Ni Muhimu kwa Mungu

Tunaweza kusali kuhusu jambo lolote. Kama Christine Caine anavyosema, “Ikiwa ni muhimu kwako, ni muhimu kwa Mungu.” Ikiwa ni jambo tunalolijali au kuhangaika nalo, ni jambo tunaloweza kuliombea.

Paulo anatutia moyo katika Wafilipi 4:6-7, "Msijisumbue kwa neno lolote; bali katika kila neno kwa kusali na kuomba, pamoja na kushukuru, haja zenu na zijulikane na Mungu. Na amani ya Mungu, ipitayo akili zote, itawahifadhi mioyo yenu na nia zenu katika Kristo Yesu" (CSB).

Tunaweza kuomba kuhusu nini? Jibu la Paulo ni wazi: kila kitu! Hakuna jambo dogo sana kwa Mungu. Na ingawa maneno hayo "Msijisumbue kwa neno lolote," yanaweza kuonekana kama hayana huruma kwa matatizo yoyote tunayoyakabili, ni muhimu kutambua kwamba Paulo aliandika maneno haya akiwa gerezani.

Hakuwa anatuambia tufanye “Usijali, kuwa na furaha” iwe kiitikio chetu. Kupuuza au kupunguza uzito wa hali zetu kutakuwa ni kutowajibika. Lakini kuna njia kwetu ya kupata amani na nguvu za Mungu katikati ya mahangaiko na dhiki, na ndiyo maana Paulo anatutia moyo “kuwasilisha maombi yetu kwa Mungu.” Ndiyo, Mungu anahusika kikamilifu katika kutunza ulimwengu mzima na katika masuala makuu ya ulimwengu, lakini Baba yetu wa Mbinguni anahusika vilevile na anajishughulisha na mambo ya maisha ya watoto wake: kazi yetu, mahusiano, hisia, hofu, na shughuli za kila siku.

Mungu anakuona, Mungu anakujua, na Mungu anakujali kikweli.

Ikiwa jambo fulani ni muhimu kwako, ni muhimu kwa Mungu. Kwa hivyo, omba kuhusu jambo hilo!

Sala

Baba, asante kwa kuwa unajali kuhusu kulisha ndege na kuvalisha maua, na hiyo ni sehemu ndogo tu ya jinsi unavyojali kuhusu mambo ya maisha yangu na mambo yaliyo moyoni mwangu. Leo, ninataja mbele zako mambo ambayo ninawazia: tafadhali onyesha hekima, uwepo na nguvu zako katika mambo haya. Na ninaomba kwamba kama vile unavyojali kuhusu mambo ambayo ni muhimu kwangu, utayaelekeza mawazo na upendo wangu kwa mambo ambayo ni muhimu kwako. Ufalme wako na uje duniani, kama vile ilivyo mbinguni. Amina."