EbiÀpẹrẹ

Ebí nínú Ayé Ìṣubú

Bóyá o lá àlá jíjẹ tẹ́tẹ́ kan tàbí jíjogún owó tabua kan. Ó ti pinnu ohun tí wàá fi àwọn owó náà ṣe. lóòótọ́ ni pé gbogbo ẹ̀bùn pípé àti dídára ń ti ọwọ́ Ọlọ́run wá, Òun sì ni olùpèsè wa níti ohun gbogbo. Ṣùgbọ́n a pè wá sí ohun tí ó pọ̀ tayọ lílé ọrọ̀ ayé tàbí àwọn ìtẹ́lọ́rùn ayé. Bàbá rẹ ọ̀run tí ó nífẹ̀ẹ́ rẹ fẹ́ kí o mọ̀ nipa àwọn ewu tó wà nínú pípòǹgbẹ fún àwọn nǹkan tí ayé ń fún ni, àti àlàáfíà iyebíye tí wà á ní ìrírí nígbà tí o bá pòǹgbẹ Jesu ṣáájú ohun gbogbo.

Jesu ṣe àkíyèí pé àwọn ènìyàn kan ń bu ọlá fún Un pẹ̀lú ètè wọn, ṣùgbọ́n ọkàn wọn jìnnà sí Òun. Ó bani lọ́kàn jẹ́ pé èyí jẹ́ òtítọ́ fún ìjọ ní ìran yìí, èyí tí àwọn èrò ayé ti nipa lórí rẹ̀ gan-an. Kì í ṣe ohun tí kò wọ́pọ̀ láti rí àwọn Kristeni tí wọ́n ń pòǹgbẹ fún ọrọ̀ àti ìrọ̀rùn ayé ju bí wọ́n ṣe ń pòǹgbẹ Jesu lọ. nítorí náà, ó ṣe pàtàkì láti bèèrè lọ́wọ́ ara wa bóyá à ń wá Ọlọ́run fún èrè ẹran-ara nìkan (gẹ́gẹ́ bí ọ̀nà láti rí ohun à ń wá), tàbí bóyá à ń lépa ìbáṣepọ̀ pẹ̀lú Rẹ̀ nítorí pé ọkàn wa pòǹgbẹ láti mọ̀ Ọ́n sí i.

Jesu ṣàlàyé fún àwọn ọmọ-ẹ̀yìn Rẹ̀ pé àwọn aláìgbàgbọ́ (ní àsìkò Tirẹ̀, àwọn Kèfèrí) máa ń lépa ohun tí wọn ó jẹ, mu àti wọ̀. Ṣùgbọ́n lọ́gán tí àwọn ènìyàn bá ti gba àwọn nǹkan wọ̀nyí lọ́wọ́ Ọlọ́run, olùpèsè wọn, iná ẹ̀mí wọn á kú. Ó ṣe é ṣe kí o ti rí àníyàn àti wọ̀bìà tí ó ń dípò ebi tòótọ́ fún Ọlọ́run, nínú ìjọ tàbí àwùjọ rẹ lápapọ̀. Ó ṣe é ṣe kí ó ní ìmọ̀ tó ń dàgbà sókè sí i nipa pé ìwọ àti àwọn onígbàgbọ́ bíì rẹ ni a pè láti ṣe àfihàn ìgbésí-ayé aláìnáání-ohun-ayé fún ayé.

Ìwàásù Jésù kò fi ìgbà kan ṣe ìgbélárugẹ fún irúfẹ̀ ìfẹ́kúfẹ̀ẹ́ tàbí wọ̀bìà ohun ìní ayé tí ó wà lákàtà wa lónìí, nítorí náà a kò gbọdọ̀ so títẹ̀lé E mọ́ àwọn èrè ayé. Kò sí ohunkóhun ní ayé tí ó ṣe pàtàkì bí i mímọ̀ àti ṣíṣe Ọlọ́run logo. Ẹ jẹ́ ká farajìn fún dídarí àwọn ìfẹ́ was í wíwá A lákọ̀ọ́kọ́ – ju ohun gbogbo lọ - àti láìsí ìrètí òdì fún èrè yàtọ̀ sí ayọ̀ mímọ̀ ọ́n àti sísọ Ọ́ di mímọ̀.