Luka 18

Emuanyi we'muishi we'manja ne'muhumba-kasi

1Kanji Yesu era kuishira ebanafunzi* bai ono muanyi, kwa kuhonda kubalosa kwa bémire kunde béma Ongo busira kutama. 2Era kuteta mbu: «Mu musi muuma mwábaa mutúla muishi wa manja. Oyu muishi we'manja ábaa àtatunda Ongo, kanji ábaa àtanaanja na mundu asibya. 3Kanji mwo'yu musi mwábaa mutúla muhumba-kasi muuma. Oyu muhumba-kasi era kunde ámuikiranga na kumubura mbu: ‹Unyíishiraa kubuya elubanja lwa nyitúsa ne'murenda wanyi.›

4«Si suku sinene sera kurenga, oyu muishi we'manja ánanyire kumuishira'lo. Chasinjire, era kutetera mwa muchima wai mbu: ‹Nyono ndatúnda Ongo, ndaánja na mundu asibya. 5Si ono muhumba-kasi, bushi ànyibikire kwa shoko, nyingámuishira elubanja lwai kubuya. Nyingáira bacha, chasiya àtachiéndekeraa kunde áika anola, kunyibika kwe'mufubya tulo.›»

6Enawetu kukwera kuteta mbu: «Mǔmvaa kubuya bya oyu muishi we'manja mubi àtechire. 7Rero Ongo nai, ebandu ba álondolaa, ba bénde bámulakangira emushi ne'butufu, akáishira'bo elubanja kubuya. Kanji atánêrise kuasa'bo. 8Nábabura kwa angábaishira elubanja fuba. Si mango nyi Mwana we'Mundu nyikáfuluka, nyikábuana muno butala bandu ba bète bwemeresi?»

Emuanyi we'Mufarisayo ne'mufuchisi we'mbarata

9Kwábaa bandu ba béndee báchitonga mbu bu batúla bàtungenene era muhondo sa Ongo na kunde bákena ebanji. Yesu era kuishira'bo ono muanyi:

10«Lusuku luuma bandu babiri báyaa kwéma mwa Luhu lwa Ongo*. Muuma ábaa Mufarisayo*, ne'unji ábaa mufuchisi wa mbarata. 11eMufarisayo* era kwîmanga na átangirisa éma mwa muchima wai mbu: ‹Ongo Tata, nàtechire mbu akoko era ùli, bushi nyono ndatúla kuuma ne'banji bandu. Beke batúla besi, kanji barenzi, kanji basingisi. Kanji nákutonga bushi, ndáli ngo'no mufuchisi we'mbarata. 12Kabiri mwe'inga, nénde náya mwa memo ma ménde máirwa busira kulya. Kanji nénde nâna echiuma che'kumi che'bindu bya nénde nábona.›

13«Si emufuchisi we'mbarata yeke, era kwêmangira marerere, chiro ákaereresa êmusa emeho mai mwa chanya. Era kuchihuta-huta emino kwa chifuba bushi ne'businane mwa kwéma ebubabalire mbu: ‹Ongo Tata, unyífiraa bonjo! Nyiri mukosi wa bibi!›»

14Yesu kukwera kuteta mbu: «Nábabura kwa oyu mufuchisi we'mbarata àfulukaa kwa wai, Ongo àmutolire ngo'la ùtungenene era muhondo sai. Si oyu Mufarisayo*, nânga. Bushi chira mundu woshi ola wénde wáchěrusa, àkândáasibwa, si ola wénde wáchandaasa yeke, àkêrusibwa.»

Yesu áahanyira ebana batoto

(Mat 19:13-15; Mar 10:13-16)

15Bandu bauma báreteraa Yesu ne'tubonjo-bonjo chasiya abíke'to kwe'mino. Ebanafunzi* bai bálolire bacha, bera kukaliira abu bandu. 16Si Yesu era kuteta mbu bàmureteraa abu bana. Era kuhuba kuteta mbu: «Murékaa ebana batoto babáhe ene nyìri! Mùtabângaa, bushi ebandu ba bàli nga'bo, bu besha eBwami bwa Ongo*. 17Kubinali, nábabura kwa ‹Chira mundu ola utǎngirire eBwami bwa Ongo* nga mwana mutoto, atákêngirire mwo'bu Bwami chiro na hicha.›»

Yesu áhambala na muare muuma

(Mat 19:16-30; Mar 10:17-31)

18Mukulu-kulu muuma era kubusa Yesu mbu: «Mukangirisi mubuya, chi nyiíraa chasiya nyibóne ekalamo ke'suku ne'mango?» 19Yesu era kumwǎkula mbu: «Chi chatuma wányěrika mbu mubuya? Kutáli mundu mubuya, kureka Ongo yeine! 20Si wìshi kute emiomba* ya Ongo itúla itechire mbu: ‹Uténdaa wábanda ekiri, uténdaa wêta, uténdaa wêba, uténdaa wásinga emundu cha àtairire. Úndaa wátunda eho na nyoko.›»#18:20 Somaa Kutenga 20:12-16; Bukengere 5:16-20. 21Oyu mundu era kumwǎkula mbu: «Ei miomba* yoshi nénde náira kwa ìtechire kutengera elyana etoto lyanyi.»

