Soma Biblia Kila Siku Agosti/2022Mfano

Tafakari uhusiano wa somo hili na Zek 12:10, Mungu anaposema, Nami nitawamwagia watu wa nyumba ya Daudi, na wenyeji wa Yerusalemu, roho ya neema na kuomba; nao watamtazama yeye ambaye walimchoma; nao watamwombolezea, kama vile mtu amwombolezeavyo mwanawe wa pekee; nao wataona uchungu kwa ajili yake, kama vile mtu aonavyo uchungu kwa ajili ya mzaliwa wake wa kwanza. Yesu alipochomwa, watu wa Mungu walifunguliwa chemchemi ya kusafishia dhambi (m.1, Katika siku hiyo watu wa nyumba ya Daudi, na wenyeji wa Yerusalemu, watafunguliwa chemchemi kwa dhambi na kwa unajisi). Mungu akiwamwagia Roho Mtakatifu, hakuna nafasi kwao tena kwa roho ya uchafu (m.2, Kisha itakuwa katika siku hiyo, asema Bwana wa majeshi, nitakatilia mbali majina ya sanamu katika nchi, yasikumbukwe tena; pia nitawafukuza manabii, na roho ya uchafu, watoke katika nchi). Wakitubu, Mungu anapewa nafasi kuwatakasa (m.9, Nami nitalileta fungu lile la tatu na kulipitisha kati ya moto, nami nitawasafisha kama fedha isafishwavyo, nami nitawajaribu kama dhahabu ijaribiwavyo; wataliitia jina langu, nami nitawasikia; mimi nitasema, Watu hawa ndio wangu; nao watasema, Bwana ndiye Mungu wangu). Tokeo la utakaso huo ni watu wanaoliitia jina Bwana na kukataa dhambi (ni maana ya m.3 unaosema, Mtu awaye yote atakapotoa unabii, basi baba yake na mama yake waliomzaa watamwambia, Hutaishi; kwa maana unanena maneno ya uongo kwa jina la Bwana; na baba yake na mama yake waliomzaa watamtumbua atoapo unabii). Angalia pia katika m.7 kwamba Zekaria alitabiri vilevile jinsi Yesu alivyokataliwa na kuuawa, na wanafunzi wake wakatawanyika: Amka, Ee upanga, juu ya mchungaji wangu, na juu ya mtu aliye mwenzangu, asema Bwana wa majeshi; mpige mchungaji, nao kondoo watatawanyika; nami nitaugeuza mkono wangu juu ya wadogo. Kwa ufafanuzi zaidi linganisha na Mk 14:27 unaosema, Yesu akawaambia, Mtakunguwazwa ninyi nyote kwa ajili yangu usiku huu; kwa kuwa imeandikwa, Nitampiga mchungaji, na kondoo watatawanyika.