Matsiyù 13

Yesù gooma bɔɔ rìi dèu shìmàndzìnsɛnbaà tsɛ

(Marikì 4.1-9; Lukì 8.4-8)

1Àyìwà tɔ̀ sii sèè ko e sa, Yesù yè bo gbàà doùn, è bè e tsuù yu blàa dzii ra. 2#Luk 5.1-3.À y'à to mɔn jàma brìsi yè nà e kuru à tɛyn, fɔ è bè wɔ è dɔ̀n è tsuù konkoron doùn, jàmaà sapɛ yeè bà tsìiŋnà kpee rà. 3Tɔ̀un, è goo giri jaa dè è ra ko gooma bɔɔ ì ka. À ci: «Fɛɛfabaa sɔn bou, ci wo bèe shìman sɛn e re dzù rɔ̀n. 4À re shìmaan sɛ̀nkɔɔn doùn, shìmàndzin neè swey yè tɔrɔn tɔrɔn shi dziɛ rè. Tɔ̀un, kɛ̀yn neè yè nà twɛy fɔn. 5-6Swey yè tɔrɔn tɔrɔn faa ganee ɲàn, dzùà tsun fyɛn min niì. Twɛy xeu min niì, dzùà tsùn fyɛnbee kamà, è jiɛ̀ na gbama waa. Tɔ̀un, bwèè nàu bo min niì, è twɛy shìmànku rèè dzu, yè gɔ̀rɔ̀. 7Swey tɔrɔnmà yè bè kòrò daaku gane ì ka, daaku rèè yè fù yè shìmaan kun. 8Swey yè bè tɔrɔn dzù wùù gane ɲan. Twɛy xeu, yè dzin cɛyn. Swey dzin càànmoò, swey mùey, swey yè bà mòòtsyeùn. 9Toro ì ye ba ni mòò riì rè, è bà è ka myɛ̀yn faa, è toro wɔu'n kuru wube dɛ !»

Gooma bɔɔ rèè dè kuàn

(Marikì 4.10-12; Lukì 8.9-10)

10Àwà kàràndzin neè yè e kpɛrɛ̀ Yesù rà tɔ̀un, y'à tey ci: «Feera wo goomaa è ka gooma bɔɔ ì ɲàn ?» 11Yesù ci è ra ci: «Mun tɔ̀ faa, kàtsu e Ŋaablà re Màsàbee gòndoo tɔ̀, tɔ̀ twɛ̀ɛ siɔ̀n ye rìì là. Ŋà dzyee rèè, à na siɔ̀n twɛy rà waa. 12#Mat 25.29; Mar 4.25; Luk 8.18; 19.26.Àwà sɔn ni nìi rè, gè nà bà tɔ̀ raà tɛ̀y, giri yè bà ni à re. Ŋà pɛn na ni nìi rè, kiɲaanin nìi ni à re, tɔ̀ sa nà tsi à ra. 13Tɔ̀ rii kamà, min bà goomaa è ka gooma bɔɔ ì ɲàn, kàtsu è siin faa, è to na jɛ̀y faa waa, yè e toro wɔɔ̀, ŋà è na myɛ̀yn faa waa, è to yɛ̀rɛ̀ na à dzin seen tsu waa. 14#Ekk 6.9,10.Tɔ kɛɛra Esayì rè kɛɛrabee gooma reè bou e shi tsɛ è re, nìi yɛ ci:

"Ye nà myɛ̀yn fa cɛyn, ŋà à dzin fa sen waa. Ye nà siin fa cɛyn, ŋà jɛ̀y fa fa waa."

15Tɔ nà fa, kàtsu kun nee mòdzin neè yè e tantaamà xɔbeu.

Yè e tor'lèè kpereun, yè e jaa rèè tsyee.

È sào ni ye jaa rèè mà jɛ̀y fa waa,

ye tor'lèè mà myɛ̀yn fa waa, ye akir'là tsu to mà à jà waa.

È tɔ̀ sapɛ fau, sànko è mà nà to e re jaamabee fau'n kur'la lakere,

min bà ni è cɛrɛmabe waa.

16 # Luk 10.23,24. Ŋà nìi ye, ye raà wùbeu, kàtsu ye jaa rèè jɛ̀y faa, ye tor'lèè yè bà myɛ̀yn faa. 17Sààben na, mun nì ci e ra, ye nìi jàa, ko ye nìi myɛ̀ɛn, Ŋaablà re kɛɛra giri, ko mòdzin tereonma giri y'à gaaŋ ye yè tɔ̀ jà, è to na à jà waa. Y'à gaa ci ye y'à myɛ̀n, è to na à myɛ̀n waa.

