لشهر مارس؛ رحمات جديدة كل صباحعينة

بما أن مكانتك مع الله ماكتعتامدش على التقوى ديالك ولكن على التقوى ديال المسيح، في أوقات الفشل، تقدر تهرب لعند الله وماشي تهرب منه.

هادا هو حالنا كلنا. كلنا فاشلين. عتارف بهادشي، غيكون خير ليك. ماكيدوزش نهار في حياة أي واحد فينا بلا مانعطيو فيه دليل حقيقي على أننا فاشلين. ممكن من خلال كلمة قاسحة، فكرة قبيحة، أولا رغبة شريرة. ممكن من خلال لحظة أنانية ديال لحسد أولا جشع سايب. ممكن من خلال لحظة افتخار، ملّي كنبغيو نكونو المركز ديال الاهتمام أولا نسرقو شوية من مجد الله. ممكن من خلال الشراهة أولا الشهوة. ممكن من خلال لحظة كيكونو فيها قلوبنا باردة ومافيهاش حنان على الفقراء أولا هادوك اللّي كيعانيو. ممكن كيبان هادشي ملّي كنحسّو بالغيرة من الجمال أولا القوة ديال شي شخص أخر. ممكن هادشي كيبان ملّي كنسلمو قلوبنا عاوتاني لشي معبود أرضي. ممكن كيبان هادشي ملّي كناخدو شي حاجة ماشي ديالنا أولا كنفشلو نعطيو شنو خاصنا نعطيو. بشي طريقة، كلنا كنديرو هادشي كل نهار- حنا ماكنوصلوش للمعيار الإلهي ديال التقوى. حنا كلنا فشلنا باش نكونو شنو الله خلقنا ودعانا باش نكونو.

دابا، ملّي تواجه الفشل ديالك - وغتواجهه إلا كنتي متواضع وصادق- غيكون عندك غير تلاتة ديال الاختيارات. تقدر تلتزم باش تكون رافض للأدلة، وتحاول تقنع نفسك بلّي راك بخير ملّي نت ماشي بخير بالحق. تقدر تخلي نفسك ترتاح بالحجج الممكنة اللّي كتورّي التقوى ديالك، وهادشي كيخلّي ضميرك يرتاح. أولا، قدّام الفشل ديالك، تقدر تتخبط في الإحساس بالدنب والعار، وتلوم نفسك حيت مادرتيش شنو اللّي حسن وحاولتي بالجهد باش تخبّع الفشل ديالك من الله والناس لخرين. أولا، في الانكسار والحزن ديال الإحساس بالدنب، ماتقدرش تهرب من الله ولكن تقدر تهرب لعنده. تقدر تهرب لعند النور ديال الحضور المقدس دياله ونت ماخايفش گاع، وعامر بالثقة بلّي واخّا هو تقي ونت لّا، ماغاديش يجّري عليك. تقدر تدير هادشي حيت مكانتك معاه ماعمرّها كانت معتمدة على الأعمال المزيانة ديالك، ولكن هي مبنية على الطاعة الكاملة ديال المنجّي ديالك. وحيت نت فيه، الله كيحسبك تقي، وهاكدا نت تقبلتي في المحضر المقدس دياله ديما وللأبد.

أه، نت مدعو باش تعيش حياة مقدسة، ولكن أسلوب حياتك ماكانش وماعمره يكون أساس مكانتك مع الله. تقدر تركع عند رجليه وتعترف بالدنوب ديالك، ونت عارف بلّي راك غتاخد نعمة وماشي عقوبة، حيت يسوع التقي هز التقل الكامل ديال عقوبتك باش ماتاخدوش نتا. رسالة أفسس 3: 12 كتدكّرنا بلّي حنا في المسيح نقدرو تكون عندنا الشجاعة والتقة من خلال الإيمان ديالنا بيه. إدن ملّي تفشل اليوم عاوتاني، لفين غتهرب؟

من أجل دراسة وتشجيع كتر: عبرانيين 4: 14-16