Bible Basics: Om God te kenVoorbeeld

Wat is die Bybel?

Die Bybel is die bekendste en invloedrykste boek. Dit word die heel meeste versprei en is die boek wat deur alle tye al die meeste vertaal is. Mense het hulle lewens gewaag daarvoor en dit het letterlik die wêreld verander. Uit ’n suiwer historiese perspektief is die Bybel ’n versameling geskrifte deur verskeie outeurs uit ongeveer 2 000 v.C. tot 90 n.C. Dit is verdeel in twee gedeeltes — basies voor en ná Jesus Christus se lewe.

Baie mense verstaan verkeerdelik dat die Bybel net ’n boek vol mites, stories, reëls en verouderde lesse is. Die realiteit is egter dat al 66 boeke van die Bybel een oorkoepelende, eenvormige verhaal vertel van God en sy verhouding met die mensdom. Elke boek van die Bybel wys na God se liefdevolle, verlossende werk op aarde terwyl Hy streef na verhoudings met die mense wat Hy geskep het.

In sy brief aan Timoteus verduidelik Paulus: “Die hele Skrif is deur God geïnspireer en is nuttig om ons te onderrig, die verkeerde te weerlê, om ons tereg te wys en om die regte leefstyl by ons te kweek. Dit is God se manier om sy mense voor te berei vir hulle taak, ten volle toegerus vir elke goeie ding wat Hy wil hê hulle moet doen” (2 Timoteus 3:16-17 NLV). Die Bybel is lewendig. God het lewe in die Skrif ingeblaas net soos Hy lewe in die eerste mens, Adam, ingeblaas het. God het ’n klomp verskillende mense gebruik om sy woorde neer te skryf, maar die ongelooflike waarheid is dat die ware outeur van die Bybel, die Heilige Gees van God, in ons woon! Dit is wonderlike nuus wanneer ons daarna streef om die Bybel te verstaan: Ons kan die Skrywer self vra wat dit beteken.

Jesus het vir sy volgelinge gesê dat dié wat na sy woorde luister en dit uitleef, sal wees soos ’n wyse man wat sy huis op ’n rots bou. Toe die storm kom, het sy huis stewig bly staan omdat dit ’n vaste fondament gehad het (Matteus 7:24-25). Dieselfde is waar vir ons. Om na die Bybel se wysheid te luister en dit in ons lewe toe te pas, help ons om die wind en vloede van die lewe te deurstaan.

Elkeen van ons sien die wêreld deur ’n spesifieke lens en perspektief. Dit word gevorm deur hoe ons grootgemaak is, ons opvoeding, sosiale media en ander faktore wat ’n invloed op ons het. As volgelinge van Jesus, glo ons die Woord van God behoort ons wêreldbeskouing te vorm — en nie wat die wêreld sê en sy tradisies nie. En nog belangriker — as jy God beter wil leer ken en as jy wil hê Hy moet met jou praat — is die beste ding om te doen om jou Bybel oop te maak. Mag die tydlose, lewegewende waarheid van die Woord van God jou perspektief van die wêreld nuut maak en mag jy in die bladsye van die Bybel die moed en wysheid vind wat jy nodig het vir die volgende deel van jou reis.

Deur Christopher Hyslop