Shìmàndzìnsɛnbaà raa gooma bɔɔ̀ dzuɔn

(Marikì 4.13-20; Lukì 8.11-15)

18Tà doùn, gooma bɔɔ rìi dèu shìmàndzìnsɛnbaà tsɛ, ye toro wɔ tɔ̀ dzuɔn rè: 19"Shìmàndzin neè bèu tɔrɔn shi dzii niì rè, mòdzin neè swey ni tɔ̀ shi dziɛ rìì tsuru. È Ŋaablà re Màsàbee goomaa myɛ̀ɛn, ŋà è na à dzin seen waa. È nìi myɛɔ̀n, Sùtana nàa tɔ̀ bo è duùn. 20Shìmàndzin neè bèu tɔrɔn faa gane riì ɲàn, mòdzin neè swey ni tɔ̀ gàneè rìì tsuru. È ye Ŋaablà re goomaa myɛ̀n, tɔ̀ nɔ̀nkɔɔrɔn, yè e tsiɛ à ra ko taamadzibe ka. 21Ŋà à jiɛ̀ na gbaɔn è ɲan nìi fa waa, è toò à tsɛ waatsi dɛɛnin bàsɔùn nì doùn. Goo xɔù ye è ji nìi tsuru, tàmafa mòdzian yè fù è kpɛyn gooma ree kamà, tɔ̀ yeè è sèè bouma à kpɛyn. 22Shìmàndzin neè bèu tɔrɔn daaku gane riì ɲàn, mòdzin neè swey ni tɔ̀ daaku ganee rìì tsuru. È gooma ree myɛ̀ɛn, ŋà dziɲaun vyɛ̀ɛ̀yràgoo reè, ko nàfor'la raa sànfir'la bàa saabu è gooma ree ŋòò è ɲan, à na dzia dzin wɔ waa. 23Shìmàndzin neè bèu tɔrɔn dzù wùù gane riì ɲàn, mòdzin neè swey ni tɔ̀ dzù wùù ganee rìì tsuru. Yè e toro wɔɔ̀ Ŋaablà re Gooma ree re, y'à dzin sen. Àwà twɛy mòdzin neè rìì dzin wɔɔ̀. Swey dzin càànmoò, swey mùey, swey yè bà mòòtsyeùn."»

Dzù rɔ̀n vun ɲaan raa gooma bɔɔ̀

24Àwà, Yesù yè gooma bɔɔ kpɛrɛ dè è ra kɔn ci: «Ŋaablà re Màsàbee boo goo nìi kaatsi re, tɔ̀ rii siin: À ni a ci kpiri sɔn, nìi shìmàndzin wuu sɛun e re dzù rɔ̀n. 25Mòdzian ɲɛunmaà shɔ̀ùn, à ɲaàn yè nà, è nà vundzin ɲaan sɛ̀n be à re shìmàndzian ɲàn dzù rɔ̀n, è geren. 26Àwà, shìmàndzian xeu min niì, è dzin, vuàn sa yeè bo ji. 27Dzùtsià rè faagoofadzin neè yè nà à re tɔ̀un, y'à tey ci: "Tsìfaà, wo na shìmàndzin wuu rii sɛ̀n a re dzù rɔ̀n gbɛ ? À to yè bà dzùrù vun ɲaan yè bà ni à ɲan ?" 28Dzùtsià ci: "Mun ɲan mòdzian sɔn ni tɔ̀ faɔ̀ !" Faagoofadzin neè yè dzin à ra ci: "Wo ni à re mìn bè vun ɲaan fù bo mɔn ɔn ?" 29À ci: "Ɔ̀ɔɔn, e maà tɔ̀ fa waa. Tà boshɔ̀ùn à fùkɔɔn, ye dzia shìmànku rèè sa fu ko à ka. 30Y'a to è sa yeè bɔɔ esire, fɔ shìmàn gaa bwey. Tɔ̀un shìmàn gaa bwey, mun nà dzin shìmàn gaa reè rà ci: ye vun ɲaan bo ŋe, ye tɔ̀ shì shì è dzu. Tà shɔ̀ùn, ye kòmànà shìmàndzian gaa, ye tɔ̀ ji mun ne bòndoo doùn."»