22Yesu ômvire bacha, era kumubura mbu: «Uchíri uínyire mwasi muuma: Uúsaa ebindu byoshi bya wéte, ne'bikulo bya bingáfa, ùbiabiraa ebakene. Ukáira bacha, ungábona bikulo binene kwa nguba. Chasinda ubáhaa, unyíkulikire.»

23Si mango oyu mundu ômvaa bacha, era kusinana busese, bushi ábaa muare busese. Kanji ábaa éte bikulo binene busese.

24Yesu álolire kwa asínanyire busese, era kuteta mbu: «Kubinali, kusibuire busese kwa baare kwîngirira mwa Bwami bwa Ongo*! 25Kubofuire busese kwa ndokomu kwîngira mwa chiture che'singe, kwa muare kwîngirira mwa Bwami bwa Ongo*.»

26Ebandu ba bômvaa kwe'i myasi, bera kwire báteta mbu: «Rero, nde i'ukánunulibwa?» 27Yesu nai mbu: «Cha chìtangaalikana ne'bandu, chénde cháalikana na Ongo.»

28Petero kukwera kuteta mbu: «Ulólaa! Tubano twarékire byoshi bya twáataa na twákukulikira.»

29Yesu nai mbu: «Kubinali, nábabura kwa akaba emundu àngareka enyumba yai, nesi mukai, nesi banyakabo, nesi ebasere bai, nesi ebana bai bushi ne'Bwami bwa Ongo*, 30akábona binene busese, mango achíri kuno butala. No'mwa suku sa sěshire, akábona ekalamo ke'suku ne'mango.»

Yesu áfula emyasi ye'kufa ne'kwômoka kwai

(Mat 20:17-19; Mar 10:32-34)

31Era nyuma se'bi, Yesu era kutola endumwa* sai ekumi ne'biri era kubura'si mbu: «Mǔmvaa, tubano bano twérukira eYerusalemu. Mwo'yu musi mu byoshi bya byánjikwaa ne'barebi* era luulu sanyi nyi Mwana we'Mundu, bìngaberera. 32Nyingânyibwa mwa mino se'bandu ba bàtatula Bayuta. Bangányishekera, bangányikamba na kunyichira'ko. 33Bangányihuta etuchi, chasinda bangányita. No'kwa lusuku lwa kahatu, nyingômoka.» 34Si endumwa* chiro sikômva kute ei myasi yábaa ìtechire, bushi yábaa ìbishirwe kubo. Rero, batámenyaa akaba Yesu ábaa áteta bushi na chiye.

Yesu álamya muuta muuma

(Mat 20:29-34; Mar 10:46-52)

35Yesu ábaa áhonda kuika ofu ne'musi we'Yeriko. Kwábaa muuta muuma ola wábaa wěkese kwa musike se'njira émeresa. 36Oyu muuta mango ômvaa kwa lusindo lwe'luamba lwe'bandu, era kubusa mbu: «Chi chàbere?» 37Bera kumwǎkula mbu: «Yesu we'Nasareti iwárenga.» 38Era kuchilakangira mbu: «Yesu, Mwenyi Tauti, unyífiraa bonjo!» 39Ebandu ba bábaa bàli era muhondo bera kumukaliira mbu asíraa. Si era kurengeresa álakanga busese mbu: «Yesu Mwenyi Tauti, unyífiraa bonjo!»

40Yesu era kwîmanga, era kuteta mbu bamúreteraa oyu muuta. Ábere àika ofu na Yesu, Yesu era kumubusa mbu: 41«Chi wáhonda nyikuírire?» Nai mbu: «Enawetu, náhonda nyihúbe kulola.» 42Yesu kukwera kumubura mbu: «Hùbaa kulola! Ebwemeresi bwao bwàkulamise!» 43Unao-unao, era kuhuba kulola. Era kwêmisa Yesu áenda átonga Ongo. Mango ebandu boshi bálolaa kwe'bi, nabo bera kutonga Ongo.

Nke Ahọpụtara Ugbu A:

Luka 18: tbt

Mee ka ọ bụrụ isi

Kesaa

Mapịa

Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye

Mụtakwuo maka Echilaano Chiyayaya

Luka 18

Amaokwu Akwụkwọ Nsọ Ndị Ama Ama siteré na
Luka 18

Geere nke a ntị Luka 18

Akwụkwọ Nsọ:

Tembo

Udi: Echilaano Chiyayaya - tbt

Luka 18

Luka 18

Amaokwu Akwụkwọ Nsọ Ndị Ama Ama siteré na Luka 18

Geere nke a ntị Luka 18

Akwụkwọ Nsọ:

Tembo

Udi: Echilaano Chiyayaya - tbt

Luka 18

Amaokwu Akwụkwọ Nsọ Ndị Ama Ama siteré na
Luka 18