Bible Basics: Om God te kenVoorbeeld

Jesus die Christus

Jesus is die invloedrykste persoon in die geskiedenis van die wêreld, en kennis van Hom is die belangrikste ding wat ons in die lewe moet nastreef.

Tallose gebeurtenisse in die Ou Testament wys na die koms van Jesus. God se mense het gewag vir ’n beloofde Messias uit Dawid se familie wat hulle gehoop het hulle van die Romeinse onderdrukking sou bevry deur militêre optrede. In plaas daarvan het die Seun van God gekom as ’n nederige dienskneg wat in ’n stal tussen diere gebore is.

Johannes se Evangelie begin met ’n pragtige beskrywing van hoe Jesus nog altyd saam met sy Vader bestaan het. Hy het die wêreld wat ons ken, geskep en toe in daardie wêreld kom woon om by ons, die mense wat Hy ook gemaak het, te wees en vir ons te wys hoe sy Vader is. Dalk dink ons nie dikwels aan die God van die Ou Testament as Een wat dieselfde eienskappe as Jesus, wat ons in die Nuwe Testament ontmoet het nie, en tog is Hulle Een.

Johannes teken ook ’n duidelike prentjie van hoe Jesus mens geword het. Hy het soos een van ons geword om vir ons die Vader se hart te wys op ’n manier wat ons kon verstaan (Johannes 1:14). Jesus verstaan ons swakhede en swaarkry en Hy het vir ons gewys hoe nederigheid moet lyk. Omdat Jesus ten volle mens was, het Hy elke spyker gevoel wat aan die kruis deur sy hande geslaan is. Natuurlik kon Hy duisend engele beveel om Hom te red, maar Hy het nie – as gevolg van sy groot liefde vir ons.

In Genesis 15 lees ons die verhaal van die verbond wat God met Abraham gesluit het. God maak dit duidelik dat Hy die prys vir Abraham sou betaal. Hierdie gebeurtenis is ’n voorskou van wat God uiteindelik deur Jesus vir ons sou doen. Vir eeue moes God se mense diere offer vir hulle sondes sodat hulle in God se heilige teenwoordigheid in die tempel kon kom en gemeenskap met Hom kon hê, maar Jesus het dit alles verander deur die volkome offer vir die hele mensdom te word — vir altyd (Filippense 2:5-11).

Nie net is Jesus die offer vir ons sonde nie, Hy is ook die Koning van ons lewens en op ’n missie om sy koninkryk op aarde te bou. Hy roep ons op om ten volle aan Hom oor te gee en saam met Hom te werk — die perfekte koning wat met regverdigheid en liefde regeer. Hy nooi jou om deel te word van sy koninkrykswerk, net daar waar Hy jou gesit het. Wy elke deel van jou lewe aan God toe, net soos Jesus Hom toegewy het aan sy Vader in die tuin van Getsemane toe Hy gesê het: “Laat nogtans nie my wil nie, maar u wil geld!” (Lukas 22:42 NLV). Jy kan verseker wees dat wanneer jy Jesus in jou lewe innooi alles in jou lewe sal verander. Hy is die antwoord op elke behoefte van jou hart en om Hom te volg, sal die beste besluit wees wat jy ooit sal neem.

Deur Lené Jonck