifte sal ek nakom. Moet my net nie verlaat nie". (NLV)

‘n Kort maar kragtige vers wat getuig van 'n diep verbintenis tot God en sy Woord. Die Psalmdigter verklaar dit. In ‘n ander vertaling lees dit: “Ek sal u insettinge onderhou; verlaat my nooit heeltemal nie.” Die woord “voorskrifte” staan uit, soos ‘n voorskrif van ‘n dokter wat medisyne voorskryf vir genesing van my ligaam. Hierdie vers bring ook twee belangrike temas van genesing na vore: gehoorsaamheid en afhanklikheid.

Eerstens spreek die Psalmdigter 'n vaste voorneme uit; om God se insettinge te onderhou. Dit dui op 'n opregte begeerte om volgens God se wil te lewe. Insettinge verwys na God se bepalings en opdragte, en om dit te onderhou beteken om dit in jou lewe toe te pas. Hierdie verbintenis kom nie uit plig alleen nie, maar uit liefde en eerbied vir God.

Tweedens smeek die Psalmdigter God om hom nooit (heeltemal) te verlaat nie. Dit wys op die mens se bewustheid van sy eie broosheid. Al probeer ons om gehoorsaam te wees, weet ons dat God se teenwoordigheid en genade altyd nodig is. Daarsonder is selfs die mees opregte pogings onvoldoende. Dié woorde weerspieël 'n nederige hart wat erken dat ware geestelike groei slegs deur God se nabyheid en leiding moontlik is.

Geloof is nie net 'n stel reëls is nie, maar 'n verhouding met die Here. In ons strewes, mislukkings en pogings om reg te leef, bly God naby. Hierdie vers bemoedig elke een van ons om getrou te bly aan die Woord van God en Hom altyd te vertrou vir krag en genade.

Gebed: Vader, wat is ek as mens sonder die belangrikste kompas in my lewe – u Woord? Ek wil nooit verlate voel nie. Ek wil gehoorsaam wees.