YOHANES 11
11
Lazarus nimaisi
1 #
Luk. 10:38-39
Lazarus bong ei minu mien Betania bit nikwohop bat cin di Maria kin Marta. 2#Yoh. 12:3 Maria ne sop di nden ampou tut mini mbris bikiber ei Yesus nimigti leu api ba nibou nta bidip ri. Mpe dima lene nikijam Lazarus nggwen. 3Lazarus nikwohop bat cin isok ighyet ug ei Yesus nidim bipai biNoni “Andigpoi e, nikijam Lazarus di angon kieti nggwen.”
4Tirigi Yesus miap ninghapti tut ninggwenti dima lene pai bak yo di igya kui Noni “Ninggwenti dima mibindei ba, mai jit bi. Mun dini cut igkep noni leu binhyepo tungwatu nya ingat Allah nikei-kau-keisi bou igyai him lene bindei ba, ingat Allah Nipmot cem nikei-kau-keisi bou igyai him.”
5Yesus ningon ngakei Marta kin Maria kin Lazarus. 6Lo, tirigi Noni miap tut Lazarus ninggwenti lene bisinggre bibong ei mpia ttou nsi dima mem mmun-njap can kin bu. 7Leu lene Noni pai bak yo di igya kui Noni “Jikwei ba, ingkwei hanyen ug ei hanjop Yudea.”
8Yoni ibuhup “Guru e, no ripo timiei hanjop Yudea ibingon mem gima iba tig bihwen Na pima yo. Nggon rino angkwei hanyen ug ei hamaku i?”
9Yesus pai biyok “Njap gom bon jam nitindur simnaibrimigcan bi e? Gima rino no di mbut mem njap ndrat mpia bi lewo ngat No di piga digai dihyeisi dini. 10Noro no di mbut mem mmun ndrat mpia lewo mun nyeng hi piga digai puig mem noni bi.” 11Yesus pai nok gima leu api binut nihyet gom kin bu “Isut Lazarus bong mai su. Noro dingkwei hanyen leu binhyepo diwin noni.”
12Yo di igya kui Yesus ipai “Andigpoi e, gino noni bong mai su ne noni mikei hanyen yo.”
13Yesus pai sut Lazarus nimaisi. Noro ingon kiowi eisi bikan bigya Lazarus bong mai he. 14Gima rino Yesus pai brei biyok “Lazarus mai su. 15Noro dingon llei sut gima duug ngat noni bigyo lewo mun di pek kep dima kei bibor mem je bibindei ba, jiba jingon com Da. Jikwei ba, yuug ngat noni i!”
16Tomas di ninyeng hi “Ninggre” pai bak nindigsi nya “Nnaba jikwei bibit ide Guru leu binhyepo imai bit Noni.”
Yesus win nimai biyai niyaijo nijep bak nimai
17Yesus ug krau lo, itig nimai ngut ei hak mihyeti njap bitai leu su. 18Minu mien Betania jo dideu minu ndig Yerusalem ba, nitingti mmoyo dem kilometer ningai ba, 19mben Yahudi imang bibor ikwei gwam ser Marta kin Maria ingon tut ikijam di mai leu yok tu.
20Tirigi Marta miap tut Yesus nikweisi lene noni ug um ser Noni noro Maria gwam ig bei. 21Marta pai bak Yesus “Andigpoi e, ningat ne gino agwam bit nye acan pini lene dikijam mai bi. 22Mbro nok gima lo, dikan tut bipia Allah mibirop ahyet tut mun di ahara Noni.”
23Yesus pai bak Marta “Akijam mikiju hanyen.”
24Marta buhup “Dikan tut bipia Lazarus mikiju hanyen mem Njap Ningwig Honti.”
25Yesus pai binoni “Diwin yo di imai nya leu imai eisi bidiyai niyaijo nijep biyok. Mbro nok gino hi mai su lo, gino ba ningon com Da tu lene miyai niyaijo nijep di jo kikau. 26No di niyaijo di ba ningon com Da miyai niyaijo nijep ei ningonti. Gima rino noni mimai hak bi sren. Angon jo kep dipaisi dini e?”
27Marta buhup “Andigpoi e, diba dingon com bipia Nani ne Munggwom Allah Nipmot kin Nibou Ndig di teu tungwatu nya biyai niyaijo nijep biyok di Allah preu ei mem nye tut nikweisi cem ri.”
Yesus pim kep Lazarus
28Niabiati Marta pai nok rino noni ngkwei hanyen bihig nikinjoi Maria kwei bahamui nyahan bak “Andigpoi di Guru kwei su ba, hig na.” 29Maria miap nok lene kiju ba, bipbur buug ngat Yesus. 30Mpe dima ne Yesus kwei krau minu mien Betania bigyo noro gwam nyahan ei mpia di Marta ug um eisi pima. 31Yo di ikwei gwam ser Maria ningon ingat lo, noni bipbur bikiju ba, hei ug ei nisai lene ibit lewo ikan bigya noni ug pim kep nimai ngut ei hak mihyeti.
