Bible Basics: Om God te kenVoorbeeld

God die Vader

Dit is wonderlik om te dink dat God die Vader en die Skepper is. As God slegs die Skepper was, sonder die essensie van ’n Vader, sou ons dalk aan onsself dink as robotte of gereedskap, slegs daar om ’n funksie te vervul. Ons sou instrumente in die hande van ’n enorme, dalk afsydige Wese wees. Ons sou dalk waarde hê, maar nie liefde nie. Indien God net ’n Vader was en nie die Skepper nie, sou ons lewens dalk kosbaar wees, maar lyk asof dit per ongeluk ontstaan het sonder ’n doel. Ons kennis van God as Vader en Skepper beïnvloed ons identiteit: Ons is geliefd en ons kan betekenisvolle lewens lei.

As ons negatiewe ervarings met ons aardse pa’s gehad het, projekteer ons dikwels hierdie ervarings op God en sien Hom deur die lens van ons seerkry en die misbruik van mag uit die verlede. As dit waar is van jou, wil ek jou aanmoedig om nader aan jou hemelse Vader te kom. Hy is volmaak op elke manier en het jou liewer as wat jy jou ooit kan voorstel.

God is nie net die perfekte Vader nie. As Skepper is Hy die oorsprong en eienaar van ons lewens en ons doel is om Hom met ons hele lewe te aanbid. Elkeen van ons is in besonderhede gemaak as deel van God se groot ontwerp. Hy het ons in sy gedagtes gesien voordat ons begin vorm aanneem het (Psalm 139:13-16). Ons dae het betekenis en is vol goeie werke, selfs al kan ons nie sien hoe dit deel vorm van die groter prentjie van die mens se geskiedenis nie. Verder bring God orde in chaos. Ons leef in ’n gebroke wêreld, maar God het die krag om te skep uit verwoesting, en lewendig te maak uit die dood.

In Openbaring kry ons ’n prentjie van God as magtige Skepper en liefdevolle Vader. Eendag sal Hy alle dinge nuut maak (Openbaring 21:5) en by ons, sy geliefde kinders, woon (Openbaring 21:3). Hy is die Alfa en Omega — die Begin en Voleinder van alle dinge (Openbaring 21:6). Jy kan Hom vra as daar ’n area in jou lewe is waarin jy Hom nodig het om iets nuuts te begin of iets met liefde reg te stel.

Jesus het vir ons ’n beeld gegee om ons te help om die Vader se liefdevolle hart te verstaan. Aardse pa’s wil gewoonlik vir hulle kinders voorsien al is hulle nie perfek nie en kinders vertrou dikwels hul pa’s om dit te doen. Hoeveel meer dink jy sal jou perfekte, magtige, liefdevolle en vrygewige hemelse Vader in jou behoeftes voorsien (Matteus 7:7-11)? Jesus se verduideliking beklemtoon ons kwesbare posisie in die heelal en ons ongelooflike behoefte aan die Vader. Die optrede om te vra, te soek en te klop, simboliseer ons soeke na die dinge wat ons kortkom (Matteus 7:7). Soos kinders soek ons omdat ons nie het nie. As jy spesifieke behoeftes op hierdie oomblik het waarin jou aardse ouers of die mense om jou nie kan voorsien nie moet jy jou versoeke na God toe neem.

Dalk voel jou lewe op die oomblik hooploos en sonder die kans om herstel te word. Skep moed: Jou Skepper kan selfs die mees pynlike situasies herstel. En hou moed want selfs as jy die pad byster geraak het, kan jy deur Jesus jou pad terugvind na jou liefdevolle Vader. Hy sorg vir jou en het jou eindeloos lief, maak nie saak hoe jy drooggemaak het nie, en Hy sal jou nooit alleen los nie (Deuteronomium 31:6).

Deur Lené Jonck