YOHANES 12
12
Maria kwei ei minu mien Betania bikiber mini mbris ei Yesus nimigti
(Mat. 26:6-13; Mrk. 14:3-9)
1Njap muhwindagom bu nipou tirigi tto bou dem mem Njap Ndig Paskah bigyo lene Yesus kwei hanyen ei minu mien Betania. Lazarus di Yesus win hanyen leu nimai eisi bong ei sirima. 2Yo dima ingei njita mem Yesus nikweisi. Marta hati tut yok bitri njita tut yok. Lazarus cem gwam bit yo di igwam kui meja bigyem njita bit Yesus. 3#Luk. 7:37-38 Leu api Maria kwei sut ampou tut mini mbris di iba wangi nigau di nibok kak bibor nuut gom bikiber ei Yesus nimig hacemti leu api ba nonti nibou nta bidip ninggou leu. Mini mbris nuui-gwang keisi kieng kep ig bei hagom. 4Noro Yudas Iskariot di ya kui Yesus bitri Noni cem srep, 5“Nggon rino noni tri mini mbris dima bibipek mitiei nitig di buhun ningat sratus ningai leu binhyepo bitri yo di yuhui mbum nya bi i?” 6Noni pai nok drek dip gi ngondut nuhui mbum nya bi noro drek dip gi noni nok ninggimang kep mun cig ri. Noni krau mitiei bousi di yo di igya kui Yesus ide ba, ninda ngwa-ngwa wai kep.
7Noro Yesus srep “Nok ug e! Apai kep noni au! Noni ba niyai munti dima binyohou Da nipou tirigi itig dingut bigyo. 8#Ul. 15:11 Nuhui mbum nya ingat rin bit je kikau noro dingat rin bit je kikau bi.”
Nibou nya yuhum yam nsi mem Lazarus
9Mben Yahudi di ningot ndig imiap tut Yesus nikwei krau minu mien Betaniati. Gima rino yuug ei sirima leu binhyepo ingat Yesus kin Lazarus di Noni win hanyen leu nimai eisi cem. 10Gima rino imam nindig nya yuhum yam nsi mem gima igyai nimai bak Lazarus cem, 11lewo Lazarus nikiju hanyenti bindei ba, mben Yahudi imang bibor ikes yok ei leu ba, ingon jo kep Yesus.
Yesus coi ug ei minu ndig Yerusalem bit yo di ingon llei sut Noni
(Mat. 21:1-11; Mrk. 11:1-11; Luk. 19:28-40)
12Njapti kui bu lene tungwatu ningot ndig di induk yam kwei mem Njap Ndig Paskah imiap tut Yesus nikwei krau minu ndig Yerusalem hanyenti. 13#Mzm. 118:26 Gima rino itot dui meng bittei leu binhyepo ibiya um Noni. Yahara “Jikwei ba, inggei sut Allah o! Allah njei mun di kei bak No di kwei tug hon Nonti ninyeng o! Allah e, anjei mun di kei bak Nibou Ndig di mben Israel ide o!”
14Yesus ug yai keledai nipmot di nehen pap gom ba, bri bigwam dip. Gima dem igbit Allah nihyet nibokti di pai,
15 #
Za. 9:9
“Je di mben Sion e, ma jidigit tut au. Lewo jide nibou ndig kui bigwam ei keledai nipmot di nehen pap dip hwou ndam je.”
16Mpe dima ne yo di igya kui Yesus ingon dorti tut mun di pek kep dima bi. Noro ei nidipti bu tirigi Yesus yai nikei-kau-keisi tug hon nikiju hanyenti ug api igyok ngon kep mun di yo dima ibibon bak Yesus di Allah nihyet bokti pai ei su.
17Tungwatu di ingat rin bit Yesus tirigi Noni hig Lazarus kwei leu hak mihyeti biwin noni hanyen leu nimai eisi pima itri tut mun di pek kep mem Lazarus bak nindigsi nya. 18Gima ribitig dino tungwatu ningot ndig dima ikwei um Yesus lewo imiap ninghapti tut bipia Noni ripo bibon mindur pima. 19Gima rino Farisi nya inso biyam bipai “Ui! Bit bon igyai mun nyeng hi kan bi. Jingat i! Tungwatu dihyeisi dini hagom itti kin Noni tu!”
Mben Yunani ibou poi inggok ser Yesus
20Mben Yunani ibou poi isrig yo di induk yam ei minu ndig Yerusalem ikieti leu binhyepo ikuk yok bak Allah mem Njap Ndig Paskah pima. 21Yoni ikwei ngat Filipus bipai binoni “Andigpoi e, nijoi sut nimbrap bit Yesus.” (Filipus nitimieisi leu minu mien Betsaida ei hanjop Galilea.)
22Lene Filipus ug pai sut yok bak Andreas leu api yahacem yuug pai bak Yesus. 23Yesus pai biyok “Tto bou dem mem Munggwom Tungwatu Nipmot yai nikei-kau-keisi tu. 24Dipai nijit bipia gino tungwagom ndim gandum ningan ba, mai ei dihyeiti bi lene ningan dima gom ngat he. Noro gino noni ndim ningan dima ba, dem kep nok mai ei dihyeiti lene ningat mang bibor ntun him. 25#Mat. 10:39, 16:25; Mrk. 8:35; Luk. 9:24, 17:33 Bikwop no di ningon hek tut nonti bikan bipia niyaisi bon ninyeng mem nonti lene niyaisi misar. Noro no di kes niyaisi ei bikan bipia bon ninyeng mem nonti bi lene no dima minyohou niyaijo di jo kikau. 26No di joi sut jem niceu bit Da lene suar noni bit Da leu binhyepo Ditde awak nya ingat rin bit Da ei mpia di dingat rin eisi. Ba, Dicig mikon Ditde awak nya inyenga.”