32Maria ug kikau buug krau mpia di Yesus gwam eisi. Tirigi noni ngat Yesus lene kuk no ei nimig him bipai bak “Andigpoi e, ningat ne gino agwam bit nye acan pini ne dikijam mai bi.”
33Yesus ngat Maria kin yo di ibit noni kwei di ipim lene ningon ngguk ba, ngondut cem. 34Gima rino Noni hig ser yok “Jikes nimai ngut ei sirigitou i?”
Yoni ibuhup “Andigpoi e, akwei ngat.”
35Lene Yesus cem pim kep Lazarus. 36Gima rino mben Yahudi dima ipai biyam “Jingat i! Ningon ngguk tut Lazarus nindig bibor!”
37Noro hiter di isrig ikieti isrep “Noni bindei ba, no di niyai tu niyai da hanyen bi e? Nggon rino Noni kwei ngget Lazarus leu binhyepo mai au bi i?”
Yesus win Lazarus leu nimai eisi
38Yesus ningon ngguk hanyen bu leu api ug ei hak mihyeti. Iba tig mma nindig bibor binggam ser hak mihyeti dima nuhuigya.
39Yesus pai biyok “Jison tig leu.”
Marta di nimai nikwohop mbrua ser Noni “Andigpoi e, nimai mpiei su lewo itig ningut ei njap bitai su.”
40Yesus pai bak Marta “Apo dipai bina tu bipia gino aba angon com Da lene mporo ma angat Allah de nisindemti bou ayai him bi e?” 41Gima rino yo dima ison tig leu. Leu api Yesus tou kep kui gwamti lene ngat nadi bipai “Arig e, dipai sigyo biNa lewo amiap kep dihyet. 42Dikan tut bipia amiap dihyet bikwop mmun-njap noro dipai nok gima drek dip yo dini leu binhyepo ingon jo kep bipia Nani rino apinak Da kwei a.” 43Yesus pai nok leu lene ba nihyet nindig bihig “Lazarus e, ahei kwei!” 44Gima rino no di mai su hei kwei leu hak mihyeti bitut sinsun nghas di nggai kep ser nimig-ninda kin sinsun nghas hiter di nggai kep ser niimaisi. Yesus pai biyok “Jikwek sinsun nghas leu noni leu binhyepo kwes mem noni tut nimbutti.”
Nibou nya yuhum yam nsi mem Yesus
(Mat. 26:1-5; Mrk. 14:1-2; Luk. 22:1-2)
45Tungwatu nya di ikwei gwam ser Maria ningon imang bibor ingat mindur di Yesus bibon leu api iba ingon com Noni. 46Noro nindigsi ibou poi ingkwei hanyen biyuug ngat Farisi nya lene ipai sut Yesus ninghapti biyok. 47Gima rino Farisi nya kin imam nindig nya induk yam bit Nikei Puig Yahudi nindigsi nya ba, ihig yam ser “Nyeni inggon ndei i? No dima bibon mindur mang bibor tu! 48Gino isindui sut ba, Noni yai midyai nok gima kikau ne mporo tungwatu nya yahagom ingon jo kep Noni. Apino nibou Roma nya micut igkep nye binggek tut Tuhan De Ig bico kep nye di mben Yahudi!”
49Kayafas di nok Imam Nibou Ndig mem ari bingwam dima pai biyok “Jahagom jingon mbum. 50Jikan tut bipia gi kei rino tungwagom mai luei ide limwa nya leu gima mben Yahudi yahagom imai bingwig bi e?” 51Ningat ne nipaisi dima tug hon nonti ningon kanti bi. Noro tug hon ninyeng Imam Nibou Ndig mem ari bingwam dima ba, bimbot kep tut Yesus nimai luei mben Yahuditi. 52Noni mai luei mben Yahudi he bi noro mibuwak Allah nimunggwom bat nya di ibong ingkiaisi yahagom ba, inok gom kin yam tug hon nimaisi.
53Hon kep njap dima bikui lene nibou mben Yahudi nya yuhum yam nsi mem gima igyai nimai bak Yesus. 54Gima rino Yesus hei ei nibreisi ei mben Yahudi igyai him bi. Noni jo leu hanjop Yudea buug bong ei minu ndig Efraim dideu iggum ndigsi bit yo di igya kui Noni.
55Mpe dima ne tto bou mem mben Yahudi ide Njap Ndig Paskah dideu su. Gima rino tungwatu nya imang bibor induk yam leu ide minu mien nya bikwei ei minu ndig Yerusalem leu binhyepo icoi ei midut nipiap nonti bipwoiti nipou tirigi njap ndig dima tau kep yok bigyo. 56Yo dima inggok ser Yesus ba, tirigi idem yam ei Tuhan De Ig lene ihig yam ser “Ma jipai jingon kanti brei binye. Mpaba Noni mikwei mem njap ndig dini bi e?” 57Ihig yam ser nok drek dip imam nindig nya kin Farisi nya di itri tut bipia gino hi kan tut Yesus nibongti lene ma mbot kep tut bak nibou nya leu binhyepo ikat Noni bisima.
Nke Ahọpụtara Ugbu A:
YOHANES 11: HAD
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye