Matsiyù 14

Yùxanà vuu kùn nìi nà

(Marikì 6.14-29; Lukì 9.7-9; 3.19-20)

1Àyìwà tɔ̀ waatsi rɔn, màsà kpir'lìi na ni Galile mar'la tsɛ, tɔ̀ tsoo yè bà Erodzì Antsipasì, Yesù goomaa yè dzi tɔ̀ tsɛ. 2Tɔ̀un, è dzin e re faagoofadzin neè rà ci: «Nèe Mòdzìn Jààràfoobaa Yùxanà nì. Wò rii kpunan boo fùn nèè fi. Tɔ̀ rii kamà, è bà dzia kabagoo goo reè faa.» 3-4#Luk 3.19,20.#Sak 18.16; 20.21.Àyìwà, Erodzì keresi riì tsoo na Fìlipù, tɔ̀ re tààn Erodziyadzì, Erodzì na tɔ̀ tsiɔ, à y'à bà e re tààn. Tɔ̀ faumaà kamà, Yùxanà na dziàn à ra ci: «Tàan rèe na dàaŋnà è bà wo re tààn waa.» Àwà tɔ̀ goomaa kamà, Erodzì na à too yè Yùxanà kun y'à shì, y'à ji kàsoò doùn. 5À sàò na ni à re, wò yeè Yùxanà vu. Ŋà, à na shiɔ̀ jàmaà jɔun, kàtsu è sapɛ na ci à Ŋaablà re kɛɛra.

6Àwà, Erodzì kere jisee jii laker'la sii sèè, Erodziyadzì dzin taan yè ɲɔɔ̀n ji jiu'n kur'la, mòdzin kiriuma rèè jaa ra, nìi dzibeu Erodzì rà, 7fɔ è bè wɔ è kɛɛ̀y, ci è gè o ge gaa wò re, wo nà tɔ̀ sìn à ra. 8Àwà à naà rè duunwɛɛy doùn, è dzin Erodzì rà ci: «Mòdzìn Jààràfoobaa Yùxanà kùngɔɔ̀ sìn n na mìin tasa doùn.» 9Tɔ̀ goò na màsà kpir'là taama dzibe waa. Ŋà à kɛ̀rɔunmaà kamà, ko mòdzin kiriuma rèè sa kamà, è dzin ci è sìn à ra. 10È mòò ka tɔ̀un, tɔ̀ yeè bè Yùxanà kùngɔɔ̀ kùnùn kàsoò doùn. 11È nà à ka cangur'liɛ kɔ̀ tasa doùn, à y'à sìn à ra. Tɔ̀ sa y'a tsi, à y'à sìn e naà nà. 12Yùxanà rè kàràndzin neè yè b'a fùàn sen tɔ̀un, yè b'a wɔ. Tà shɔ̀ùn, yè b'a dè Yesù rà.

Yesù ɲwɛɛ̀n sìun kpiri gbaa nùn nà min niì

13Yesù tɔ̀ goomaa myɛ̀un min niì, è konkoron sen è bo mɔn, è dɔ̀n bè jènjàà koron sɔn doùn, à dan nà bà gbàn min niì. Tɔ̀ tɔ̀umaà jàmaà rè, yè bo wɔ̀ rèè ɲàn, yè dɔ̀n be à kpɛyn e san nà. 14À bèu bo konkor'na doùn min niì, è jàma brìsi jà. Àwà è ɲììɲii y'à kun. Tɔ̀un è ɲan ɲìnìnkɔɔn reè, è twɛy cɛrɛmabe.

15Ɲɛ̀rɛɛ̀rà wɔu, à re kàràndzin neè yè e kpɛrɛ̀ à ra, yè dzin à ra ci: «Mùn ni gàne rìi ɲàn, à jènjàà kor'nì, dzɔɔ̀n to gaa tsì nòn. Jàmaà bàji be mùn dziire wɔ rèè ɲàn, yè ɲwɛyn fì ɲɔn.» 16À ci è ra ci: «È bè kun na ni jeenà waa. Ye yɛ̀r'leè yè è kɔ̀ ɲwɛyn y'à ɲɔn !» 17È ci: «Gèsɔn na ni ɲe re mìin, buru kunun nun, ko ji dzin fii tɛ̀y waa.» 18À ci: «Ye twɛy sìn mìin.» 19Tɔ̀un, à y'à gaa jàmaà rè, ci yè e tsuù vuàn tsɛ. Tà shɔ̀ùn, è buru kunun nuàn ko ji dzin fii rèe tsi, è jaà ɲansen jìran kèrè, è baraka sìn Ŋaablà ra. È bur'leè tara tara tɔ̀un, à y'à wɔ e re kàràndzin neè suun, twɛy y'à sìn jàmaà nà. 20È sapɛ y'a ɲɔn yè cɛn kpan. À dzyee kùnkwììn touma rèè, tɔ̀ tsɛumaà, yè sèè teeŋ fii tsyɛn. 21Nìì reè tɔ̀ ɲwɛɛ̀n ɲɔun, kpir'leè na gbaa koron nùn boò, tàan rèè ko dziin nèè na daɔn waa.