Yesù ci Ŋaablà re màsàbee boo kaanindzin ko buru fua gè rè

(Marikì 4.30-32; Lukì 13.18-19)

31È gooma bɔɔ soo kpɛrɛ dè è ra kɔn ci: «Jìrànxɔɔ̀ Màsàbee boo kaanindzin ne, mòo nìi seun è b'a sì e re dzù rɔ̀n. 32Dzùà nangedzian sapɛ ɲan, wò rii na dzyɛ̀n. Ŋà à nàu xe, è blàbe nangekuà sapɛ ma. È bà gɔ̀ɔ̀kùìrii duùdàà, fɔ jìran nɔ̀n kɛ̀yn neè yè nà e tan nèè ji be à sààn neè ɲàn.»

33È gooma bɔɔ soo de è ra kɔn ci: «Jìrànxɔɔ̀ Màsàbee boo buru fua gè rè, taàn sɔn nìi seun, à y'à ji faaniin fa giri ɲan, à y'à guu. Buru fua gè rèe yè faaniin fa guuŋma rèe sapɛ fu.»

34Àwà, Yesù yè twɛy goo rèè sapɛ karàn jàmaà nà ko gooma bɔɔ ì ka. À naà gooma pɛn dèe è ra nìi na deò gooma bɔɔ ka waa. 35#Zab 78.2.Tɔ fau nì, sànko Ŋaablà re kɛɛraa rè gooma de dɔ̀unma sɔn yeè bo e shi tsɛ, nìi yɛ ci:

«Mun nà gooma è ka gooma bɔɔ ì ɲàn.

Goo o goo mɛnɛɔn fɔ dziɲaan jɔ̀n bwey, min twɛy dè è ra.»

Dzù rɔ̀n vun ɲaan raa gooma bɔɔ̀ dzuɔn

36Àwà, tà shɔ̀ùn, Yesù yè bo jàmaà tɛyn, è dɔ̀n be tsii rɔ̀n. À re kàràndzin neè yè nà à re tɔ̀un, yè dzin à ra ci: «Wo gooma bɔɔ nìi dèu dzù rɔ̀n vun ɲaan tsɛ, tɔ̀ dzuɔn dè mùn na.» 37Yesù ci: «Shìmàndzin wuɔ sɛ̀nbaà, tɔ Adamà dziàn nì. 38Dzùà, tɔ dziɲantsiɛ. Shìmàndzin wuɔ, tɔ Jìrànxɔɔ̀ Màsà ganee dzin nèè. Vun ɲaan, tɔ Sùtan'naa mòò rèè. 39Ɲan nìi bèu vundzin ɲaan sɛ̀n, tɔ Sànwɔbaà rìì. Shìmàn gaa, tɔ dziɲan latan bwey. Shìmàn gaa reè, twɛy yè bà mɛ̀rɛ̀kɛ rèè. 40Vun ɲaan fù fuu nìi tsuru è dzu kpaan sa rɔ̀n taki, dziɲaan latan bwey, à nà bà tɔ̀ rii tsuru. 41Dziɲaan latan bwey, Adamà dziàn nà e re mɛ̀rɛ̀kɛ rèè bàji na, yè nà mòdzìn sàn fir'leè, ko mòdzin ɲan reè bo à re màsàbee doùn. 42Tɔ̀un, è nà mòdzìn ɲan reè maa sà brìsi rɔ̀n. Àwà gɛyn boo, ko ɲiun taa rìì nà bà ni mɔn. 43Tɔ̀un mòdzin tereonma rèè, twɛy nà den deèn a ci bwèè e Fa Ŋaablà re màsàbee doùn. Toro ì ye ba ni mòò riì rè è bà è ka myɛ̀yn faa, è toro wɔu'n kuru wube dɛ !»

Yesù ci Ŋaablà re Màsàbee boo nàforo mɛnɛuma re, ko fyɛɛdzin kpaxɔù

44Yesù yè dzin kɔn ci: «Ŋaablà re Màsàbee boo nàfor'le, nìi na mɛnɛɔn dzù sɔn ɲan. Kpiri sɔn y'a jàu, tɔ̀ y'a mɛnɛn kɔn cɛyn. À taama dzibe ɲaanfaa suun, è bè e suun gee sapɛ gɔɔ, è nà dzù rèe fì.»

