Tobhiti 4
4
IV: Tobhiya
1Pazuva rakarero, Tobhiti akabva arangarira nezvemari yaakanga achengetesa Gabhaeri kuRhagesi muMidhia 2achizviti, “Ndatosvika pakukumbira kuna Mwari kuti ndichifa zvangu. Chingave chinhu chakanaka kuti ndidaidze mwana wangu Tobhiya ndimurondedzere nezvemari iya ndisati ndafa.” 3Akadaidza mwana wake Tobhiya, akauya kwaari akamutaurira kuti,
“Kana ndichinge ndafa, nyatsondivigawo zvakanaka.
Remekedza amai vako usambovarasa zvako
mazuva ose oupenyu hwako.
Vaitire zvose zvavanoda;
usaite chinhu chinovagumbura.
4Mwanangu, urangarire kuisa kwose kwavakaita
upenyu hwavo parumano kuri kuitira iwe
pawakanga uri munhumbu.
Kana vachinge vazofawo vavige muguva
rimwechetero neni parutivi pangu.
5“Mwanangu, ramba uri munhu
akatendeseka kuna Tenzi mazuva ako ose.
Usamboda zvako kupara chitadzo
kana kudarika mitemo yake.
Ita zvakarurama mazuva ose oupenyu hwako
usambofa wakatevera makwara asina kururama
6nokuti ukaita zvinhu zviri pachokwadi
uchabudirira pazvinhu zvose zvauchaita
sezvinoita vose vano mugariro wakarurama.
7“Pazvinhu zvako, kamurawo zvimwe zvokupa vasina.
Usambofuratira murombo upi noupi zvake
Mwari haazombokufuratirawo.
8Mawandiro ezvinhu zvaunopa zvacho
ngaafambiranewo nezvinhu zvaunazvo;
kana uine zvakawanda ipawo zvakawanda,
kana uine zvishoma ipawo zvishoma.
Asi kupa kwaunoita vasina,
usaite kanyimiramundiro.
9Nokudaro unetenge uchitozvigadzirira
dura guru rapazuva renhamo
10pamusana pokuti kupa vasina
kunonunura murufu kuchinunurawo
vanhu kuti varege kupinda murima.
11Kuno Wokumusorosoro,
vose vanopa vasina,
mupiro chaiwo wakanakisisa.
12“Mwanangu zvose zvoujarijari zvose navakadzi siyana nazvo.
Kana woroora, sarudza mukadzi worudzi rwangu ini
baba wako. Usaroore mukadzi wechirudzi asiri
wedzinza rangu baba vako,
nokuti isu tiri vana vavaporofita.
Rangarira madzitateguru edu okutanga
vanaNowa naAbhurahamu naIsaki naJakobho.
Vose zvavo vakaroora vakadzi vokurudzi kwavo
vakakomborerwa muvana vavo uye rudzi
rwavo ndoruchawana nhaka yenyika.
13Newewo mwanangu, ida hama dzako.
Usave nomwoyo wokushora hama dzako,
vangave vakomana kana vasikana vorudzi
rwako vana vomuvanhu vokwako, sarudza wako
mukadzi mukati mavo ivavo.
Ndinodaro nokuti kuzvikudza kunounza
kuparadzwa nokunetseka mumwoyo,
usimbe hunopinza mukushaya chokubata nomuurombo
nokuti usimbe ndivo amai venzara.
14Rega kusvikira zuva ramangwana racho
wakangochengeta mubayiro wavanokushandira
usingavape, vatambirise pakarepo.
Kana ukashandira Mwari uchapiwa mubayiro.
“Chenjera mwanangu mune zvose zvaunoita;
unyatsozvibata pamugariro wako wose.
15Rega kuitira mumwe munhu chausingade
kuti iwe uitirwe.
Usanwe waini zvokusvika pakutoraradza.
Katsika kokupindiridza mukunwa
ngakarege kuva ndiko shamwari yako.
16Ipawo chokudya kuna vane nzara
nechokupfeka kuna vasina.
Zvose zvose zvazvo zvaunenge unazvo zvakawanda,
tsaura zvakati kuti, zvokupa vasina.
Pakupa kwacho kwaunoita usazviite uchigunun'una.
17Pakuvigwa kwomururami,
kupa chokudya newaini, ipa chaizvo
uye nomwoyo unoda asi kwete parufu rwomutadzi.
18“Unofanira kutsvaka mazano kune munhu
wose ano ungwaru, usashore zano ripi neripi rinobatsira.
19Rumbidza Tenzi Mwari mune zvose.
Mukumbire kuti akutungamirire
mumakwara ako ose asvitse nzira
dzako nezvinangwa kwazvinofanira kuperera.
Ndinodaro nokuti haasi ose marudzi akapiwa ungwaru,
Tenzi pachake ndiye anopa zvinhu
zvose zvakanaka.
Pamadiro ake zvake anosimudzira munhu
pamusoro kana kumukanda pasi pasi
chaipo pakadzama kunzvimbo yavachakabvu.
Saka zvino mwananguka rangarira mirao
iyoyi iyi, usambofa wakairega ichidzimika
mumwoyo mako.
20“Zvino mwanangu, chandinokutaurira
ndechokuti ini ndakachengetesa
masaga matatu ano makirogiramu
makumi mana, emari yesirivha
yamashekeri kuna Gabhaeri mwanakomana
waGabhuriasi, kuRhagesi muMidhia.
21Kana takave varombo mwanangu,
ngazvirege kukutyisa, unotova noupfumi
hwakawanda chaizvo kana uchitya Mwari nokunge
uchivenga chivi chipi nechipi zvacho nokungewo
uchiita zvinodiwa naTenzi Mwari wako.”
Zvasarudzwa nguva ino
Tobhiti 4: SCLBD
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Shona Common Language Bible © Bible Society of Zimbabwe, 2008.