لشهر مارس؛ رحمات جديدة كل صباحعينة

نتسنّاو الله ماكيعنيش نگلسو ونتمنّاو. نتسنّاو يعني نأمنو بلّي هو غيوفي بكل داكشي اللّي واعدنا بيه ومن بعد نتقدمو بتقة.

نتسنّاو الله ماشي بحال الإنتضار اللّي ماعنده معنى عند طبيب الأسنان. نت كتعرف بلّي هو عنده مواعيد بالزايد، ونت مازال گالس تمّا فايت كتر من ساعة من الموعد ديالك الأصلي. نت راجل، ولكن نت كتقرا دابا مجلة نسائية. وبديتي كتقرا مقالة بعنوان "أفضل 7 وصفات ديال الدجاج في العالم." وحيت نت راجل وغادي تقطّع وصفة ديال دجاج من مجلة نسائية حيت الوصفة كتبان زوينة بزّاف، تمّا عرف بلّي راك تسنّيتي وقت كتر منا اللازم!

ولكن نتسنّاو الله ماشي بحال هاكدا. نتسنّاو الله هو حياة نشيطة معتمدة على الثقة في الحضور والوعود دياله، وماشي حياة مخبعة تابعها الشك مرّة مرّة. نتسنّاو الله هو ماشي عداب داخلي كينتج منه شلل. لا، نتسنّاو الله هو راحة داخلية كينتج منها عمل شجاع.

تتسنّا الله هو الدعوة ديالك. تتسنّا الله هو البركة ديالك. كل واحد من ولاد الله تختار باش يتسنّا، حيت كل واحد من ولاد الله كيعيش بين "راه ديجا" و "مازال". ديجا هاد العالم تحطّم بسباب الخطية، ولكن مازال ماتجددش عاوتاني. ديجا جا يسوع، ولكن هو مازال مارجعش باش ياخدك للوطن معاه للأبد. ديجا تغفرات الخطية ديالك، ولكن مازال نت ماتحررتيش منها كليًّا. ديجا ملك يسوع، ولكن مازال ماجاتش مملكته النهائية. ديجا تهزمات الخطية، ولكن مازال هي ماتدمراتش كليًّا. ديجا تعطا الروح القدس، ولكن مازال نت ماولّيتيش بحال يسوع كليًّا. ديجا الله عطاك الكلمة دياله، ولكن مازال هي ماغيّراتش حياتك كليًّا. ديجا خديتي النعمة، ولكن مازال هاد النعمة ماكملاتش خدمتها. كيما كتشوف، حنا كلنا معروضين باش نتسنّاو حيت كلنا كنعيشو في وسط قصة كبيرة ديال فداء الله. كلنا كنتسنّاو النهاية الأخيرة ديال الخدمة اللّي بداها الله من أجلنا.

حنا ماشي غير كنتسنّاو- حنا كنتسنّاو برجاء. وكيفاش داير الرجاء في الله؟ هو توقع أكيد في واحد النتيجة مضمونة. كنتسنّاو وحنا كنأمنو بلّي داكشي اللّي بداه الله غيكمله، وهاكدا كنعيش بتقة وشجاعة. كنفيقو كل صباح وكنتصرفو على حسب شنو جاي، وحيت داكشي اللّي جاي هو مؤكد، فكنعرفو بلّي خدمتنا باسم الله ماغتمشيش باطلة. هادشي علاش كنتسنّاو وكنتصرفو. كنتسنّاو وكنخدمو. كنتسنّاو كنتقاتلو. كنتسنّاو وكنغلبو. كنتسنّاو وكنكرزو. كنتسنّاو وكنجريو. كنتسنّاو وكنضحّيو. كنتسنّاو وكنعطيو. كنتسنّاو وكنعبدو. نتسنّاو الله هو عمل كيعتمد على التقة الأكيدة في النعمة اللّي غتجي.

من أجل دراسة وتشجيع كتر: رومية 4