Yesus tri tut Nonti nimaisi
27“Dingon buhun bidipai mindei bu i? Dipai ‘Arig e, ma anyohou Da ser nhyema jam dima cut igkep Da bi e?’ Noro dikwei ei dihyeisi dini leu binhyepo jam di ttau kwei sut ninghuisi wei dima cut igkep Da. 28Arig e, akum ei Ade ninyeng jei biborti o!” Yesus pai nok rino nihyet gom tibim kwei leu gwamti bibuhup “Dikum ei Ditde ninyeng jei biborti tu ba, midibikum eisi hanyen bu.”
29Tungwatu nya di induk yam kwei ei mpia dima imiap nugwei leu api ibou poi ipai sut bipia kru nibimbi bong noro hiter ipai “E bi! Malaikati mbrap bit Noni!”
30Lene Yesus pai biyok “Nihyet di tibim kwei dima ne mun di bon ninyeng mem Da rin bi noro mun di bon ninyeng mem je. 31Tto bou dem mem Allah pai kep tungwatu dihyeisi dini tu. Tto bou dem mem Allah com no di ninyeng tak kep tungwatu dihyeisi dini leu. 32Tut Dani ne tirigi tungwatu nya ikon Da ei nnai leu dihyei ninjek dip ne midinduk tungwatu nya yahagom kwei ndam Da.” 33Tug hon nihyet dima lene bindo nisinati tut nimaisi biyok.
34 #
Mzm. 110:4; Yes. 9:7; Yeh. 37:25; Dan. 7:14 Tungwatu ningot ndig dima ipai biNoni “Bit leu nok gi ipas ei ide Puig Yahudi niggai serti nibokti ne Nibou Ndig di teu tungwatu nya biyai niyaijo nijep biyok niyaijo kikau. Nggon rino apai bipia tungwatu nya ikon Munggwom Tungwatu Nipmot ei nnai leu dihyei ninjek dip i? Tou rino Munggwom Tungwatu Nipmot dima i?”
35Yesus buhup “Nipigati dima mipiga digai je mem njap poi bu he. Gima rino ma jimbut mem nipigati tirigi nipigati piga digai je leu binhyepo nidinditi hatap je bi. No di mbut mem nidinditi krau tunggwei puigya. 36Ma jingon jo kep nipigati dima mem nijam di nipigati dima gwam bit je leu binhyepo jinok munggwom nipigati nya.”
Mben Yahudi nimang ndig ingon jo kep Yesus bi
Tirigi Yesus kes nihyet hon bikes yok ei lene Noni ku No nyahan leu yok. 37Mbro nok gino Noni bibon mindur mang bibor bou igyai him lo, ingon jo kep Noni bi. 38#Yes. 53:1 Gima rino nihyet di Nabi Yesaya tri tut pek kep mem yok.
“Tuhan e, tou rino ningon jo kep nihyet di nyeni nitri tut biyok i? Ando Ade nisindemti brei bak tou nya i?”
39Gima rino bit bon ingon jo kep Yesus bi lewo Yesaya tri tut,
“Allah pai, 40#Yes. 6:10 ‘Ditak igyai ba, tu tu. Dikes ningon ndok serti ei yokti ser nhyema iba igyai bingat ba, ingon dor niti au. Diyai nok gima leu binhyepo ingkwei hanyen ndam Da bidibindei ba, ikei hanyen bi.’ ”
41Yesaya pai nok lewo noni ngat Yesus nikei-kau-keisi bou niyai him ba, pui mun tut Noni cem.
42Mbro nok gima lo, mben Yahudi bitut ide nibou nya imang bibor iba ingon com Yesus noro imbot kep tut brei bi. Leu gino ipai brei lene Farisi nya icom yok leu mben Yahudi ide mbusyamei. 43Yo dima ijoi sut tungwatu nya inggei sut yok leu gima Allah joi sut yok a.
Allah miba Yesus nihyet bimbus tungwatu nya ingonti
44Yesus ba nihyet nindig bahara “No di ba ningon com Da lene ba ningon com Da he bi noro ba ningon com Allah di cuk Da kwei cem. 45No di ngat Da ngat No di cuk Da kwei cem. 46Dikwei ei dihyeisi dini nok nipigati leu binhyepo no di ba ningon com Da gwam ei nidinditi bi. 47Gino tungwagom miap dihyet noro bit bi lene midipai kep noni bi. Lewo dikwei ei dihyeisi dini mem dipai kep tungwatu nya bi noro dikwei mem diteu tungwatu nya leu sisar bidiyai niyaijo nijep biyok. 48No di ba ningha bak Dani ba, ningon tunggwei dihyet bon mun di pai kep noni tu. Nihyet di tibim leu duhui him mipai kep noni mem Njap Ningwig Honti. 49Lewo ditri tut nihyet bit leu dingon kanti bi. Noro Dicig di pinak Da kwei cuk Da tut mun di dipai hwou. 50Ba, dikan tut bipia nicukti dima bindei ba, tungwatu nya igyai niyaijo nijep di jo kikau. Ditri tut nihyet di Dicig ngginau Da tut.”
Nke Ahọpụtara Ugbu A:
YOHANES 12: HAD
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye