Gênesis 11
11
Torre de Babel Tshinkalurupji Piranapni
1Hiyáhoni yine psoltshijneka hajene panrurutu tsonu hyanumaxyana; walerutu tokantshi hyanumaxyana.
2Hiyáhoni yine yamta tkatshi hichpajyawaka sreta rukchijyaluna kihlemta tshijiwaka Sinear tshijne rapokna waneya waneko rutukna.
3Waneya wane htshinna wannakakluko:
— Wuya, tijolos wkamhanu hihleyoxikletanru. Hiyáhoni tijolos hpanatna sotlu kachrijru hiyrunu cimento kachrijru preu hsahatna rumukata kachrexyawaka.
4Waneya wane htshinna wanna wannakakluko:
— Wuya wkamhinwa satu poktshi hiyrun-koxa satu tenopjiru wkamhanu haté hijripto tenhohne hapkatanu. Hiyáhoni hixa hiwaka hichinijikowakapa wmupalaxyawakanupa tshij-hohoya.
5Waneya hserpikatka Tsru Hixikatshriwa Hoyakalu rexyawakaplu poktshi tenopjiru koxa, hanu rixa kamhaletluna jejine.
6Waneya wane htshina Hoyakalu:
— Halikakni panerupkana yine, panrupkana. Xyeni hyinuwajikolu tsonu. Xawakni hike himaletanna wanna klukta raluka kamhaletanna wale hkamhanna.
7Wuya, wserpikanu wyokmakanrutanna hma mimatjemkajyawakanupna satkaka.
8Hiyáhoni Tsru Hixikatshriwa Hoyakalu kopalatna yine psol-tshijiko hyiywakapna hiyáhoni rutuk-kamrurewletna poktshiya.
9Wale tshinanu tenopjiru rutakhiwakatka Babel tshinikowaka klu tshinanu wane honra Tsru Hixikatshriwa Hoyakalu yokmakanruxyana psol-tshijneka hajene hiyáhoni waneko rupalaxyana psoltshijiko hyiywakpatkanna.
Sem Klopichane Piranapni
10Xye Sem klopichane piranapni: cem mhaletkalu Sem waneya hwuhenetlu Arfaxade tshinkaluru. Hepi mhale hahyekachalu pnute hwuhenetlu.
11Arfaxade hwuheneta waneya wane pnute quinhentos mhale riweka Sem. Hwuhenetna hiwhenene jejine suxone koxa.
12Riwekatka Arfaxade trinta e cinco mhale waneya Selá tshinkaluru hwuheneta.
13Selá hwuheneta waneya wane pnute quatrocentos e três mhale riwekatka Arfaxade. Hwuhenetna hiwhenene jejine suxone koxa.
14Riwekatka Selá trinta mhale waneya hwuhenetlu Héber.
15Héber hwuheneta waneya wane pnute quatrocentos e três mhale riwekatka Salá. Hwuhenetna hiwhenene jejine suxone koxa.
16Riwekatka Héber trinta e quatro mhale waneya hwuhenetlu Pelegue.
17Pelegue hwuheneta waneya wane pnute quatrocentos e trinta mhale riwekatka Héber; hwuhenetna hiwhenene jejine suxone koxa.
18Riwekatka Pelegue trinta mhale waneya hwuhenetlu Reú.
19Reú hwuheneta waneya wane pnute duzentos e nove mhale riwekatka Pelegue. Hwuhenetna hiwhenene jejine, suxone koxa.
20Riwekatka Reú trinta e dois mhale waneya hwuhenetlu Serugue.
21Serugue hwuheneta waneya wane pnute duzentos e sete mhale riwekatka Reú, hwuhenetna hiwhenene jejine suxone koxa.
22Riwekatka Serugue trinta mhale waneya hwuhenetlu Naor,
23Naor hwuheneta waneya wane pnute duzentos mhale riwekatka Serugue; hwuhenetna hiwhenene jejine suxone koxa.
24Riwekatka Naor vinte e nove mhale waneya hwuhenetlu Terá.
25Terá hwuheneta waneya wane pnute cento e dezenove mhale riwekatka Naor; hwuhenetna hiwhenene jejine suxone koxa.
26Riwekatka Terá setenta mhale waneya hwuhenetna Abrão, Naor, Harã.
27Xyeni Terá klopichane piranapni: Terá wuhenetlu Abrão, Naor, Harã. Waneya Harã wuhenetlu Ló.
28Rupnanatka Harã hmatuxyawaka tshijneko rupniyana Ur tshinikowaka Caldone tshijneya. Seyni ruru Terá tshinkaluru hiwekawa.
29Abrão hanunrowata, Naor koxa hanunrowata; Abrão hnunro Sarai tshinkaluro, Naor hnunro Milca tshinkaluro, Milca hirni Harã tshinkaluru; Harã wuhenetna Milca, Iscá tshinkaluro.
30Seyni Sarai mwuhenewaklétoni hi kwuhenro.
31Waneya Terá haniklu hiwhene Abrão. Ranikkoxlu Harã whene Ló tshinkaluru. Ló Terá tshinkaluru whene whene; Terá mekanunroni Sarai tshinkaluro ranika, hiwhene Abrão hnunro. Waneya wannayma hyana Ur tshinikowaka Caldone tshijne ruchpajyana, Canaã tshijne hyiywakna. Harã tshinikowaka rapokna waneya wane potuko rutukna.
32Duzentos e cinco mhaletkalu Terá waneya Harã tshinikowaka rupniyanatka Terá-ni.
Nke Ahọpụtara Ugbu A:
Gênesis 11: mpdBiblia
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil