Luka 22
22
Kuchetwa kwaJesu
1Unshaji wemilya yechinkwa chisina umfufumuso, inowhi Pasika yakababa pelyo. 2Batebuji bakulwana nabakwali bakaba bepyanga kuti bangombulaya chini; asi bakabetya banhu.
Judasi unocheta Jesu
3Guluzhanje wakangwina muna Judasi, wakaba ewhi Sikaliyoti, eli umwe wabegumi lina babili, 4wakenda kubatebuji bakulwana namakulukota kuti angompila chini kwabali. 5Bakashantilwa bakavumilana kuti banompa imali. 6Nokudalo wakavuma akashaka unshaji ulokwelela kuti angompila chini kwabali pesina banhu banji.
Jesu unolonganyila chilayilo chePasika.
7Lyakaswika izhuba lyemilya yechinkwa chisina umfufumuso akale lili izhuba lyePasika pakunobulayiwa imhwizana 8Nokudalo Jesu wakatuma Pita naJoni, eti, “Indani munotibambanyila ipasika kuti toolya.” 9Bakati kwaali, “Moda kuti tibambanyile kupi?” 10Wakati kwabali, “Mungongwina muguta, moshangana nonhulume ulosenga ihali yevula, muntobele munongwina mungumba yaachangwina, 11muti kumweni wengumba, ‘Undayiji unoti kwamuli: Iponi ingumba yabezi mundichalyila ipasika nabalayijwa bangu?’ 12Iye uchanomutondeja ingumba ihulwana ipopezhulu inazwibiya zwose mukati, mubambanyile iyo.” 13Bakenda bakanowana sezwaakabaleba, bakava babambanyila ipasika.
Chilayilo chaShe
14Pawakati waswika unshaji, wakagala pakulya nabo bapositoli. 15Wakati kwabali, “Ndabedisisisa kuti ndilye ipasika yeyi namwi ndisanhu ndayabula, 16ndinomubuja kuti anditoolya kujine zwizhajikijwe mubushe bwaMwali.”
17Wakatola unkombe akaboka akati, “Tolani yoyu, mukobelane; 18nokuti ndinomubuja nditi kuvila ngweno andichinoonwa akale chinwiwa chonzhambi kuswikila bushe bwaMwali bwaswika.”
19Wakatola akale, chinkwa, akaboka, akachimedula, akabapa eti, “Yoyu umbili wangu, uchapilwa imwi, galani muta ali kuti mundikumbulukile pakale.” 20Bakati bapeja chilayilo, wakati, “Yoyu unkombe chivumilano chipya chelopa lyangu lichookutukila imwi.”
21Asi lingani, luboko lwoyo uchandicheta lunanami yopano petebuli. 22“Nokuti Mwananhulumyana woNhu ukumunda sobuzwakamisilwa, asi mayee kunoyo unhu uchoncheta!”
23Pakalepo bakatanga kubhuzana kuti kungaba ani pakati pabo angata chinhu chakadalo.
Bukulwana bwechokomende.
24Kwakaba nokukakabajana pakati pabo kuti ndiyani angaba unkulwana wabo. 25Wakati kwabali, “Mashe abokuzhe anamasimba pezhulu pabo, yabo banamasimba pezhulu pabo banoshobwa sababhanchi babanhu. 26Asi zwisibe alo pakati penu; yoyu unkulwana pakati penu ngaabe iye soti ndiye untukutuku, neebo untungamili ngaabe sonshingi. 27Ndiyani unkulwana, yoyo unogala pakulya, kana yoyo unoshingila? Aatoba yoyo ugele pakulya na? Koga imi ndipo pakati penu soyo ukumushingila.
28Ndimwi yabo balamba beli nami mukukwejwa kwangu, 29feno ndomupa bushe somubakandipa Tate, 30kuti mulye nokunwa petebuli lyangu mubushe bwangu, akale mogala zwigalo zwobushe mutonga induji igumi nembili jokwaIzilaeyli.
Pita unolamba Jesu.
31“Simoni, Simoni, whilila, Satani wakumbila kuti ekupyeke sekoloni, 32asi ndakunamatila, kuti usikonwe mukudimbwa kukwo; asi ungochingunuka, simisa banakwaina babo.”
33Wakashandula eti, “She, imi ndilozwipila kunda muntolongo nokufa namwi.” 34Wakati, “Ndokubuja Pita, kuti igukulume lisanhu lyakokolika nasi, unoba wandilamba katatu kuti autondiziba.”
Chikwama, nehobhodo negwalabaza
35Wakati kunaibo, “Pandakamutuma musina ihobhodo kana chikwama kana ishangu, pana zwamwakashayiwa na?” Bakati, “Apana.”
36Wakati kwabali, “Asi feno, yoyo unanechikwama ngechitole, unanehobhodo ngete zwakalezwo. Noyo usina igwalabaza ngetengese ijasi lilye etukotenga igwalabaza.” 37Nokuti ndomubuja kuti zwilokwelela kuzhajikijwa zwinhu yezwi zwilokwalwa pezhulu pangu zwokuti, “Unoobalilwa nabachinyi, yezwi zwakakwalwa mumakwalo pezhulu pangu zwikumuzhajikijwa.” 38Bakati, “She, lingani yopano haya makwalabaza mabili.” Iye akati, “Zwakwana.”
Jesu unonamata kudunhu lyeOlivi
39Wakabhuda, samazhuba ose akenda kudunhu lyeOlivi; balayijwa babe bakontobela. 40Paakaswika kwakale, wakati kwabali, “Namatani kuti musingwine mukukwejwa.”
41Wakabasiya akasosoloka kwonshizho unanga sokuposwa kwebwe akanofhigama akanamata, 42eti, “Tate kana muda, bhisani unkombe yoyu kunami, kusibe kuda kwangu, koga kuda kwenu ngakutiwe.” 43Akale kwakaboneka ingilozi kwaali iva kudenga ikoonsimisa. 44Elimukulwajilwa wakanamata neshungu, akale idukuta lilye lyakaba samadonwe makulwana elopa akabedonela pasi.
45Paakanyamuka kuva mukunamata, wakabwilila kwakabeli balayijwa akabawana belilele neshungu jabo, 46wakati kwabali, “Molalilani biya? Mukani munamate, kutila kuti musingwine mukukwejwa.”
Kusungwa kwaJesu
47Wakati echinolebeleka, kwakaswika igapo lyabanhu, likatungamililwa naJudasi wakabeli umwe wabegumi lina babili.Wakenda pelyo naJesu kuti omyonte, 48asi Jesu wakati kwaali, “Judasi unompila mwananhulumyana wonhu nokumyonta kani?” 49Pabakabona zwalutobela, yabo bakabekwenda naye bakati, “She titeme negwalabaza na?” 50Umwe wabo wakatema akadubula inzebe yokululyi yondanda wontebuji unkulwana.
51Asi Jesu wakati, “Zwakwana yezwi!” Wakaguma inzebe akonchilisa.
52Jesu wakati kubatebuji bakulwana, nabatungamilili babalindi beTempeli nabakulugulu bakaba bezha nolubengo kwaali, eti, “Mwezha kwandili namakwalabaza akale neswimbo sofana ndimpambi na? 53Pandakabeli namwi muTempeli mazhuba ose amujakakweja kundisunga. Koga yoyu ndiwo unshaji wenu, nowesimba lyenhilima.”
Pita unolamba Jesu
54Bakombhata bakenda naye kungumba yontebuji unkulwana. Pita wakatobela ekwendela kule; 55Pakabangijwa moto pakati polubazhe, Pita wakagala pakati pabo. 56Umwe undandakaji wakombona eligele pamoto, akondingisisa akati, “Yoyu unhulume neebo wabeli naye.”
57Koga wakalamba, akati “Awe nhukaji anditounziba.” 58Mushule monshaji umfupi umwe akale wakombona akati, “Nawibo uli umwe wabo!”
Asi Pita wakati, “Awe nhulume anditoba iye pe!”
59Mushule kwonshaji weawa lingaba limwempela, umwe wakanangatila eti, “Chokomende unhulume yoyu ndiye wabeli naye, nokuti unGalili.”
60Asi Pita wakati, “Awe nhulume anditozwiziba zwaumulebeleka.”
Pakalepo echinolebeleka igukulume lyakakokolika. 61She wakachingunuka akondinga Pita. Ndipo Pita paakakumbulukwa mawhi aShe pakalebeleka kwaali eti, “Igukulume lisanu lyakokolika nasi, unooba wandilamba katatu.” 62Wakabhuda akenda pazhe akanolila kasakasa.
Jesu unoshungulujwa.
63Yabo banhulume bakaba bakombhata Jesu bakonsota akale bondoba 64bakomfuka kumesho, bakati, “Polofita kuti ndiyani wakuloba?” 65Bakaleba mawhi manji bontuka.
Jesu unomiswa mbeli kweGota
66Pakwakeja, bakashangana begota lyabatebuji bakulwana, nabakwali; bakombuza mbeli kwegota lyabo, bakati, 67“Tibuje kana ndiwi Kristo.”
Koga iye wakati kwabali, “Kana ndingomubuja amutondidimbwa, 68akale ndingomubhuza, amutondishandula. 69Asi kuvila ngweno mwananhulumyana woNhu unoogala kuluboko lwokululyi lwamasimba aMwali.” 70Bose bakati, “Iwi uMwananhulumyana waMwali na?” Wakati kwabali, “Seni ndimwi mumuleba moga.” 71Bakati, “Ani biya tichinoda busumikiji bweni? Tazwiwhila isu nokwedu zwava mundomo mumwe.”
Nke Ahọpụtara Ugbu A:
Luka 22: LTP
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
The word for The World International