45Yesù yè dzin e shɔùn ci: «Ŋaablà re Màsàbee boo durufabaa re, nìi fyɛɛdzin kpaxɔù rèè gaa. 46À bèu soo wuu ja nìi wù fɔ è bè geren, è dɔ̀n be, è bè e suun ge reè sapɛ gɔɔ, è nà à fì.»

Yesù ci Ŋaablà re màsàbee boo ji kuan yɔ̀ rè

47Yesù ci kɔn: «Ŋaablà re Màsàbee boo ji kuan yɔ̀ sa re. À maaŋmaà yu rɔ̀n, à ji kaatsià sapɛ kuàn. 48È na tsyɛn waatsi riì bwèy, ji kun neè y'à sɔ̀ɔ̀n boò kpee rà, yè e tsuù, yè ji rèè ɲankɛrɛn. Nìì reè wù, è twɛy jia cèyn neè doùn, barauma rèè, yè twɛy maa. 49Àwà à nà bà tɔ̀ rii tsuru dziɲan latan bwey sa. Mɛ̀rɛ̀kɛ rèè nà bo yè mòdzìn ɲan reè bo mòdzin tereonma rèè fi. 50Tɔ̀un è nà mòdzìn ɲan reè maa sà brìsi rɔ̀n. Àwà gɛyn boo ko ɲiun taa rìì nà bà ni mɔn.» 51Twɛy gooma reè sapɛ shɔùn, Yesù yè e re kàràndzin neè tey ci: «Ye nèe sapɛ dzin seun ɔn ?» Kàràndzin neè ci ɔ̀ɔn. 52È dzin è ra ci: «Tɔ̀ kamà, Sàrìryà Kaamoo ge o ge ye ba Jìrànxɔɔ̀ Màsàbee doùn kàràndzin, tɔ bàa boo gbàtsi re, nìi gè ye ì ko gè bɔrɔɔ ì sa boò e re nàfòrò marama nɔ̀n.»

Yesù bèu Nazarɛtsì min niì

53Àyìwà Yesù nàu dò twɛy gooma bɔɔ rèè dèè rà waatsi riì bwèy, è bo mɔn è dɔ̀n be. 54À lamɔ̀nɔun wɔ̀ nìi ɲàn, è bè mɔn, è bè mòdzian kàr'na è re ŋaablabegbaà doùn. À re kàr'nà ji ɲaanfaa suun mòdzian dzii tsɛ, fɔ è bè wɔ yè teè faa ci: «Nèe yè bà nèe akiriblabe rèe boo min ? È bà kabagoo goo reè faa dzi tarau dzùrù ? 55À na gɔ̀ɔ̀kpaabaà dzin kpir'la dɛ ? Wò rii naà tsoo na Mariyamùn ɔ̀n ? À tseyn nèè rìì na Yàkubà, ko Yusufù, ko Shimɔ̀n, ko Yudà ɔ̀ ? 56À tseyn taan reè sapɛ na tsùuŋnà ɲe ka mìin ɔn ? À to yè bà nèe sapɛ tarau min ?» 57#Yux 4.44.Twɛy goo rèè yè bà saabu, è na dzi ɲɛn Yesù rà waa. Yesù yè dzin è ra tɔ̀un ci: «Bla wɔɔ̀ kɛɛraa ɲàn min niì sapɛ, fɔ à yɛ̀r'la fàtsiɛ doùn, ko à re fɔɔn rè.» 58Àwà è re ɲɛynabɛybeè kamà, à na kabagoo goo giri fa mɔn waa.

Nke Ahọpụtara Ugbu A:

Matsiyù 13: BDZU

Mee ka ọ bụrụ isi

Kesaa

Mapịa

Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye

Mụtakwuo maka Bible Dzùùngoo Unicode

Matsiyù 13

Amaokwu Akwụkwọ Nsọ Ndị Ama Ama siteré na
Matsiyù 13

Akwụkwọ Nsọ:

Dzùùngoo

Udi: Bible Dzùùngoo Unicode - BDZU

Matsiyù 13

Matsiyù 13

Amaokwu Akwụkwọ Nsọ Ndị Ama Ama siteré na Matsiyù 13

Akwụkwọ Nsọ:

Dzùùngoo

Udi: Bible Dzùùngoo Unicode - BDZU

Matsiyù 13

Amaokwu Akwụkwọ Nsọ Ndị Ama Ama siteré na
Matsiyù 13