Soma Biblia Kila Siku Novemba 2021Mfano

Nimekosa sana kwa haya niliyoyafanya (m.10). Jambo la kuwahesabu wananchi limeandikwa na Musa katika sheria yao. Lakini lilihitaji kufanyika kwa utaratibu maalumu (ambao umefafanuliwa zaidi katika Kut 30:11-16), na lilihitaji kuagizwa na Bwana mwenyewe, imeandikwa katika Hes 1:1-3. Bali Daudi hakumwuliza Bwana kabla ya kuamua jambo hili kubwa. Aliamua mwenyewe. Hakuongozwa na Bwana. Tena hatuoni dalili kwamba alifuata utaratibu huo wa Mungu. Hata siku hizi katika kanisa kosa la kiongozi linawatatiza washarika au "kondoo" kama Daudi anavyowaita katika m.17. Kwa hiyo kuna neno hili kwa viongozi katika 1 Petro 5:2-4, Lichungeni kundi la Mungu lililo kwenu, na kulisimamia, si kwa kulazimishwa, bali kwa hiari kama Mungu atakavyo; si kwa kutaka fedha ya aibu, bali kwa moyo. Wala si kama wajifanyao mabwana juu ya mitaa yao, bali kwa kujifanya vielelezo kwa lile kundi. Na Mchungaji mkuu atakapodhihirishwa, mtaipokea taji ya utukufu, ile isiyokauka.