Soma Biblia Kila Siku 09/2020Mfano

Kanisa la Korintho lilikabiliwa na mafundisho ya utamaduni na mapokeo ya Kigiriki. Mafundisho hayo yalitenganisha mwili na roho. Wagiriki hawakuamini juu ya ufufuo wa mwili. Waliona kuwa ufufuo unaihusu roho peke yake na siyo mwili. Walikaza kuwa mwili ni gereza la roho. Roho inatengana na mwili kwa njia ya kifo. Biblia inafundisha kuwa mwili na roho havitenganishwi milele. Kristo katika ufufuo ataifanya miili yetu hii ionekane kwa upya. Ataubadili mwili wetu wa unyonge, upate kufanana na mwili wake wa utukufu, kwa uweza ule ambao kwa huo aweza hata kuvitiisha vitu vyote viwe chini yake(Flp 3:21). Naye atafuta kila chozi katika macho yao, wala mauti haitakuwapo tena; wala maombolezo, wala kilio, wala maumivu hayatakuwapo tena; kwa kuwa mambo ya kwanza yamekwisha kupita(Ufu 21:4; ukiwa na nafasi, soma zaidi katika 1 Kor 15:46-58).