Yesù jìiŋ yuà tsɛ min niì

(Marikì 6.45-52; Yùxanà 6.16-21)

22Tɔ̀ nɔ̀nkɔɔrɔn, Yesù y'à ji e re kàràndzin neè jɔun, ci yè dɔ̀n konkor'na doùn, yè maa be wò jɔun yu blàa kɛ̀yn nɔn, sani w'e shi sin dò jàmaà nà. 23À re shia sìn dòumaà shɔ̀ùn jàmaà nà, è tèyn be jèn sɔn tsɛ e soone, è bè Ŋaablà mafyɛ̀n. Dzɔɔ̀n yè tsì, à soo yeè bà ni mɔn ŋe. 24Tɔ̀ y'a tàrà, konkor'na dàn na gbàn kpee rà nòn, è bà tsià fyɛɛn mà. Tɔ̀un, yuà fù tèynkɔɔn yè konkor'na fìfaa min niì sapɛ. 25Feèn ci e ye wɔ tsɛ̀kèn ben bwey mà, Yesù yè fù, è jìì beè yuà tsɛ, kàràndzin neè kpàkèrè. 26Y'à jìì nakɔɔn jau yuà tsɛ min niì, è akiri yè fù. È ci à fùn ɲɛyn nì. È shi ɲaanfaa suun, yè gɛɛ boò.

27Tɔ̀ nɔ̀nkɔɔrɔn, Yesù yè gooma è ka ci: «Ye e akir'là tsùù, à mun nì. E maà shi waa.» 28Piyɛrì y'à latsi ci: «Tsìfaà, è ba wo rìì taki, dzin min b'à kpa yuà tsɛ.» 29Yesù ci: «Nà.» Piyɛrì yè jàà bo konkor'na doùn tɔ̀un, è maa, è jìì beè yuà tsɛ Yesù kpà. 30À nàu à jà fyɛɛn blà geren, è shi. À shiu min niì, è maa, è jàà beè yu rɔ̀n. Tɔ̀un è gɛɛ bo ci: «Tsìfaà n tsi !» 31Tɔ̀ nɔ̀nkɔɔrɔn, Yesù yè e sia foro, à y'à kun, è dzin à ra ci: «Wo ɲan ɲɛynaà dzyɛ̀n dɛ, feera wo y'à ciri ?» 32È fiɛ̀ sa yeè dɔ̀n konkor'na doùn tɔ̀un. È dɔ̀un min niì, fyɛɛn yè e tsiì. 33Nìì reè ni konkor'na doùn, yè kunun gban à bììn, yè dzin à ra ci: «Sààben na, wo rìì Ŋaablà Dzin Kpir'la taki.»

Yesù ɲìnìnkɔɔn reè cɛrɛmabeu min niì Zhenezarɛtsì

(Marikì 6.53-56)

34Àyìwà Yesù ko e re kàràndzin neè yu blàa fuuŋ tɔ̀un, yè dzi Zhenezarɛtsi mar'la ɲàn. 35Twɛy mòdzin neè y'à tɔ̀u min niì ci à Yesù rìì nàuma, y'à dè be e si ra tɔ̀ gàneè min niì sapɛ. Tɔ̀un ɲìnìnkɔɔn ge o ge ni mɔn, yè nà è sapɛ ka à re. 36Yè Yesù màfyɛ̀ɛn, ci à y'à to ye yè e dzyɛn à re vyaà dziikuan bàsɔùn nà. Nìì reè sapɛ yeè e dzyɛun à ra, twɛy sapɛ yeè cɛrɛmabe.

Nke Ahọpụtara Ugbu A:

Matsiyù 14: BDZU

Mee ka ọ bụrụ isi

Kesaa

Mapịa

Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye

Mụtakwuo maka Bible Dzùùngoo Unicode

Matsiyù 14

Amaokwu Akwụkwọ Nsọ Ndị Ama Ama siteré na
Matsiyù 14

Akwụkwọ Nsọ:

Dzùùngoo

Udi: Bible Dzùùngoo Unicode - BDZU

Matsiyù 14

Matsiyù 14

Amaokwu Akwụkwọ Nsọ Ndị Ama Ama siteré na Matsiyù 14

Akwụkwọ Nsọ:

Dzùùngoo

Udi: Bible Dzùùngoo Unicode - BDZU

Matsiyù 14

Amaokwu Akwụkwọ Nsọ Ndị Ama Ama siteré na
Matsiyù 14